Sapos Ae blong Yu I Stap Nomo long Glori blong Mi
Katrin Nelson i stap long Yuta, YSA. Haidi MakKonki i stap long Delawea, YSA.
?Olsem wanem taem yumi yusum stret lanwis, stret fasin, mo luk naes long laef blong yumi i helpem yumi blong soem laet blong God, mo givim glori long God?
Long Bigfala Kaonsel long laef bifo laef long wol ia, hemia long Heven, taem Jisas Kraes i bin volontia blong kam Sevya blong yumi, Hem i bin talem long Papa se tingting blong Hem (blong Papa) i mas hapen, mo glori bae i blong Papa blong oltaem” (luk long Moses 4:2).
Oltaem Lod i setem eksampol blong stap givim glori long Papa. Long taem blong seves blong Hem long wol, Sevya i neva pulum tingting blong man i go long Hemwan bakegen, be i poenem Papa blong Hem long olgeta we oli stap folem Hem, mo stap tijim: “Man we i bilif long mi, hem i no bilif long mi nomo, hem i bilif long God we hem i sendem mi mi kam” (Jon 12:44). Tru ol fasin blong Hem, dresap mo lukluk blong Hem, ol toktok mo wok blong Hem, Sevya i bin tijim yumi abaot olsem wanem fasin blong gud fasin i impoten.
Tru long taem we oli bin givim blong folem Sevya, ol yang adalt we oli bin kwotem olgeta long stori ia, oli soem fasin blong olgeta insaed mo aotsaed long saed blong gud fasin mo serem olsem wanem komitmen blong olgeta blong givim glori long God i bin jenisim fasin blong olgeta, mo lidim ol aksen blong olgeta.
Givim Glori long God mo Givimaot Laet
Yumi luksave moa gud olsem wanem gud fasin i givim glori long God taem yumi andastanem wanem ia gud fasin i minim tru. Stap Tru long Fet i eksplenem: “Fasin blong Gud Dresap i wan fasin we i soem tingtingblong yu we i stap daon mo soem we yu gat respek long fasin blong dresap, blong lukaotem bodi blong yu, fasin blong toktok, mo long aksen blong yu. Sapos yu gat fasin blong gud dresap, bae yu no save pulum ae blong man i kam long yu. Sapos yu gat gud fasin, yu no stap mekem se ol man oli lukluk nogud long yu. Be, yu lukaotem blong ‘yusum bodi blong [yu] blong leftemap nem blong hem’ (Fas Korin 6:20).”1
Taem yumi lanem blong soem gud fasin olsem we Sevya i bin mekem, yumi welkamem Spirit i kam long laef blong yumi, mo stap mekem promes ia i hapen se, sapos ae blong yumi oli stap nomo long glori blong [God], bae ful bodi blong yumi i fulap long laet (luk long D&C 88:67). Taem yu stap ridim olsem wanem ol nara yang adalt oli andastanem wanem i gud fasin, yu save tingting long olsem wanem blong mekem laet blong yuwan i saen strong moa long saed blong spirit tru ol samting we bae yu stretem blong kam antap long komitmen blong yu insaed i go kasem olsem wanem yu soemaot gud fasin aotsaed.
Gat Gud Fasin long saed blong Lanwis mo Aksen
“Ol toktok blong yu mo aksen i save mekem wan bigfala samting long yu mo ol narafala man. Toktok long wan wei we i klin, i no agens, mo lanwis we i leftemap tingting, mo tru long ol aksen we i mekem olgeta raonabaot long yu oli glad. Traehad blong yu blong gat gud fasin long saed blong toktok mo aksen i mekem se Tabu Spirit i save lidim mo kamfotem yu moa.”2
Darja Sejivna Svidko blong Volograd, Rasia, i eksplenem se yumi gat gud fasin long ol toktok blong yumi taem yumi tritim ol narafala man wetem respek mo yusum “sopsop voes mo yumi yusum kwaet fasin blong talemaot tingting blong yumi mo no yusum ol swea o ol toktok we oli no stret.” Gud fasin long toktok hem i no gat fasin blong gosip, jik, spolem man, mo talem nogud man. Hem i neva putum daon ol nara man o i leftemap yuwan; be hem i soem fasin blong stap kaen mo i luksave hamas evri pikinini blong Papa long Heven oli tabu.
