Ol Paeonia long Evri Ples
Filipin: Paoa long saed blong Spirit long Ol Aelan blong Solwota
Long sot taem ia blong 53 yia, Jos i bin eksperiensem wan bigfala paoa mo fasin blong gro long Filipin, we oli save gud long hem olsem “Perel blong Save Gud.”
Long Ogusto A. Lim, tu yang misinari blong Yunaeted Stet i bin presentem mesej ia long hem we long hem i olsem se oli konfemem nomo ol prinsipol we hem i bin save finis se oli tru. Wan yang loya mo wan Kristin, Ogusto i tekem not se ol doktrin olsem ol revelesen we i gohed blong kam oli bin “ol samting we, mi bin bilivim iven taem mi bin stap long hae skul mo kolej.”1
Afta sam manis, Ogusto i bin agri blong atendem ol Sandei seves mo bin tekem jalenj ia blong ridim mo prea abaot Buk blong Momon. “Mi bin stat blong ridim series Buk blong Momon long sem spirit we Moronae i bin advaesem yumi [blong gat]. Taem mi bin mekem samting ia wetem fasin blong wantem save sapos i tru—afta long sam laen—mi bin kasem wan testemoni,” hem i talem.2
Long Oktoba blong 1964, Ogusto Lim i bin baptaes mo bin kam wan paeonia blong Jos blong Jisas Kraes blong Ol Lata dei Sen long Filipin, wetem waef mo famle blong hem we oli jes joenem hem smol taem afta. Tedei, afta 10 yia blong fetful seves long Jos—hemia wetem wan koling long 1992 blong stap olsem wan Jeneral Atoriti, fas man Filipin we i kasem posisen ia—Brata Lim i ripresentem fet mo dedikesen blong ol handred taosen Lata-dei Sent we oli stap long “Perel blong Save Gud.”
Wan Rij Graon
Samples 550 yia bifo Jisas Kraes i bon, Lod i bin promesem Nifae, Buk blong Momon profet: “Mi tingbaot olgeta we oli stap long ol aelan blong solwota,” mo “mi karem i go fored toktok blong mi long ol pikinini blong ol man, yes, long evri kantri blong wol tu” (2 Nifae 29:7). Long plante we oli bin ridim ol gudfala toktok ia, wan grup blong “ol aelan blong solwota” i kam long maen blong mi: Filipin.
Wetem wan populesen we kolosap i kasem 100 milion, Ripablik blong Filipin i wan bigfala grup blong aeland blong kolosap 7,100 aelan we i stap long saed blong Saot Is blong Esia. Hem i wan naesfala tropikol kantrin we i fulap long ol pipol we oli gud, hapi mo gat tingting i stap daon. Kantri ia tu i stap long rod blong fesem ol etkwek, ol hariken, ol damej blong volkano, ol taedol wev, mo ol nara disasta mo safa long plante problem long saed blong ekonomi mo sosaeti. Fasin blong stap pua i stap kam bigwan mo i wan jalenj we i gohed blong stap hapen, mo ol man Filipin oli bin stap strong tru long problem we oli blong sot taem long saed blong politik mo ekonomi.
Be long olgeta we oli save gud long wei blong Lod, Filipin, graon blong hem i rij, i rere blong plantem ol sid blong gospel. Wetem Tagalog mo ol nara lanwis insaed long kantri, plante man Filipin oli toktok Inglis, we i wan nasonal lanwis. From oli stap folem rul blong Spein blong longtaem, moa bitim 90 pesen long populesen oli Kristin; mo wan smol pat oli Muslim.
Fas taem we oli tekem Jos i go long Filipin i bin hapen long 1898, long taem blong wo bitwin Spein mo Amerika we Wilad Kol mo Joj Siman, Lata-dei Sent ami we oli kam long Yuta we oli bin setem apat olgeta olsem ol misinari bifo, oli aot. Taem oli gat janis, oli prijim gospel, be i no bin gat baptaes afta long hem.
