Pagkahimong Mas Maayo nga mga Santos pinaagi sa Pakig-alayon sa Laing Tinuohan
Ang tagsulat nagpuyo sa Utah, USA.
Kon kita moserbisyo kauban ang laing mga tinuohan, wala lang nato matukod atong mga komunidad ug mapalambo atong relasyon apan kita mismo nahimong mas maayong mga disipulo.
Kanunay nagtawag ang mga lider sa Simbahan sa mga miyembro nga makig-alayon sa mga matinuoron og kasingkasing—bisan unsa pa may tinuohan—sa pagserbisyo ug sa kawsa sa moral nga mga isyu. Ug ang mga lider sa Simbahan kanunay nagpakita og ehemplo. Bag-ohay lang, si President Dieter F. Uchtdorf, uban sa iyang asawa, si Harriet, nakadawat sa ganti nga Humanitarian of the Year gikan sa Catholic Community Services; misulti siya nga daw nabali “duha ka German, kanhi mga Lutheran, karon matinud-anong mga Mormon nga gipasidunggan sa mga Katoliko sa Tinipong Bansa sa Amerika.”1
Ang mga miyembro sa tibuok kalibutan positibong mitubag sa panawagan nga magtinabangay sa pagserbisyo uban ang mga miyembro sa laing mga organisasyon. Natandog ko sa mga asoy sa mga LDS ward nga naghimo og mga tanaman sa komunidad, nagpahigayon og mga komperensya kauban ang laing mga tinuohan kabahin sa moral nga mga mithi, ug nanlimpyo sa komunidad kauban ang laing mga kongregasyon.
Kabahin sa pagserbisyo uban sa laing mga tinuohan, akong nasayran nga tinuod ang pagdasig ni Elder Quentin L. Cook sa Korum sa Napulog duha Ka mga Apostoles: Ang matinahuron ug matinud-anong pagserbisyo kauban ang laing mga tinuohan wala lang makapalambo sa atong mga komunidad apan nakapahimo natong tanan ug sa tagsa-tagsa nga mas nahigugma sa Dios ug sa Iyang mga anak.2
Pagpalambo sa Kalibutan
Pipila ka tuig ang milabay, usa ka ministro nga Presbyterian mibalhin sa akong komunidad nga gustong moserbisyo sa tanan niyang mga silingan, dili lang sa kongregasyon sa iyang simbahan. Samtang siya mahigalaong nakigsandurot sa among mga silingan nga kadaghanan mga LDS, mitanyag sa pagtabang, ug miimbitar og party sa mga silingan, ang mga miyembro sa ward misugod sa pag-apil sa mga proyekto sa pagserbisyo sa iyang kongregasyon; nagtinabangay, siya ug ang mga silingan nga lain-laing og mga tinuohan mipahigayon og fundraising nga nakatabang gyud sa usa ka LDS nga pamilya nga nagkinahanglan diha-diha dayon og ibayad sa ospital.
Si Apostol Orson F. Whitney (1855–1931) misulat, “Ang Dios naggamit og sobra sa usa ka tawo para sa katumanan sa iyang mahinungdanon ug kahibulongan nga buhat. … Kini dako kaayo, lisud kaayo, para sa usa ka tawo.”3 Dagkong mga butang ang mahimo kon ang maayong mga tawo maghiusa. Ang mga paningkamot sa among silingan nga ministro nakapamugna sa komite sa komunidad nga adunay lain-laing tinuohan, uban sa among stake Relief Society, nga nagpahigayon og komperensya sa kababayen-an nga naghatag og mga hygiene kit ug mga basahon ngadto sa mga ahensya para sa mga milalin. Kining koneksyon sa laing tinuohan nakapahimo sa mga miyembro sa stake sa pagpakaon sa dakong pundok sa mga milalin ug sa pagtabang sa dihang ang laing simbahan nagkinahanglan og dugang pang mga boluntaryo para sa mga tawo nga walay kapasilongan.
