Folem Profet
I kam long wan Jos Edukesen Sistem divosen we i bin kamaot long Brigham Yang Yunivesiti—Aedaho long 5 Mei 2013. Blong ful toktok long, visitim lds.org/broadcasts.
Taem yumi folem profet ia mo traem blong kam moa olsem hem, bae yumi kam ol fetful disaepol blong Lod Jisas Kraes.
Sam yia i pas, jes bifo long jeneral konfrens, Presiden Monson i tijim wan nara naes lesen. Taem ia i go long Ol Jeneral Atoriti we oli kam tugeta, we oli bin travel i kam long Sol Lek Siti, plante oli kam long ol ples raon long wol we oli stap olsem ol Presiden blong ol eria ia. Mifala i kam tugeta blong kasem instraksen long Fas Presidensi mo long Olgeta Twelef.
Taem taem blong miting i stap kam kolosap, evriwan i bin stap be Presiden Monson nomo i no kam yet. Sam minit bifo miting i stat, mifala i stop blong toktok long mifala mo sidaon kwaet mo stap lisin long miusik—mo ting se bae profet i kam long eni taem.
Mifala i wet kasem taem 9 klok i pas. Wan man i wokbaot i kam long saed blong doa—i blong jek nomo sapos wan man i nidim eni help. Taem hem i kambak bakegen long rum, hem i talem long mifala se: “Presiden Monson bae i joenem yufala i no longtaem.”
15 minit afta we miting i sapos blong stat, Presiden Monson i kam insaed. Blong soem respek, mifala evriwan i stanap taem hem i kam insaed. Mifala i glad tumas blong luk hem mo luk se hem i oraet. I no gat wan samting we i soem se i gat wan risen from wanem hem i kam let.
Presiden Monson i go stret long pulpit mo talem: “Ol brata, mi sore blong kam let, be waef blong mi i nidim mi long moning ia.”
Mi bin sapraes tumas mo gat tingting i we i stap daon. Mi no save stop blong tingbaot toktok blong hem.
Hem i bin wan impoten miting. Evri bigfala lida blong Jos oli bin stap, be Presiden Monson i soem wan eksampol long mifala evriwan. Waef blong hem i nidim hem, mo hem i tekem taem blong lukaotgud long hem. Hemia i bin wan bigfala toktok. Mi no save tingbaot ol samting we oli tokbaot long dei ia, be mi tingbaot toktok ia: “Waef blong mi i nidim mi.”
Stap Folem Eksampol blong Profet
Mi wantem tokbaot 5 wei we bae yumi save folem eksampol blong Presiden Monson.
1. Yumi save lukluk long gud saed, mo yumi save stap hapi.
Long Perel we I Gat Bigfala Praes, Profet Josef Smit i tokbaot blong gat fes we i hapi oltaem (luk long Joseph Smith—History 1:28). Hemia i tokbaot tu Presiden Monson. Hem i oltaem gat wan hapi fes.
Long wan taem Presiden Monson i talem: “Yumi … save jusum blong gat oltaem wan fasin blong lukluk long gud saed. Yumi no save daerektem win, be yumi save stretem gud ol sel. Long nara toktok, yumi save jusum blong stap hapi mo lukluk long gud saed, i nomata wanem i kam krosem rod blong yumi.”1
Wan dei mi stap sidaon aotsaed long rum blong Fas Presidensi. Mi bin kasem invitesen blong go longwe blong pat long wan miting abaot ol tempol. Mi sidaon kwaet aotsaed long rum ia, miwan. Mi stap tingting se Fas Presidensi i statem miting ia finis mo bae wan bae i kam talem blong mi joenem olgeta.
Taem mi stap sidaon mi save harem wan i stap wokbaot i kam mo i stap wisel. Mi stap tingting se: “Wan man i no andastanem stret fasin blong wok. Yu no save wokbaot raon long ofis blong Presiden blong Jos mo miting rum blong Fas Presidensi mo stap wisel.”
Smol taem afta, man we i stap wisel ia i kam raon long kona—man ia i Presiden Monson. Hem i hapi, mo i fulap long ol gudfala tingting. Hem i gritim mi mo talem: “Ating bae yumi statem miting ia i no longtaem.”
Iven wetem evri wok blong ful Jos i stap long solda blong hem, be hem i wan eksampol blong stap glad mo hem i gat gud fasin oltaem. Yumi mas stap olsem ia nao.
2. Yumi save stap kaen mo soem lav long ol pikinini
Jisas i tokbaot plante ol pikinini. Profet blong Hem, Presiden Monson, i tokbaot plante ol pikinini tu. Mi luk hemia long taem blong dedikesen blong ol tempol mo, tru long eksampol blong hem, i tijim yumi hao yumi mas tritim olgeta. Long evri dedikesen blong tempol bae hem i oltaem lukluk long ol pikinini. Hem i lavem blong mekem olgeta tu oli pat blong konaston seremoni mo oltaem hem i invaetem sam long olgeta blong putum simen long ol pos blong tempol blong soem se tempol i finis. Hem i mekem olgeta i glad from. Hemi wan taem we bae oli neva fogetem. Oltaem, hem i gat wan big smael blong olgeta. Hem i leftemap tingting blong olgeta mo presem olgeta. Hem i wan gudfala samting blong luk.
Hem i stap gritim ol man wetem hae faef, muvmuvum sora, mo leftemap tingting blong go long misin mo mared long tempol.