Ol toktok blong yumi, i mas soem respek tu long Godhed: “Stopem ol rabis toktok mo toktok olbaot, we i no gat respek blong yusum nem blong Lod, we wol ia i stap yusum oltaem. … Kaen lanwis olsem we i no gat respek … i mekem yumi no save filim long kwaet toktok we i kam long Tabu Spirit.”3
Semmak olsem we ol rabis toktok, olsem tokbaot man mo spolem man, i save damejem ol rilesensip, ol klin toktok oli save statem wan dip komitmen long God mo, olsem Keli Pru blong Yuta, YSA, i eksplenem, “i gat moa paoa blong bildim ol gud rilesensip wetem ol nara man. Ol klin toktok blong yumi i helpem yumi karem i kam wanem we i moa gud we i stap long ol nara man.”
Gud fasin long lanwis mo gud fasin long aksen i wok tugeta. “Hem i impoten blong gat klin lanwis mo fasin, from hem i soem huia yu mo wanem valiu blong yu,” Maek Olsen blong Yuta i talem. Pipol i luksave taem ol toktok mo aksen i no semmak, i no go tugeta. Lanwis blong yumi we i tajem ol narafala man mo givim glori long God, i mas kam wetem ol gudfala aksen. Tru long ol aksen blong seves mo fasin blong stap kaen, yumi soem se komitmen blong yumi blong leftemap ol narafala man mo givim ona long God, i moa strong bitim ol toktok blong yumi. Eksampol blong yumi blong stap wan disaepol, long toktok mo wok, i save stap olsem wan paoa blong mekem gud samting.
“Mi laekem tumas blong gat gud fasin long aksen mo toktok,” Kari Kalson blong Kolorado, YSA i talem. “I gat wan gud samting long wan man we i gat tingting i stap daon, mo i no stap mekem ol samting wetem tingting blong pulum ae blong ol man. Olgeta we oli toktok long gud fasin, oli kam ol strong pipol blong talemaot toktok blong Lod.”
Gat Gud Fasin long Fasin blong Dresap mo Olsem Wanem Yu Luk
“Fasin blong dresap gud i help blong soemaot ol bes samting we i stap long yumi taem i helpem yumi blong lukluk moa long saed blong spirit, be i no blong lukluk moa long man we i stap folem fasin blong wol,” Pol Kev blong Yuta i talem. Tru long fasin blong dresap gud, yumi leftemap tingting blong ol nara man blong kam blong save yumi mo talem tangkyu from yumi mo fasin blong yumi, be i no long olsem wanem yumi luk.
Wei we yumi dresap long hem i no givim wan saen nomo long ol nara man long olsem wanem oli mas tritim yumi, be hem i tajem yumi tu long wei we yumi stap lukluk yumiwan mo olsem wanem yumi stap tritim yumiwan. “Yumi lanem aot long gospel se bodi blong yumi i wan presen we i kam long God,” Luis Da Krus Junia blong Brasil i talem. “Bodi blong yumi i helpem yumi progres mo kam olsem we Papa blong yumi i stap. From risen ia, hem i impoten blong dresap gud. Taem yumi mekem olsem, yumi soem long God mo long ol nara man se yumi gat respek from presen ia mo respek long ol nara man.”4
Keri i eksplenem: “Fasin blong no dresap gud i stap soem se bodi i olsem wan tul we yumi save luk we i defren long wan spirit we i gat fasin mo tingting. Blong stap klin, nomata i mekem mi spendem moa mane samtaem, mo long en, i yusum plante taem, i helpem mi blong save se bodi blong mi hem i wan tul blong wan spesel spirit wetem tabu paoa mo fiuja, i wan ia nomo, mo papa mo mama long Heven i bin lukaotem. I nidim blong kea moa long hem mo respektem moa bitim wanem we wol bae i givim.”
Stap Tru long Fet i tijim: “Antap long wei blong no werem ol klos we i stap soemaotbodi, yu mas lego tu fasin blong stap mekmekem yu i go tumas, hemia long saed blong klos, long saed blong wei we yu mekem fes mo bodi blong yu, mo long saed blong mekem heastael blong yu. Long dresap, mekem gud yu, mo ol fasin, oltaem stap gud mo klin, neva les o jenis olbaot we i no stret.”5 Long wei we yumi jenis mo soem yumiwan, yumi stap soem respek blong God, blong yumiwan, mo blong ol narawan.
Komit blong Mekem Sem Samting Oltaem
Taem yumi traem blong folem ol gospel standet blong klin fasin, yumi soem komitmen blong yumi blong mekem sem samting oltaem, taem folem ol komanmen blong Lod evri taem bitim we yu mekem long tingting mo taem blong yu nomo.
