Pagtudlo sa Alang sa Kalig-on sa mga Kabatan-onan
Paghinulsol
Ang Pag-ula sa Manluluwas nga si Jesukristo nakapahimong posible sa paghinulsol, ug kitang tanan kinahanglang maghinulsol.
Usahay kita mahadlok kon ang kabug-at sa matang sa sala nagkinahanglan nga ikumpisal ngadto sa bishop o sa branch president, mipasabut si Elder Bradley D. Foster sa Seventy sa artikulo diha sa mga pahina 54–55 niini nga isyu. Apan, “kadtong kinsa nakabiyahe sa dalan sa paghinulsol mosulti ninyo nga dili lamang posible ang biyahe apan nga kon kamo nakaadto na ug nakahinumdom, mao kini ang inyong makaplagan:
“Mahimo kini ninyo. Ug kon inyong buhaton, ang tanan mas mamaayo. …
“Sa inyo gayud nga pagsugod, inyong mabati ang kahupayan.…
“Ang inyong bishop makatabang ninyo sa pagsulbad niini. Higugmaon ninyo siya ug dili makalimot kaniya.”
Mga Sugyot sa Pagtudlo sa mga Batan-on
Basaha uban sa inyong tin-edyer ang seksyon kabahin sa paghinulsol diha sa Alang sa Kalig-on sa mga Kabatan-onan. Hisguti ang mga panalangin nga atong madawat pinaagi sa Pag-ula ug sa unsang paagi ang paghinulsol makahimo niini nga posible.
Mahimo usab ninyong ipakigbahin ang inyong pagpamatuod sa paghinulsol ug sa Pag-ula ug unsa ang kahulugan niini sa inyong kinabuhi. Mahimo usab ninyong hangyoon ang inyong mga tin-edyer sa pagpakigbahin sa ilang mga pagpamatuod sa paghinulsol uban kaninyo. Ug kon angay, mahimo ninyong dapiton ang mga tin-edyer sa pagtabang sa ilang mga manghud sa kalihokan nga gihulagway sa ubos.
Mga Sugyot sa Pagtudlo sa mga Bata
Sa pagpakita kon unsay ipasabut nga magpabilin diha sa dalan nga gisugo sa Ginoo nga atong sundon, ikonsiderar sa paggamit og duwaan nga sakyanan (o eroplano, barko, o karwahe) sa leksyon nga maggamit og mga butang [object lesson]. Gamita ang mapa ug hangyoa ang bata sa pagbalhin sa sakyanan sa usa ka dapit diha sa mapa ngadto sa laing dapit. Pangutan-a, “Unsay angay nga buhaton kon ang sakyanan motipas sa dalan?”
Klaro nga kon ang sakyanan motipas sa dalan, kinahanglang ibalik kini sa husto nga dalan, pangutan-a kon sa unsang paagi kini susama sa paghinulsol. Ipasabut nga usahay samtang nagpakabuhi kita, kinahanglan natong usbon ang atong direksyon aron sa pagsiguro nga husto atong padulngan. Usahay kita mismo ang mohimo niini. Apan usahay nagkinahanglan kita og tabang. Hangyoa ang mga bata sa pagsulti sa mga higayon diin sila mismo ang mitabang sa ilang kaugalingon, mga panahon nga gitabangan sila sa uban, ug sa mga paagi diin ang Langitnong Amahan ug si Jesukristo makatabang kanila. Samtang kamo magtudlo niini nga hilisgutan, hunahuna nga ang mga bata nga wala pay otso anyos walay tulubagon ug dili kinahanglan nga maghinulsol, apan bililhon alang kanila nga magkat-on mahitungod sa mga baruganan sa paghinulsol.
Hisguti ang ilang mga tubag ug hisguti kon sa unsang paagi ang paghinulsol usa ka gasa gikan sa Langitnong Amahan ug ni Jesukristo nga nakapaposible kanato nga makabalik ngadto Kanila pag-usab.