Atong mga Panimalay, Atong mga Pamilya
Pagtabang sa mga Bata nga Makaila sa Espiritu Santo
Ang tagsulat nagpuyo sa California, USA.
Kita makagamit sa lain-laing paagi nga modasig ang Espiritu Santo sa pagtabang sa atong mga anak nga makapalambo og pagpamatuod.
Isip ginikanan sa upat ka anak nga lalaki, ang akong bana ug ako kanunay nangita og paagi sa pagtabang sa among mga anak nga mobati sila sa Espiritu ug makaangkon og pagpamatuod. Kami nakasinati og dakong kalamboan sa pagsabut niini sa dili sagad nga paagi. Nagbarug ko sa tindahan sa dihang gidasig ko.
Nagkagamay ang grado sa among kinamagulangang anak nga lalaki sa iyang klase sa social studies. Amo na siyang giistoryahan kabahin ini, nag-awhag kaniya nga mas magtuon pa, apan wala gihapoy kalamboan. Kami nag-ampo og mga ideya aron matabangan siya. Usa ka adlaw diha sa tindahan sa mga libro, ako adunay kusog nga impresyon nga mopalit og usa ka libro gikan sa baratilyong pundok sa mga libro.
Ang libro mahitungod kon sa unsang paagi ang matag usa kanato adunay lain-laing estilo sa pagkat-on. Daghang mga tawo makat-on pinaagi sa biswal, nagpasabut nga sila labing makakat-on sa ilang makita. Kasagaran nila ganahan og art ug pagbasa. Ang pipila labing makakat-on pinaagi sa madungog. Epektibo kaayo nilang maproseso ang impormasyon kon ila kining madungog. Kining mga tawhana ganahan sa musika. Sa katapusan, ang uban makat-on pinaagi sa lihok [kinesthetic]. Sila labing makakat-on kon kini lihukon o may kalihokan nga iapil. Usahay sila maglisud sa eskwelahan kon sila pugson sa magtutudlo nga maglingkod lang. Sila labing makakat-on kon sila naglihok.
Mao ni ang tubag! Ang among anak klaro nga labing makakat-on pinaagi sa madungog—ganahan siya og musika ug makig-istorya! Among nadiskobrehan nga kanunay siyang pagawason sa klase aron magbuhat og laing mga kalihokan atol sa klase sa social studies ug dayon gipapauli sa magtutudlo ug gipabasa sa materyal. Naglisud siya kay dili niya madungog ang mga gihisgutan sa klase. Sa dihang amo na kining nasabtan, gidasig namo siya sa pagbasa og kusog sa gi-assign nga mga materyal ug dayon hisgutan kini uban namo. Midako ang iyang grado.
Pagpasiugda og Espirituhanong mga Kasinatian
Apan dili lang kutob didto among pagsabut sa mga estilo sa pagkat-on. Kami nakaamgo samtang gitun-an ni namo og maayo ug giobserbaran ang among anak nga ang Espiritu Santo kasagaran nagtudlo sa among mga anak sa pamaagi nga sila labing makakat-on. Si Propeta Joseph Smith mitudlo nga ang Espiritu mopasabut kanato sa atong pinulongan ug sa paagi nga kita makasabut. Ang Espiritu Santo mogamit sa Iyang pinulongan nga masabtan sa tanan, bisan sa gagmayng mga bata. “Ang atong Langitnong Amahan kanunay nga anaa alang kanato. Siya mopahiangay sa atong kahimtang sa panabut. ‘Kon Siya moduol sa usa ka gamay nga bata, Siya mopahiangay sa Iyang kaugalingon ngadto sa pinulongan ug kapasidad sa usa ka gamay nga bata’ (Joseph Smith, sa History of the Church, 3:392).”1
Ang pagkasayud nga ang Espiritu mopahiangay sa Iyang komunikasyon alang sa atong pagsabut makaawhag sa mga ginikanan sa paghimo og mga oportunidad para sa ilang mga anak sa pagpaminaw sa mga pagtulun-an gikan sa Espiritu Santo sa paagi nga sila labing makasabut. “Ug ang tanan nimo nga mga anak pagatudloan sa Ginoo; ug dako ang pakigdait sa imong mga anak” (Isaias 54:13).
Sama sa akong gisulti, ang among kinamagulangan nga lalaki labing makakat-on pinaagi sa madungog. Siya ug ang among ikatulo nga anak nga lalaki ganahan sa musika, busa sa among balay kami kanunay magpatugtog og matahum nga musika sa Mormon Tabernacle Choir ingon man klasikal nga musika. Ilang mabati og maayo ang Espiritu niini nga kahimtang. Kami adunay daghang nindot nga mga panaghisgut kabahin sa ebanghelyo, ug kini nakatabang kanila nga makakat-on sa kamatuoran nga gipamatud-an sa Espiritu kon ila kining madungog.
Lain namong anak labing makakat-on sa biswal. Siya ganahan nga mobasa ug mobati pag-ayo sa Espiritu samtang nagbasa sa mga kasulatan o mga basahon nga nakasentro sa ebanghelyo. Amo siyang hatagan og daghan nga mga libro nga iyang basahon nga nakatabang kaniya nga mobati sa Espiritu ug nakaangkon og pagpamatuod. Gipapilitan usab namo og mga litrato sa ebanghelyo ug mga kinutlo ang mga bong-bong aron ang among balay adunay daghang biswal nga makat-unan.