Long taem blong Wol Wo II, sam long ol Lata-dei Sent oli bin muv long wan aelan i go long narawan wetem Ol Joen ami grup. Long 1944 mo 1945, ol grup blong ol ami ia oli bin stap gat ol Jos miting long plante ples, mo plante LDS ami fos memba mo nara wokman oli bin stap nomo long Filipin taem wo i finis. Long medel blong olgeta, i bin gat Maksin Tet mo Jerom Horowits we i jes konvet i no longtaem. Tugeta, tufala i bin help blong presentem gospel long Aniseta Fajado. Taem oli stap help blong bildimbak haos blong Aniseta long wan eria we oli bin sakem bom long hem long Manila, Brata Horowits i bin serem niufala fet blong hem we hem i jes faenem wetem Aniseta mo gel blong hem, Rut.
Aniseta i bin kasem wan testemoni mo wantem tumas blong baptaes, be Jos i no bin givim raet blong oli baptaes long Filipin long taem ia from i no bin gat ol strong Jos bilding long ol aelan ia. Elda Harol B. Li (1899–1973) blong Kworom blong Olgeta Twelef Aposol i bin kam blong save wanem Aniseta i wantem, mo wetem paoa we hem i gat olsem jeaman blong Komiti blong Jeneral Ami Fos, Elda Li i bin apruvum baptaes blong Aniseta. Long Ista moning long 1946, ami soldia Loren Fere i bin baptaesem Aniseta Fajado, mo naoia, oli luksave hem olsem fas Filipino we oli save we i kam memba blong Jos blong Jisas Kraes blong Ol Lata-dei Sent.
Stat blong Misinari Wok
Afta long wo, oli bin oganaesem ol Jos grup long tu ples blong kamp blong ol ami blong Amerika—Klak Ea Bes mo Subik Bei Si Bes—semtaem ol Lata-dei Sent memba soldia oli stap luk fored blong save gat wan Jos i stanap long Filipin. Long 21 Ogis 1995, Presiden Josef Filding Smit (1876–1972) i bin dediketem Filipin blong oli prijim gospel long hem. Be from ol loa blong kantri oli no letem, mekem se ol misinari oli jes kam nomo long 1961.
Long 1960 Elda Godon B. Hinkli (1910–2008), we i bin wan Asisten long Kworom blong Olgeta Twelef Aposol, i bin visitim Filipin blong sam yia: “Mi talemaot wanem we mi luk long saed blong misinari wok … se bae i givim plante frut olsem we i stap hapen long plante nara ples long wol.”3 Long yia afta, afta we ol memba olsem Maksin Tet Grim mo Presiden Robet S. Teila blong Saot Fa Is Misin wetem sam fren aotsaed long Jos oli bin rere mo stretem plante samting long saed blong pepa, Elda Hinkli i bin kambak long ol aelan blong Filipin blong dediketem bakegen Filipin blong misinari wok i stat.
Long 28 Epril 1961, aotsaed long Manila, Elda Hinkli i bin mit wetem wan smol grup blong ol fos memba, olgeta blong Amerika we oli stap ia, mo wan memba blong Filipin—Deved Lagman—mo Elda Hinkli i bin givim wan spesel prea “se bae i gat plante taosen we bae oli kasem mesej ia mo kasem blesing from.”4 Ol toktok ia, oli bin kamaot long wan tru wokman blong Lod, we i bin kam wan toktok blong profesi.
Ol fas fo misinari—Reimon L. Gudson, Hari J. Marei, Ken K. Lowi, mo Nesta O. Ledesma—oli bin kasem Manila sam wik afta. “Ol man Filipin oli bin rere gud inaf blong akseptem gospel,” Elda Lowi i talem. “Taem hed blong famle i jusum blong joenem Jos, long plante, plante taem, ful famle bae i joenem Jos.”5
Jos I Kam Antap
Wok i kam antap kasem we oli oganaesem Filipin Misin long 1967. Long en blong yia ia, i bin gat 3,193 memba long misin, 631 we oli bin konvet long yia ia. Long 1973, Jos long Filipin i bin kam bigwan kolosap i kasem 13,000 memba. Long 20 Mei 1973, oli krietem Manila Filipin Stek, wetem Ogusto A. Lim olsem presiden. Long 1974, oli bin splitim misin, mo kritem Filipin Manila Misin mo Filipin Sebu Siti Misin.
