Promes Ia I Bin Givim Mi Hop
Juliana Faiehun, Lagos, Naejeria
I no longtaem afta we mi mo hasban blong mi i mared, mitufala i bin gat blesing blong gat wan boe. Taem mi luk smael blong hem mo lukluk long ae blong hem, mi filim se mi gat wan bigfala kaon long Papa long Heven. Boe blong mitufala i luk se hem i stret evriwan long mi. Mi mo hasban blong mi, i bin talem tangkyu long Lod evri dei from wan spesel presen ia.
Long 19 Febware 2009, mi rere long ol ting blong mi rere blong gobak long skul from las yia mo ol las klas blong mi. Mi mo hasban blong mi, i no bin save se nekis dei, bae boe ia we mitufala i lavem bae i kasem wan fiva mo livim laef long wol ia.
I bin wan had eksperiens blong mi blong akseptem. Ol memba blong wod blong mifala, oli bin kam long hom blong mifala blong kamfotem mifala wetem ol skripja mo ol hym mo prea wetem mifala. Mi bin laekem ol sore toktok blong olgeta, be harem nogud blong mi from boe blong mi i stap yet. Taem mi tingbaot hem, ol ae blong mi bae i fulap long wota.
Fo dei afta long ded blong hem, mi bin kasem insperesen blong stadi Ol Tijing blong Ol Presiden blong Jos: Josef Smit. Taem mi stap holem buk ia long han blong mi, hem i open long han blong mi long wan japta we taetol i “Ol Toktok blong Hop mo Kamfot long taem blong Ded.” Mi bin stat blong ridim mo i bin tajem mi bigwan tru long ol bigfala samting we Josef mo Ema i bin safa mo lusum taem tufala i bin statem famle blong tufala. Taem mi kasem wan smol pat long wan toktok blong Profet we i bin givim long fenerol blong wan gel we i gat tu yia nomo, mi bin filim olsem wan kol wota i kapsaed antap long hed blong mi, mo wasemaot ol tingting ia we oli stap trabolem mi.
Mi singaotem hasban blong mi. Tugeta mitufala i bin ridim: “Mi bin … askem kwestin ia, from wanem ol pikinini ia, we oli ol pikinini we oli no gat sin nomo, Lod i stap karemaot long mitufala. … Lod i tekemaot plante i go, iven taem oli bebi yet, blong oli ronwe … long ol harem nogud mo ol rabis fasin blong wol ia tedei; oli bin klin gud tumas, oli fulap tumas long lav, blong laef long wol; from samting ia, sapos i stret, i no nid blong krae, be yumi gat risen blong stap glad, from se oli kamaot long ol rabis fasin, mo bae i no longtaem bae yumi save luk olgeta bakegen.”
Profet i ademap: “I save gat wan kwestin olsem—‘?Bae ol mama oli save gat ol pikinini blong olgeta long taem we i no save finis?’ !Yes! !Yes! Ol mama, bae yufala i gat ol pikinini blong yufala; from se bae oli gat laef we i no save finis, from Atonmen i pemaot kaon blong olgeta finis.”1
Taem we mitufala i bin ridim ol naesfala toktok ia, famle prea blong mitufala i bin fulap long ol tangkyu from promes ia se tru long Atonmen blong Jisas Kraes, bae mitufala i save stap wetem boe blong mitufala bakegen.
Tedei mitufala i gat tri naesfala pikinini, brata mo sista long boe blong mitufala we i bin ded finis. Mitufala i stap tijim olgeta long trutok blong gospel ia we i no gat en, we bae i lidim olgeta i gobak long Papa blong olgeta long Heven mo long Sevya blong olgeta, Jisas Kraes.
Mi save se mesej blong Profet Josef Smit, abaot laef afta ded, hem i tru. Bae mi oltaem stap glad from hop, pis, glad, mo hapines we famle blong mi i kasem—long tugeta saed blong vel.