Mga Pangutana ug mga Tubag
“Unsaon nako sa pagbatok sa tintasyon?”
Morag lain paminawon, ang tintasyon gikinahanglan alang sa atong espirituhanong kalamboan. Kon kita dili tintalon, kita dili makahimo sa pagpili tali sa maayo ug dautan (tan-awa sa D&P 29: 39). Ug kon kita dili mopili sa maayo kon gitanyagan og alternatibo, kita dili motubo sa espirituhanong paagi (tan-awa sa 2 Nephi 2:11–30).
Usa ka yawe sa pagbuntog sa tintasyon mao ang makanunayon nga pagkamasulundon. Kon magpatintal mo usahay, lisud na ang pakigbatok sa tintasyon sa umaabut. Kon kanunay kamong makigbatok, magkalig-on kamo ug mas sayon ang pakigbatok sa umaabut. Ang kalig-on sa pagbatok naggikan sa Pag-ula sa Manluluwas nga miepekto sa inyong kinabuhi. Samtang inyong buhaton ang pinakamaayo sa pagkat-on sa mga pagtulun-an sa Manluluwas ug mosunod niini, ang Ginoo molig-on ninyo sa pagpakigbatok sa tintasyon.
Ang mga kasulatan nagtudlo og laing mga paagi sa pakigbatok sa tintasyon:
“Pag-ampo kanunay, aron ikaw mahimo nga magmadaugon; oo, nga ikaw makabuntog ni Satanas” (D&P 10:5).
“Kinsa kadto nga mopatalinghug sa pulong sa Dios, ug hugot nga mogunit niini, dili gayud sila malaglag; ni ang mga pagtintal ug ang nagdilaab nga pana sa kaaway makabuntog kanila” (1 Nephi 15:24).
“Sukli ninyo ang yawa, ug kini siya mokaratil pagdalagan gikan kaninyo. Dumuol kamo sa Dios, ug siya moduol kaninyo” (Santiago 4:7–8).
Usab, importante nga masayud nga dili sayop nga tintalon. Bisan si Jesus gitintal. “Siya nag-antus sa mga pagtintal ug wala manumbaling kanila” (D&P 20:22). Kamo mahimong motan-aw sa Iyang ehemplo—ug sa mga ehemplo sa daghan pang uban diha sa mga kasulatan—sa pagtabang kaninyo.
Pag-ampo alang sa Kalig-on
Sa pagbatok sa tintasyon, una kinahanglan kita sa determinasyon ug kinasingkasing nga tinguha sa pagpili sa matarung. Nakatabang kini nako og maayo kon maghunahuna daan sa usa ka sitwasyon ug dayon mopili sa matarung. Lain nga butang nga nakatabang nako mao ang pag-ampo. Kon kita mag-ampo alang sa kalig-on, mangita og espirituhanong pag-amuma, ug mopili og maayo kon asa kita makig-istorya, nan ang Espiritu Santo maoy atong kanunay nga kauban ug mopasidaan nato.
Esther G., edad 18, Lower Saxony, Germany
Pagsuporta sa Usag Usa
Ako nagtuo nga pinaagi sa pagbasa sa mga kasulatan matag adlaw, pag-ampo, pagpugong sa kaugalingon, ug pagsunod sa mga pulong sa propeta, kita makabatok sa tintasyon. Ang pagbatok sa tintasyon naglig-on sa inyong pagtuo ug nagpakita sa inyong pasalig ngadto sa Langitnong Amahan sa pagsunod sa mga pakigsaad nga inyong gihimo. Ang pagbaton og mga higala sa Simbahan makatabang usab nato tungod kay kita makasuporta sa usag usa. Nagkinahanglan og dakong kaisug ang pagbalibad. Hinumdumi, “Kay kita wala sa Dios hatagig espiritu sa katalaw; kondili espiritu sa gahum ug sa gugma, ug sa pagpugong sa kaugalingon” (2 Timoteo 1:7). Kon kita makabuntog sa tintasyon, kita mas maduol ngadto ni Jesukristo ug sa atong Langitnong Amahan.
