“!Hemia i Isi Tumas Bubuman!”
I Kam long wan toktok blong jeneral konferens blong Epril 2013.
“Yufala i stap luklukgud long ol tok blong Baebol, mo yufala i bilif long ol tok blong hem, yufala i gat laef we i no save finis. !Be yufala i luk! Ol tok blong Baebol ya oli stap tokbaot mi, be yufala i no wantem kam long mi blong kasem laef ya long mi” (Jon 5:39).
Mi lavem Buk blong Momon mo Sevya blong mi, Jisas Kraes. Wan dei, mi askem apugel blong mi Rakel wanem tingting blong hem abaot putum wan gol blong ridim Buk blong Momon. Rakel i jes lanem nomo olsem wanem blong rid.
Hem i talem: “Be Bubuman, hem i had tumas. Hem i wan big buk.”
Afta, mi askem hem blong ridim wan pej long mi. Mi bin tekemaot wan stopwatj mo taemem hem. I bin tekem hem tri minit nomo blong ridim pej ia.
Yumi ridim Buk blong Momon long lanwis Spein, mo vesen blong Spein blong Buk blong Momon i gat 642 pej. Mi bin talem hem se bae i tekem hem 1,926 minit blong ridim ful buk ia.
Hemia i jes mekem se hem i fraet moa, mekem se mi divaedem namba ia long 60 minit. Mi bin talem long hem se bae hem i nidim 32 aoa blong ridim buk ia. !Hemia bae i no bitim wan haf dei!
Afta hem i talem long mi, “!Hemia i isi tumas, Bubuman!”
I bin tekem Rakel, brata blong hem, Esteban, mo ol nara apu pikinini blong mifala, smol moa taem blong ridim Buk blong Momon. Hemia from taem yumi ridim, yumi nidim blong tekem taem blong prea mo tingbaot wanem we yumi bin ridim.
Semmak olsem Rakel mo Esteban, yumi evriwan yumi save lanem blong lavem olgeta skripja. Afta wanwan long yumi i save talem: “!Mi traem ol tok blong yu, mi harem i swit gud! !Hem i swit we i swit, i winim hani!” (Ol Sam 119:103).