?Olsem Wanem Oli bin Save?
Gel Askroft, Arisona, YSA
Presiden Dita F. Ukdof, Seken Kaonsela long Fas Presidensi, i bin givim wan mesej long Rilif Sosaeti sista long taem blong jeneral Rilif Sosaeti miting 2011 we i bin tajem hat blong mi mo i bin givim mi pis. Hem i bin tokbaot wan tintin flaoa we oli singaotem nofogetem mi mo olsem wanem ol faef lif blong hem i ripresentem faef samting we yumi mas tingbaot oltaem.1
Afta long miting, gel blong mi Alisa i bin talem long mi wan stori abaot fren blong hem Jesi, we i gat wan smol bisnis blong mekem kakae. Ol Rilif Sosaeti lida blong Jesi i bin askem hem blong mekem wan deset blong olgeta afta long jeneral Rilif Sosaeti miting. Jesi i bin talem long Alisa se semtaem ia hem i bin save finis wanem blong mekem—250 kapkek. Alisa i glad blong helpem hem tekem ol kapkek ia i go long stek senta.
Dei blong miting i kam, mo taem Alisa i bin go blong help, hem i luk se Jesi i wantem krae. Ol kapkek oli bin rere, be Jesi i bin sendem wan pikja blong ol kapkek ia i go long wan famle we i talem se ol kapkek ia oli no naes inaf blong miting ia.
Jesi i stat blong gat tu tingting long wok blong hem. Long en hem i ting se stek Rilif Sosaeti lida bae oli wantem wan samting we i moa gud bitim ol simpol kapkek blong hem. Hem i bin traem blong hariap blong faenem wan wei blong mekem gud bakegen ol kapkek ia, be i nogat taem. Hem mo Alisa i bin tekem ol kapkek ia olsem we olai stap, wetem filing ia we Jesi i gat se hem i no bin mekem wan wan samting gud blong ol sista—kasem taem we Presiden Ukdof i bin toktok.
Taem hem i bin toktok abaot tintin No Foget Mi flaoa, wan pikja blong smol blu flaoa ia i kamaot long skin. Hem i bin wan smol simpool flaoa be i naes tumas wetem ol naes lif blong hem. Mesej blong Presiden Ukdof i bin tajem hat blong evriwan taem hem i bin askem strong long yumi blong no lus long medel blong ol bigfala samting we i stap raon long yumi we i mekem yumi save fogetem ol faef simpol, be impoten trutok we hem i bin stap tijim yumi.
Afta long las prea, ol sista oli muv i go long aktiviti rum. Taem Alisa mo Jesi i wokbaot i go insaed, tufala i luk se evriwan i stap raon long tebol blong kapkek ia mo stap askem “?Olsem wanem oli bin save?”
Wanwan kapkek oli bin putum waet aesing nomo long hem mo flasem wetem wan simpol, naes, mo swit faef lif no foget mi flaoa.