Long Ogis 1975, Presiden Spensa W. Kimbol (1895–1985) i bin kam long Manila blong prisaed long fas eria konfrens blong Filipin. Manis Ogis i bin wan manis blong saeklon, i mekem i had blong travel, speseli blong olgeta we oli kam long nara ples aotsaed long Manila. Wan bas i fulap long Ol Sent blong Laog Siti we kolosap nomo oli nomo save go, be ol Sent oli bin pusum bas ia i kamaot long wan pul blong sofmat, mo askem strong long draeva blong no mas tanem raon i gobak. Wan nara grup blong Ol Sent we oli bin gat strong tingting blong go tru long strong win long solwota blong samples tri dei, from se, olsem wan sista i bin talem, wanem we i moa impoten, hem i blong luk mo lisin long wan profet blong God we i stap laef.
Presiden Kimbol i bin visitim Filipin bakegen long 1980 blong prisaed ova wan nara eria konfrens, mo hem i bin mitim tu presiden Ferdinan Markos blong Filipin blong wan smol taem. Miting ia i bin mekem rod blong Jos, blong sloslo, openem wan misinari trening senta long Filipin long 1983 mo dediketem Manila Filipin Tempol long yia afta. Long 1987 oli bin stanemap Filipin/Maekronesia Eria wetem hedkwota long Manila.
Oli bin transletem Samfala Pat blong Buk blong Momon i go long Tagalog long 1987. Ol translesen blong Buk blong Momon, naoia oli stap long sam nara lanwis blong Filipin, wetem hemia blong Sebuano.
Ol Blesing blong Tempol
Long Disemba 1980, Presiden Spensa W. Kimbol i bin sendem daerekta blong Jos propeti dipatmen long Manila blong faenem wan ples we i gud inaf blong wan tempol. Afta we oli bin lukluk long sam ples, daerekta i bin mekem wan rikwes blong pem 1.4 hekta long Keson Siti. Ples ia yu save luk i go long Marikina Vali, mo i wan ples we i isi blong plante memba blong Jos i save kasem. Oli bin apruvum rikwes ia, mo oli bin pem propeti ia long Jenuware 1981. Oli bin jenisim nem blong rod i go long Tempol Draev folem rikwes blong Jos.
Long graonbreking seremoni long 25 Ogis, 1982, nomata damej we wan strong win i bin mekem, kolosap 2,000 Jos memba i bin kam tugeta long evri pat blong ol aelan tru long bot, tren, mo bas. I no longtaem oli stat blong bildim tempol, mo oli bin dediketem long Ogis 1984.
Kolosap long 27,000 memba mo nonmemba we oli bin tua long tempol bifo oli dediketem. Oli bin kam nomata tu wael win—we wan i kam mo 2 dei afta, narawan i kam—we i bin swip tru long Filipin sam dei bifo. Ol sent we oli kam long ol provins we oli stap longwe, oli bin taed tumas, be oli bin kam wetem glad. Long plante wei oli mas fos nomo blong tekem ol nogud rod blong kasem Manila from ol rod oli bin fulap wetem wota mo ol brij oli brok from reva we i bin ron strong.
Tempol i bin naes tumas we i pulum ae blong ol visita, mo tu, ol man Filipin we oli ol haeman blong kantri ia. Selso Karunungan, wan man blong raet, i bin givim tingting mo raetem se, “yu gat wan filing blong holines, we taem yu go insaed, yu save se bae yu mit wetem Krieta blong yu.” Kolonel Bienvenido Katilo, jif lida blong Filipin Polis, i talem se tempol i “wan ples we yu save luk ol samting blong heven from yu stap long wan ples olsem ia nao.” Tu sista blong Katolik i bin filim se tempol “i wan tru haos blong Lod.” Eva Estrada-Kalao, wan memba blong palemen blong Filipin, i bin talem long ol gaed: “Mi hop bae yufala i save bildim moa tempol long ples ia.”6
Presiden Hinkli, Seken Kaonsela long Fas Presidensi long taem ia, i bin lidim ol seves blong putum konaston long Tiusdei 25 Septemba 1984. Afta long hemia, i bin gat naen dedikesen sesen we i bin tekemples long selestial rum. Samples 6,500 Sent we oli kam long 16 stek mo 22 distrik long Pasifik Eria, oli bin go long sam long ol sesen ia.
Taem oli finisim las sesen we oli bin dediketem tempol, Paulo V. Malit Junia mo Edna A. Yaosona oli bin fas kapol blong kasem mared insaed Manila Filipin Tempol, long 27 Septemba 1984. Fas presiden blong tempol ia, hem i W. Gat Andrus, we i bin mekem mared seremoni ia.
