Yusum Plan blong Fasin blong Sevem Man blong Ansarem Ol Kwestin
Taem yumi o ol narafala man i gat ol kwestin abaot gospel blong Jisas Kraes, ?yumi save wea blong faenem ol ansa?
Yumi stap laef blong wan taem we i fulap long plante samting. Gospel blong Jisas Kraes we i kambak i stap kam “kamaot long tudak” (luk long D&C 1:30). Olsem risal, moa pikinini blong Papa long Heven we oli no blong fet blong yumi oli stap harem abaot “Ol Momon.” Sam oli harem ol samting we oli defren mo i mekem tingting blong olgeta i fasfas. Ol nara man oli harem ol samting we oli filim save finis mo i givim kamfot. Wanwan long eni grup bae i save kam long yumi blong lukaotem ol ansa long ol kwestin blong olgeta. Plante long ol ansa oli stap long plan blong fasin blong sevem man, we yumi save long hem tu olsem “bigfala plan blong glad” (Alma 42:8).
Ol kwestin we oli askem moa oli “?Mi kam wea?” “?From wanem mi stap ia?” mo “?Afta mi ded, bae mi go wea?” Evri kwestin ia, oli save ansarem tru long ol trutok we oli stap long plan blong fasin blong sevem man. Stori ia i givim sam long ol ansa we ol skripja mo profet blong yumi, Presiden Tomas S. Monson, i bin givim abaot ol kwestin ia.
?Mi kam Wea?
Yumi ol man we i no save finis. Yumi bin stap wetem God bifo laef ia olsem spirit pikinini blong Hem. “Aposol Pol i bin [tijim] se ‘yumi pikinini blong God’ [Ol Wok 17:29],” Presiden Monson i talem. “From se yumi save se bodi blong yumi blong mit mo bun i soem se yumi kamaot long papa mo mama blong yumi long wol ia, yumi mas lukaotem mining blong toktok blong Pol. Lod i bin talemaot se spirit mo bodi i sol blong man [luk long D&C 88:15]. From hemia, hem i spirit we i kam long God. Man we i raetem Hibrus i yusum Hem we i ‘Papa blong ol spirit’ [Hibrus 12:9].”1
?From wanem mi stap ia?
Long saed blong laef blong yumi long wol, Presiden Monson i talem: “Yumi mas talem tangkyu from wan waes man we i krietem wan naes wol mo i putum yumi long hem, wetem wan vel blong fogetem evri samting abaot laef blong yumi bifo blong mekem se yumi save eksperiensem wan taem blong tes, wan janis blong pruvum yumiwan blong save kwalifae from evri samting we God i bin rere long hem blong yumi kasem.
“I klia, se wan fas stamba tingting blong stap long wol ia i blong kasem wan bodi blong mit mo bun. Yumi bin kasem tu presen ia blong save mekem joes. Long plante wei, yumi gat bigfala janis blong save mekem joes blong yumiwan. Long ples ia, yumi lanem tru long ol hadtaem we yumi eksperiensem wanwan. Yumi luksave samting we i gud mo samting we i nogud. Yumi save talem wanem i defren olsem samting we i konkon mo samting we i swit. Yumi faenemaot se i gat ol risal long ol samting we yumi mekem.”2
?Afta mi ded, bae mi go wea?
Ded i kam long evri memba blong famle blong man long wol. Be “sapos wan man i ded, ?bae hem i laef bakegen?” (Job 14:14). “Yumi save se ded i no en blong ol samting,” Presiden Monson i talem. “Trutok ia, oli bin tijim tru long ol profet we oli bin stap laef truaot ol taem. Yu save faenem tu insaed ol tabu skripja. Long Buk blong Momon, yumi ridim sam toktok we oli spesel mo i givim kamfot:
‘Nao, long saed blong ples blong ol sol bitwin ded mo laef bakegen—Luk, wan enjel i bin talem long mi, se ol spirit blong evri man, taem we oli bin aot long bodi ia blong wol, yes, ol spirit blong evri man, sapos oli gud o nogud, bae oli gobak long God we i bin givim laef long olgeta.