Nancy S., edad 19, Tultitlán, Mexico
Ipakigbahin ang Inyong mga Gituohan
Sa high school, ang kadaghanan sa akong mga kauban sa klase moimbitar nako sa pag-inom og alkohol ug motan-aw og pornograpiya. Kanunay akong mobalibad tungod kay akong buhaton unsay gusto sa Manluluwas nga akong buhaton. Nahinumdom ko Kaniya ug motuman sa akong mga pakigsaad. Usahay ang akong mga higala ug kauban sa klase dili motintal nako tungod kay sila nasayud unsa ang akong relihiyon. Ang pagpakigbahin sa atong pagtuo ug pagpamatuod ngadto sa uban—ilabi na sa mga higala, mga kauban sa klase, mga silingan, ug sa pamilya—makapaminos sa tintasyon sa atong palibut. Ako nasayud nga pinaagi sa pagsunod sa ebanghelyo, kita makabuntog sa mga tintasyon sa atong mga kinabuhi.
Romeo P., edad 19, Negros Occidental, Philippines
Paminaw sa Espiritu Santo
Akong nabantayan nga kon moabut ang tintasyon, ang Espiritu Santo mosulay sa pagpasidaan nako sa pagpili sa matarung. Buhata ang mga butang —sama sa pag-ampo ug pagbasa sa inyong mga kasulatan—nga makapabaton sa Espiritu uban ninyo ug likayi ang mga dapit diin ang Espiritu Santo dili moadto.
Rachel O., edad 13, Pennsylvania, USA
Barug sa Balaan nga mga Dapit
Ang akong magulang nga lalaki mosulti nako kanunay nga “mobarug sa balaan nga mga dapit.” Akong nakita nga kini nagpasabut sa pagbarug diin wala kaayoy mga tintasyon o dili kaayo grabe. Ang akong stake president miingon, “Dili lang makigbatok sa tintasyon—maglikay sa tintasyon.” Adunay panahon nga kamo kinahanglang makigbatok sa tintasyon, apan mas sayon ang pagsunod sa ebanghelyo kon walay mga tintasyon.
Aaron L., edad 18, Utah, USA
Kita Kanunay nga Mohukom
Ang gasa sa Espiritu Santo motabang nato sa pag-ila sa kalainan tali sa maayo ug dautan ug motabang nato nga makaamgo nga kita gitintal na. Kinahanglan natong hinumduman nga ang mga tintasyon mga pagsulay nga makatabang nato nga makahibalo kon kita nagbuhat sa matarung ug kon kita wala nagbuhat sa matarung; ug kita angay nga mahibalo nga kon kita mosunod sa Ginoo, dili Niya itugot nga pagapatintalon kita nga labaw pa sa atong maantos (tan-awa sa 1 Mga Taga-Corinto 10:13). Kita kanunay ang mohukom kon mopili ba sa husto nga dalan imbis sa sayop.
Juan T., edad 19, Montevideo, Uruguay
Role-play sa Pagpili sa Matarung
Nagtuo ako nga importante ang pagdesisyon og sayo mahitungod sa mga pagpili nga akong atubangon. Wala damha nag-atubang ko og lisud nga sitwasyon, ug ang resulta positibo tungod kay nakahukom na ko daan nga dili ipaubos ang akong mga sumbanan. Bisan og ako usahay dili komportable, ang akong pamilya nagpraktis og role-playing aron ako makahibalo unsay isulti o buhaton kon mag-atubang ko og mga tintasyon.
Emelyne P., edad 14, Wyoming, USA
Pagbaton og Buotan nga mga Higala
Ang pagbaton og buotang mga higala kinsa mopili sa matarung usa ka butang nga imong mabuhat sa pagbuntog sa tintasyon. Sila makapakita og maayong ehemplo. Makatawag kamo nila kon kamo tintalon. Makatabang sila ninyo sa pagpili sa matarung. Buotan nga mga higala mopahinumdom ninyo sa pag-ampo, pagbasa sa mga kasulatan, ug pagsunod.
Sam E., edad 17, Washington, USA