Sam yia i pas, Presiden Monson i stap go long dedikesen blong Okir Maonten Tempol long betdei blong hem. Taem hem i kasem tempol mo stap wokbaot i go long doa long fored blong tempol, wan grup blong ol yangfala i stap tugeta. Oli save se hem i dei we Presiden Monson i bon long hem, afta oli stat blong singsing “Hapi bedei” long hem. Hem i stop mo i fesem olgeta wetem bigfala smael long fes blong hem. Hem i stat blong muvum han blong hem, olsem se hem i stap lidim singsing. Long en oli ademap toktok ia “Mo plante moa.” Hem i talem long mi: “hemia nao pat we mi laekem moa.”
Ol pikinini mo ol yangfala blong Jos oli lavem hem, mo mi stap ting se i from oli no gat tu tingting we hem i lavem olgeta tu.
3. Yumi save folem smol voes blong Spirit.
Presiden Monson i givim hem fulwan long Lod mo komitim hem blong oltaem folem smol voes blong Spirit we profet hemwan i bin talem i naes long ol toktok ia: “Swit eksperiens we mi save long laef i blong filim Spirit mo mekem wanem i talem, mo afta faenemaot we hem i ansa blong prea blong wan o nid blong wan. Mo oltaem mi wantem Lod blong save se sapos mi nidim wan wokman, Tom Monson bae i wokman blong hem.”2
Hemia nao i rod we wanwan long yumi i mas wantem blong folem.
4. Yumi save lavem tempol.
Presiden Monson bae i stap long histri olsem wan long ol man blong bildim tempol long histri blong Jos. Stat long taem we hem i kam Presiden blong Jos long Febware 2008, hem i gohed blong mekem bigfala wok ia blong bildim ol tempol. Long ol sikis yia we hem i bin stap olsem profet, Presiden Monson i anaonsem blong oli bildim 33 niu tempol.
Presiden Monson i talem: “Bae wanwan long yumi i laef klin, wetem ol klin han mo klin hat, blong mekem se tempol i save tajem laef blong yumi mo famle blong yumi.”3
Afta hem i talem naesfala promes ia: “Taem yumi lavem tempol, tajem tempol, mo go long tempol, laef blong yumi bae i soem fet blong yumi. Taem yumi kam long ol tabu haos ia blong God, taem yumi tingbaot ol promes we yumi mekem insaed, bae yumi go tru long evri jalenj mo save winim wanwan temtesen”4
Bae yumi folem rod ia we profet we i bin putum i stap blong yumi lavem tempol.
5. Yumi save stap kaen, tingting long ol narafala man, mo lavem ol narafala man.
Presiden Monson i wan gudfala eksampol blong lavem ol narafala man. Ful seves blong hem i fulap wetem ol visit long ol hom, putum han long hed mo givim blesing, mekem ol telefon kol jes blong givim kamfot mo leftemap tingting, sendem ol leta blong tangkyu mo glad hat, visitim ol hospital mo ol ples blong lukaot long ol olfala, mo faenem taem blong go long ol fenerol mo taem blong givim respek long dedman, nating we hem i stap bisi.
Olsem we Sevya bae i mekem, Tomas S. Monson i bin go aot mo mekem gud, (luk long Ol Wok 10:38) mo i blesem mo i lavem ol narafala man; hemia i paoa we i stap stiarem laef blong hem.
Wan long ol gudfala eksampol blong fasin blong Presiden Monson we i kaen, i hapen long 2012. Taem we tempol blong Brigham Siti Yuta Tempol i stap kam blong finis nao, mi mit wetem Fas Presidensi blong tokbaot ol plan blong dedikesen blong tempol. Wetem Brigham Siti we i wan aoa long Not blong Sol Lek Siti, bae i isi long Presiden Monson blong go longwe from dedikesen.
Be, Presiden Monson i talem se: “Brigham Siti i hom taon blong Presiden Boed K. Peka, gudfala Aposol ia we i sidaon wetem mi blong plante yia long Olgeta Twelef. Mi wantem hem blong gat ona mo blesing ia blong dediketem tempol long hom taon blong hem. Bae mi stap ia mo bae mi givim wok ia long Presiden Peka blong go dediketem Brigham Siti Tempol. Mi wantem hemia bae i dei blong hem.”
Hem i wan naesfala dei blong Presiden Peka mo Sista Peka, we i groap tu long Brigham Siti. I tajem mi bigwan taem Presiden Monson i soem kaen mo gud fasin long Aposol fren blong hem. Yumi evriwan i save stap olsem. Yumi save serem mo stap kaen mo no tingting long yumiwan tumas, be tingbaot moa olgeta raon long yumi.
Paten blong wan Profet
Presiden Monson i tijim yumi stret wei blong laef wetem ol naesfala mo mesej we oli kam tru long insperesen long taem blong jeneral konfrens. Hem i tijim yumi olsem wanem blong kam ol man blong Jisas Kraes tru long ol naesfala mo gudfala eksampol blong hem. I tru nomo, se Lod i givim yumi wan rod long saed blong evri samting, mo wan long ol rod ia we yumi stap luklukgud blong folem hem i profet we yumi lavem tumas.
Mi testifae se i gat wan God long heven we i save yumi mo lavem yumi. Hem i givim yumi wan profet—blong gaedem yumi, blong tijim yumi, mo blong lidim yumi long ol las dei ia. Mi biliv se Lod i wantem yumi blong lavem profet, blong sastenem hem, mo blong folem eksampol blong hem.
Mi kaontem olsem wan bigfala blesing blong stap laef long dei ia blong Presiden Tomas S. Monson i we i profet blong Lod. Taem yumi folem profet ia mo traem blong kam moa olsem hem, bae yumi kam ol fetful disaepol blong Lod Jisas Kraes.