Hangtud Kita Magkita Pag-usab
Ang Pagpauli
Ang tagsulat nagpuyo sa Utah, USA.
Kon kita wala masayud asa moagi, Si Jesukristo mopakita nato sa dalan.
Ang akong biyahe sa pagpauli na gikan sa trabaho nagsugod sama sa uban. Sulod sa lima ka minuto, akong gisandig ang akong ulo sa may bintana ug wala madugay ang paghunong ug paglarga sa bus nakapaduka nako. Nag-adjust pa ako sa tanang bag-ong mga responsibilidad sa akong bag-ong kaminyoon samtang nagtrabaho ug full-time nga nag-eskwela. Dunay mga adlaw nga dili kapugngan nga makatulog sa tibuok biyahe sa bus padulong ug balik sa trabaho.
Sa akong pagmatamata gikan sa pagkatulog, makadungog ko og mga tingog nga maghatag og direksyon. Sa wala madugay nakaamgo ko nga ang bag-ong drayber sa bus kinahanglang giyahan sa kada liko, subay sa matag dalan, ug sa kada bus stop sa 50 ka milya (80km) nga rota.
Nasayud nga tingali madugay pa kay sa kasagaran nga usa ka oras ug tunga usa moabut, diha-diha wala ko mahimutang. Dili maayong hunahuna mahitungod sa drayber misulod sa akong hunahuna. Ang mga tingog nga naghatag og direksyon padayon nga nakaputol sa akong pagkatulog.
Sa wala madugay, hinoon, akong namatikdan nga mihunong ang pagsiyagitay. Mitan-aw ko sa usa ka babaye nga hinay-hinay nga naggiya sa drayber sa bus gikan sa iyang lingkuranan nga duha ka linya gikan nako. Nagtan-aw ko samtang siya maaghup ug mabinationg mihatag sa direksyon ug dayon, sa wala pa manaog, misulti kaniya kabahin sa sunod nga pipila ka hununganan. Sa didto nako sa balay, nahasol ko sa akong reaksyon sa pagpanaway itandi sa mahigugmaong giya sa maong babaye.
Nakaamgo ko nga ako sama sa drayber sa bus—wala ko masayud sa akong dalan sa kinabuhi sama sa drayber sa bus nga wala masayud sa iyang bag-ong mga rota. Kaming duha anaa sa dili pamilyar nga dalan. Sigurado ko nga mapasalamaton siya nga dunay tawo nga kahibalo sa dalan andam nga mohatag og mapailubon nga direkyon sa unsay anaa sa unahan.
Si Kristo mibuhat niini alang nato. Kon kita wala masayud asa moagi, ang Iyang ehemplo nagpakita nato sa dalan. Kon kita dunay mga pangutana, mahigugmaon Siyang mohatag sa mga tubag. Makapila man Siya, gikapoy human nagbiyahe og layo, maningkamot sa pagtuman sa mga panginahanglan sa uban?
Sukad nianang adlaw, kami dunay pipila ka bag-ong drayber sa bus. Usahay sila nagkinahanglan og pipila ka mga direksyon, ug salamat sa ehemplo nga gipakita nako sa mahigugmaong babaye ug sa atong Manluluwas, andam akong mohatag niini.