“Kita adunay responsibilidad … sa pagtabang sa ubang mga simbahan ug organisasyon,” miingon si President Thomas S. Monson ngadto sa mga miyembro,4 ug kini nga tabang nakapanalangin sa kalibutan sobra pa sa tawhanon nga pagserbisyo. Sa usa ka pakigpulong ngadto sa Kristiyanong mga lider sa Estados Unidos, si Elder Jeffrey R. Holland sa Korum sa Napulog Duha ka mga Apostoles mihulagway og sunod-sunod nga LDS-Evangelical Christian dialogue nga gipahigayon sa Brigham Young University.5 Usa sa resulta niini nga komperensya mao ang pagpangayo og pasaylo sa usa ka inila nga theologian sa sayop nga paghulagway sa tinuohan nga Mormon ngadto sa pipila sa iyang komunidad.6 Kabahin niining paglig-on sa relasyon si Elder Holland miingon, “Nagtuo gyud ko nga kini kabahin sa balaanong pag-organisar sa mga panghitabo niining samok nga panahon.”7
Pagpalambo sa Atong Relasyon
Samtang kita moserbisyo sa uban, adunay mga sumbanan nga makatabang nato sa pakigsandurot nga mas makahuluganon ug makalikay nga makasilo. Kausa nagpuyo ko sa usa ka dako nga siyudad ug miboluntaryo sa programa sa lokal nga simbahan sa pagtudlo sa publiko—nga dili diay pwede kong moapil dihang nasayran sa tigdumala nga miyembro ko sa Ang Simbahan ni Jesukristo sa mga Santos sa Ulahing mga Adlaw. Kana nga kasinatian nakakombinser nako sa paghatag og bili sa kontribusyon ni bisan kinsa nga dili hunahunaon ang iyang tinuohan (o ang kakulang niini). Ako mapasalamaton sa interes ni bisan kinsa sa pagkat-on sa Simbahan, apan nasayud usab ko nga kita mga Santos sa Ulahing mga Adlaw seryusong nagtuman sa mando ni Jesus sa paghigugma sa atong silingan, pagsinina sa hubo, pagpakaon sa gigutom, ug pagbisita sa nabilanggo (tan-awa sa Mateo 25:34–36) nga dili magdahum nga magpamiyembro ang nakadawat sa tabang o kadtong nagserbisyo uban kanato. Ang kinasingkasing ug matinahuron nga pakig-alayon sa laing tinuohan wala magkinahanglan sa bisan hain nga grupo, lakip nato, nga isalikway ang mga gituohan. Hinoon, kini nag-awhag sa mga partisipante nga “dili makig-away sa uban nga simbahan” (D&P 18:20) ug “sul-uban [ilang kaugalingon] uban sa higot sa gugma nga putli” (D&P 88:125).
Laing makatabang nga sumbanan naggikan sa usa ka maalamon nga lider sa stake sa amoang dapit nga daghang LDS. Siya mitambag sa mga miyembro nga nagserbisyo uban sa laing tinuohan nga dili dominahon ang paghimo og mga desisyon o sa pagpangulo apan sa pagtrabaho uban sa pagsabut-sabut ug pagtugot sa tanan nga “makabaton og managsama nga kahigayunan” (D&P 88:122). Kini nga lider, kinsa adunay daghang kasinatian sa pakig-alayon sa laing mga simbahan, miawhag usab sa mga miyembro sa pagpalambo og maayong mga relasyon. Siya nakadiskobre nga pipila sa nakatrabaho sa mga Santos sa Ulahing mga Adlaw nakakita kanila nga kugihan ug buotan apan mas interesado nga mahuman ang trabaho kay sa pagpalambo og panaghigalaay.
Ang akong mga kasinatian sa kawsa sa komunidad ug sa edukasyon nakakombinser nako nga mas mabati ang Espiritu kon lain-lain nga mga tawo nagkahiusa sa angay nga misyon. Inigsoonay nga gugma ug lunsay nga motibo mas makatabang sa atong pagserbisyo kaysa kahago.8
Usa ka LDS nga mamumulong nga sa komperensya sa akademik nga kauban ang lain-laing relihiyon nakaobserbar nga ang pagpakig-alayon sa uban nakatabang niadtong dili miyembro sa atong Simbahan nga mas makasabut nato.9 Laing eskolar, dili miyembro sa atong Simbahan, nagtudlo og seminar kabahin sa Mormonismo sa prominente nga unibersidad sa Amerika. Iyang nadiskobrehan nga ang iyang mga estudyante gusto nga makat-on sa atong Simbahan “una … kay gipadako sila nga nagtuo nga kining tinuohan usa ka kulto, apan ang ilang kasinatian uban sa ilang Mormon nga mga higala ug kaubanan nagpakita nga sayop kini.”10
Pagpalambo sa Atong Kaugalingon
Ang pagserbisyo kauban sa uban wala lamang makatabang nila nga makasabut kanato, apan kini nakaagni usab nato sa pagkat-on gikan nila ug mas magmatngon nga ang Dios “walay pagtamud sa mga tawo” (D&P 1:35). Motabang Siya sa buotang mga tawo sa tanang tinuohan ug kultura sa ilang mga paningkamot sa pagpalambo sa kinabuhi sa Iyang mga anak.