Ang among ikaduhang anak nga lalaki labing makakat-on sa biswal ug pinaagi sa lihok. Siya aktibo kaayo nga bata ug malipay kaayo kon mag-mountain bike o mag-hiking uban sa iyang papa. Among nadiskobrehan nga mas mabati niya ang Espiritu kon anaa sa gawas sa balay ug maglihok. Kami adunay daghang kamping sa pamilya diin kami maghisgut kabahin ni Jesukristo, ang Paglalang, ug sa plano sa kaluwasan. Kini nga mga mensahe masabtan sa among ikaduhang anak nga lalaki sa epektibo kaayo nga paagi samtang siya moapil sa mga kalihokan.
Ang akong bana ug ako nakadiskobre usab nga ang pagkat-on pinaagi sa lihok mahitabo kon magserbisyo. Busa daghan mi og kalihokan sa pagserbisyo uban sa among mga anak aron sila makakita, makadungog, ug makaapil. Kini nakamugna og talagsaong palibut diin ang among mga anak makaamgo sa mga leksyon kabahin sa gugma nga putli ug Kristohanon nga pagserbisyo, ug kini nga mga proyekto epektibo kaayo sa among ikaduha nga anak.
Ang Pagdungog ug Pagsabut
Amo usab nga nakat-unan nga ang mga tawo “makadungog” sa Espiritu Santo sa lain-laing mga paagi. Nagtudlo ko sa leksyon sa Sunday School ngadto sa bag-ong mga kinabig, ug nangutana ko, “Unsaon ninyo pagbati sa Espiritu?” Ang ilang mga tubag makapalamdag. Ang usa miingon, “Klaro ang akong mga gihunahuna.” Lain miingon, “Mibati ko og kainit sa pagbati,” samtang ang lain mipakigbahin, “Mibati ko nga malinawon kaayo.” Usa ka babaye nga namiyembro sulod lang sa pipila ka bulan miingon, “Lahi ang akong pamati sa akong tibuok lawas!” Ug daghan miingon nga sila usahay “makadungog” og tingog nga nagsulti kanila o aduna silay bag-ong mga ideya.
Si Elder Dallin H. Oaks sa Korum sa Napulog Duha ka mga Apostoles mitudlo: “Sa mas pamilyar nga matang, ang pagpadayag o inspirasyon moabut pinaagi sa mga pulong o ideya nga mahunahunaan (tan-awa sa Enos 1:10; D&P 8: 2–3), sa pagkaamgo dayon (tan-awa sa D&P 6:14–15), sa positibo o negatibong mga pagbati kabahin sa gisugyot nga planong buhaton, o gani pinaagi sa makapadasig nga mga pasundayag, sama sa pasundayag sa arts. … ‘Ang inspirasyon mas moabut nga usa ka pagbati kay sa usa ka tingog.’”2
Klaro nga ang matag usa kanato mahimong maminaw ug mobati sa komunikasyon sa Espiritu Santo sa lain-laing mga paagi. Kinahanglan kitang molihok sobra pa sa yano nga pagtudlo sa mga bata nga sila mobati og kainit tungod kay mahimong dili sila makasinati niana nga pagbati; sila makadawat sa inspirasyon sa laing paagi.
Si Elder Jay E. Jensen, kaniadto sa Kapangulohan sa Seventy, misaysay niini nga istorya mahitungod sa usa ka sakop sa Korum sa Napulog Duha Ka mga Apostoles kinsa nag-tour sa usa ka misyon. Taliwala sa mga zone conference, kini nga Apostol miduol sa sakop sa Seventy nga namulong sa milabayng komperensya ug miingon, “Tingali nakahatag ka sa mga misyonaryo og mga ideya nga mas makamugna og mga problema kaysa imong masulbad. Sa akong pagbiyahe sa tibuok Simbahan, pipila lang ka mga tawo ang akong nasayran nga nakasinati og kainit sa dughan. Sa pagkatinuod, adunay daghang mga tawo nga mosulti kanako nga sila nasagmuyo tungod kay sila wala gayud makasinati niana nga pagbati bisan pa sila nag-ampo o nagpuasa sa dugayng panahon.” Si Elder Jensen mipadayon: “Sulod sa katuigan, ako naningkamot sa pagkat-on sa lain-laing mga paagi nga modasig ang Espiritu sa Ginoo. Sa pagkatinuod namulong ang Dios gikan sa langit, apan siya mopakita, mopamatuod, o mohatag og giya sa lain-laing paagi.”3 Importante kaayo ang pagtudlo sa atong mga anak nga sila kinahanglan nga makat-on sa pagpaminaw sa Espiritu sa paagi nga Siya namulong ngadto kanila.
Samtang atong tudloan atong mga anak, kita mopakigbahin sa mga baruganan sa hugot nga pagtuo, paghinulsol, bunyag, ug gasa sa Espiritu Santo. Ang pagtudlo kanila sa pagpaminaw ug pagsabut sa aghat nga ilang mabati mahinungdanon kaayo sa ilang espirituhanong kalamboan. Si President Gordon B. Hinckley (1910–2008) mitambag kanato, “[Ang inyong mga anak] nagkinahanglan sa tanang kalig-on ug sa tanang hugot nga pagtuo nga inyong mahatag kanila samtang sila duol pa ninyo. Ug sila magkinahanglan usab og mas dako nga kalig-on nga nagagikan sa mas taas nga gahum.”4
Ang pagdawat og giya ug direksyon gikan sa atong Langitnong Amahan pinaagi sa Espiritu Santo usa ka dakong panalangin sa atong kinabuhi. Samtang atong tudloan atong mga anak kon unsaon sa pagdawat ug pagtagad niining mga pag-aghat, pagbati, ug panudlo, sila makaangkon og personal nga mga pagpamatuod nga makalig-on kanila sa umaabut. Ang Espiritu Santo mahimo nilang kauban sa kanunay, ug sila mas makadungog Kaniya sa hingpit. Isip mga ginikanan kita makatabang niini nga proseso ug makatabang sa pagpanalangin sa atong mga anak.