Tru komitmen, oltaem i kamaot long ol gospel prinsipol. Antoni Robets blong Yuta i eksplenem, “Klin fasin i stat wetem maen, wan tingting blong mekem samting evri dei blong andastanem gospel mo plan blong fasin blong sevem man.” Taem yumi laef fulwan long gospel, fasin blong yumi blong jenis i save kam moa antap mo i mekem yumi wantem laef moa folem ol gospel prinsipol.
Andastanem Tabu Fasin blong Yu
Praktisim klin fasin oltaem, i helpem yumi andastanem mo talem tangkyu from yumi ol pikinini blong papa mo mama long Heven, mo save we yumi gat long tabu fasin we i save givim yumi insperesen blong kam moa klin. Rafaela Ferini blong Forens, Itali, i eksplenem, “Klin fasin i blesem laef blong mi from i helpem mi filim olsem wan spesel gel blong Papa blong mi long Heven, mo we save ia, olsem ansa, i mekem mi wantem blong stap klin.”
Stap letem wol i save huia yumi, i save spolem tras we yumi gat long yumiwan. Juliana Ona blong Yuta i tokbaot eksperiens blong hem: “Bifo mi kasem wan testemoni blong prinsipol blong klin fasin, mi bin stap long wan ples we i no hapi mo i no sef long saed blong spirit. Stap lego wol i talemaot huia mi, i mekem wan i harem nogud, mo i spolem hem long saed blong spirit from wol i wantem mekem ol rabis samting long saed blong laef, mo bodi. Taem mi disaed wantaem blong no lisin long wol mo letem rilesensip blong mi wetem God i talemaot huia mi, i mekem se laef i kam moa isi, i moa fri, mo i moa hapi.” Taem yumi lukaotem apruvol blong Papa long Heven be i no blong wol, bae yumi faenem moa glad long laef blong yumi mo wantem mekem moa blong stap klin.
Laef long wan Laef we i Klin
“Klin fasin i kamaot strong long evri samting we yumi mekem: ol toktok blong yumi, olsem wanem yumi luk aotsaed, fasin blong yumi, mo tu ol ples we yumi visitim,” Galina Viktorovna Savjuk blong Novosibesk, Rasia i talem. Klin wei blong laef i hapen moa taem yumi komitim yumi long gospel mo rilesensip blong yumi wetem God.
Tru fasin blong stap klin i tekem tugeta fasin mo aksen blong yumi. Stap wok blong impruvum fasin blong yumi o ol maen blong yumi bae i impruvum narawan. Stap klin long fasin blong yumi mo olsem wanem yumi luk, mo no developem wan longtaem komitmen, i stopem yumi blong kasem ol ful blesing blong stap laef gud. Mo stap biliv long yumiwan blong stap ol gud pipol mo no folem gud fasin ia wetem ol aksen blong yumi, i mekem yumi giaman long yumiwan.6
Long mining blong gud fasin, blong talem se ol ae blong yumi i stap nomo long glori blong God i minim se yumi stap komitim yumi blong laef long gud fasin hemia insaed mo aotsaed long laef blong yumi. Jes olsem ae i mas lukluk i go long God, olsem wanem yumi luk aotsaed mo ol aksen blong yumi i mas semmak oltaem wetem ol prinsipol blong gud fasin. Be tru long fasin blong tanem ae i go long God i no mekem se ae i stap nomo long glori blong Hem; I mas stap long Hem nomo. Semmak, fasin blong dresap gud mo luk naes i mas kam folem wan lukluk we i stap long ol prinsipol we i no save finis.
Taem yumi putum ae blong yumi long God, bae yumi save gat wan moa gud visin long Hem. Semmak, taem yumi putum lukluk blong yumi long God, ol ae blong yumi bae i go stret long Hem.
Taem yumi traehad blong stap laef klin, bae yumi filim paoa blong Spirit i kam antap long ol laef blong yumi. Elda Robet D. Hels blong Kworom blong Olgeta Twelef Aposol i bin tijim: “Gud fasin i wanem yumi nidim faswan blong stap klin inaf blong save gat Spirit. Blong gat gud fasin hem i blong gat tingting i stap daon, mo gat tingting we i stap daon, i invaetem Spirit blong i stap wetem yumi.”7 Wetem Spirit we i lidim ol tingting mo aksen blong yumi, i mekem se ol ae blong yumi i save stap mo long glori blong God mo bae yumi fulap long laet.