Plante long ol memba blong Jos oli bin laenap blong kasem ol endaomen blong olgeta, stat wetem olgeta we oli wok insaed long tempol. Tempol wok i bin gohed tru long naet go kasem nekis dei.
Ol memba oli bin filim strong tumas blong wantem go insaed long tempol. Olgeta we oli bin stap longwe long Manila, oli mas sakrifaes plante blong travel long longfala rod tru long bot o bas. Be yet, oli bin kam mo karem wetem olgeta ol stori blong fet mo strong tingting.
Blong Benardo mo Leonides Obedosa blong Jeneral Santos, blong go long tempol long Manila we i longwe, hemia i no save hapen. Be semmak olsem bisnis man we i bin go blong salem evri samting we hem i gat blong pem wan perel we praes blong hem i hae (luk long Matiu 13:45–46), kapol ia i bin plan blong salemaot haos blong tufala blong pem trip blong tufala wetem ol pikinini blong tufala, blong oli save sil olsem wan famle we i no save finis. Afta we oli bin salem hom blong olgeta mo plante long ol samting we oli gat, oli bin kasem stret mane we oli nidim blong pem tiket blong bot blong go long Manila blong olgeta naen evriwan long famle. Leonides i bin wari from taem bae oli kambak, bae oli nomo gat haos. Be Benardo i bin talem wetem tras long Leonides se Lod bae i soem rod. Oli bin sil olsem wan famle blong taem naoia mo blong taem we i no save finis long tempol long 1985. Oli no bin mekem sakrifaes ia blong nating, from long tempol oli bin faenem glad we i no gat nara samting i semmak—tufala i faenem perel blong olgeta we i no gat praes. Mo tru long ol toktok blong Benardo, Lod i bin soem rod. Taem oli bin kambak long Manila, ol gudfala fren oli bin givim olgeta ples blong stap. Ol pikinini blong olgeta oli bin finisim skul, mo sloslo, famle ia i bin save gat wan haos blong olgeta long wan niufala ples.
Long 18 Epril 2006, Fas Presidensi i bin anaonsem se bae oli bildim Sebu Siti Filipin Tempol. Taem oli harem nius ia, plante memba blong Jos oli bin krae from oli glad. “Mifala i gat blesing from Lod i bin jusum Sebu Siti blong kam ples blong nekis tempol,” Sisa Peres Junia, daerekta blong Sebu Siti Institiut blong relijin i talem.
Sam manis afta we oli bin dediketem Sebu Siti Filipin Tempol, ol Lata-dei Sent blong Filipin, bakegen oli gat wan gud risen blong oli glad tumas. Long 2 Oktoba 2010, long taem blong fas toktok long jeneral konfrens, Presiden Tomas S. Monson i bin anaonsem blong oli bildim Urdaneta Filipin Tempol, long Paugasinan.
Beswan I Stap Kam Yet
Jos blong Jisas Kraes blong Lata-dei Sent long Filipin i niu komperem wetem ol nara kantri, be risen we hem i save stap long aelan nesen ia hem i spesel tumas. I gud tumas blong luk Jos i stap gro i kam antap, mo beswan i stap kam yet. Elda Maekel Jon U. Te blong Olgeta Seventi, we hem i nambatu man Filipin we oli bin singaotem blong stap olsem wan Jeneral Atoriti, i bin talem: “Mifala [Ol Lata-dei Sent blong Filipin] i nidim blong rere long mifalawan long saed blong spirit moa bitim bifo, from wok ia bae i gohed blong muv i go fored wetem o i no wetem help blong mifala.”7
I tru. Taem we 21 senturi i stap kam, Jos ia we i kambak bae i gohed blong gro i kam bigwan long saes mo long paoa taem we moa pipol blong Filipin oli akseptem mesej blong hem mo kam wan blesing long ol spesel pipol ia long ol aelan blong solwota. Blong Elda Te mo ol Sent blong Filipin, “ol gudfala … promes blong Lod i go long olgeta we oli stap long ol aelan blong solwota” (2 Nifae 10:21) naoia i kamtru.
Jos Membasip blong Filipin i Gro i Kam Antap
1967: 3,193
1970: 13,000
1980: 17,424
1990: 237,000
2000: 373,000
2012: 661,598