‘Mo afta bae i kam blong hapen se, ol spirit blong olgeta we oli stret bae oli kasem wan ples blong glad, we oli singaotem paradaes, wan ples blong spel, wan ples blong pis, long ples ia bae oli spel long ol trabol mo ol wari, mo ol harem nogud blong olgeta’ (Alma 40:11–12).”3
Afta we yumi laef bakegen long ded, yumi go long selestial glori we i olsem san, terestrial kingdom wetem glori we i olsem mun, o telestial kingdom wetem glori we i olsem ol sta o go long ples we i tudak (luk long D&C 76).
?I tru se i gat wan God? ?Setan i ril?
Papa long Heven, Jisas Kraes, mo Setan, evriwan oli bin pat blong bigfala Kaonsel long Heven we i bin hapen bifo yumi bon. Olsem pat blong plan blong fasin blong sevem man, Papa long Heven i bin askem blong wan i go long wol mo pem praes from ol sin blong yumi. Hem i askem huia bae Hem i sendem (blong kam long wol mo ded from ol sin blong yumi). Mo Jisas Kraes i bin ansa mo talem se Papa long Heven i mas sendem Hem. Mo Setan i bin ansa mo talem se Papa long Heven i mas sendem hem. Mo Papa long Heven i talem se bae Hem i sendem faswan we i bin ansarem Hem.
Mo Setan i bin kros, mo hem i no bin obei long laef bifo laef long wol ia. Mo long taem ia, plante oli bin folem hem (luk long Abraham 3:27–28; luk tu long D&C 29:36–37; Moses 4:1–4).
?Yumi gat paoa, o no, blong stopem ol temtesen blong Setan?
Wan grup ia aot long tri blong ol spirit we oli bin jusum blong folem Setan afta long Kaonsel long Heven, God bin sakemaot olgeta wetem Setan. Olgeta wetem Setan oli stap nomo olsem ol spirit, mo no gat bodi blong mit mo bun. Profet Josef Smit i bin tijim: “Evri man long wol we oli gat bodi, oli gat paoa bitim olgeta we oli no gat bodi.”4 From hemia, Setan i save temtem yumi, be yumi gat paoa blong stanap agensem hem.
?From wanem samtaem i luk olsem se Papa long Heven i no ansarem ol prea blong mi?
“Prea i wan aksen we tingting blong Papa i joen tugeta wetem tingting blong pikinini. Tingting blong prea i no blong jenisim tingting blong God” (Bible Dictionary, “Prayer”). Prea i wan tul we i helpem yumi blong disaed sapos yumi wantem yusum fridom blong joes blong stretem tingting blong yumi wetem tingting blong God (luk long Abraham 3:25). Papa long Heven, oltaem, Hem i ansarem ol prea blong yumi, be ol ansa ia oli save kam taem Hem i talem yes, no, o no yet. Taem i impoten.
?From wanem mi gat ol jalenj taem mi stap traehad blong laef long wan gud laef?
Ol jalenj oli pat blong plan blong fasin blong sevem man. Oli mekem yumi moa strong, kam moa gud, mo kam moa klin taem yumi dipen long Jisas Kraes mo gospel blong Hem. Papa long Heven i sastenem yumi long ol taem blong ol jalenj blong yumi. Ol tes blong yumi bae oli givim yumi eksperiens, mo hem i blong gud blong yumi (luk long D&C 122:7).
?Olsem wanem bae mi save wanem i raet mo wanem i rong?
Evri pikinini blong God oli bon wetem laet blong Kraes, mo hemia i helpem yumi blong save gat “save long samting we i gud aot long samting we i nogud” (Moronae 7:16). Antap long hemia, Tabu Spirit i save stap olsem witnes long yumi abaot trutok long maen mo hat blong yumi wetem ol filing blong pis mo kamfot (luk long D&C 8:2–3).
?Mi save kasem fogivnes nomata sapos mi mekem ol sin we oli bigwan?
God i bin save se yumi evriwan bae i sin taem yumi lanem blong jusum bitwin raet mo rong.5 Be evri sin, i gat panismen we i go wetem. Jastis i askem se panismen i mas hapen. Long sore blong Hem, Papa long Heven i letem Jisas Kraes blong mekem Atonmen mo ansarem wanem jastis i wantem blong yumi evriwan (luk long Alma 42). Long nara toktok, safaring blong Kraes long Getsemane mo ded blong Hem long Golgota i bin pem praes blong evri sin blong yumi sapos yumi akseptem Atonmen blong Kraes taem yumi stap sakem sin mo kasem ol odinens blong gospel. Bae Hem i fogivim ol sin blong yumi (luk long D&C 1:31–32).