Kini nga pag-ila sa kabuotan sa uban makatabang nato nga magpabiling mapainubsanon—sukwahi sa mga Pariseo nga gipanghimaraut ni Jesus tungod sa ilang espirituhanong garbo (tan-awa sa Mateo 23) o sa mga Zoramite, kinsa gihulagway sa Basahon ni Alma nga mapahitas-on ug arogante (tan-awa sa Alma 31). Ang pagdawat sa kaayohan sa uban makapahimo natong mas maayo nga tawo.
Ang atong gugma mapalapdan gikan sa atong pamilya ngadto sa atong mga higala ug mga silangan—ug gani sa atong mga kaaway. Usa ka miyembro sa Simbahan nga nagserbisyo sa militar sa Amerika human–sa Ikaduhang Gubat sa Kalibutan didto sa Japan naghisgut sa iyang panlimbasug sa kasuko ngadto sa mga Hapon. Human giabi-abi ngadto sa usa ka shrine aron sa pagsimba kauban ang lumad nga mga Hapon, iyang nabati nga ang “ilang mga diwa nakatandog nako, ug nausab ang akong pagbati ngadto kanila. Nawala ang akong kasuko. … Naghunahuna ko sa nahitabo diha sa shrine ug sa talagsaong kausaban nga akong gibati ngadto sa mga tawo.”11
Sa samang paagi, kon matinud-anon natong gidawat ang ubang mga tawo, sila mausab. Usa ka Evangelical Christian kinsa migradwar sa Brigham Young University misulat og artikulo kabahin sa iyang kasinatian ug mihulagway sa iyang pagkadili komportable sa LDS nga mga estudyante. Apan human nakamugna og makahuluganong panaghigalaay, siya nakadayeg sa “gibug-aton nga akong nabati nga gipasabut sa mga Santos sa Ulahing mga Adlaw sa kaduol sa Dios ngadto sa katawhan. Ako nakaamgo nga sa akong paningkamot nga mapreserbar sa akong hunahuna ang kahalangdon sa Dios, akong nabaliwala ang kaduol sa Dios—ug kini nga pagkaamgo adunay dakong epekto ngari kanako.”12
Sa iyang pakigpulong ngadto sa Kristiyanong mga lider, si Elder Holland miila sa “risgo sa pagkat-on og usa ka bag-ong butang kabahin sa usa ka tawo. Ang bag-ong mga ideya makaapekto sa karaang mga panglantaw, ug sa ingon dili malikayan ang pipila ka kausaban sa atong panglantaw sa kalibutan.”13 Sa pakighigala sa ubang mga tinuohan, kanunay kong naghunahuna sa atong mga kalahian, naningkamot sa pag-ila kon kining mga kalahian sa kultura ba o sa doktrina, naningkamot sa pagdayeg sa tanang butang nga mahiyason ug matahum nga ilang mahatag. Sa tinuoray, ang paningkamot usahay risgo, apan kanunay angay lang. Sa proseso sa pag-usab sa akong panglantaw, akong nakaplagan akong kaugalingon nga hinay-hinay mihunong sa akong taphaw nga mga kinaiya sa kultura ug mas nagkaduol sa kahulugan sa ebanghelyo.
Pipila ka mga grupo nga LDS midapit sa akong higala nga ministro sa pagpamulong kabahin sa “paghigugma sa atong silingan bisan sa kalahian sa tinuohan,” ug siya mibati nga gidawat pag-ayo niadtong nanambong. Agi’g bawos, siya midapit sa pipila ka mga Santos sa Ulahing mga Adlaw, lakip nako, nga mamulong sa lain-laing mga kongregasyon sa sama nga hilisgutan. Human sa tulumanon, akong nakita akong kaugalingon nga gipalibutan sa kongregasyon nga gustong makig-istorya nako, mogakos nako, ug gani mihilak sa sama nga gugma ug pagsabut. Sa ingon niini nga mga kasinatian, akong nasayran nga ang panapos nga mensahe ni Elder Holland tinuod:
“Kon kita molantaw lapas sa kolor, kagikan, higala, simbahan, sinagoga, mosque, pagtuo, ug pahayag sa pagtuo, ug kon kita maningkamot nga molantaw kon si kinsa ug unsa sila—mga anak sa sama nga Dios—adunay maayo ug nindot nga mahitabo kanato, ug kita mas mapaduol sa Dios kinsa Amahan natong tanan.”14