Alang sa Kalig-on sa mga Kabatan-onan
Ang Talan-awon gikan sa Tumoy sa Dalan
Ang mensahe gikan sa tumoy sa dalan klaro: “Makahimo ka niini. Ug kon mahimo nimo, ang tanan mas maayo.”
Paghulagway pinaagi ni Greg Newbold
“Dili ko makalimot nimo, bishop. Giluwas nimo ang akong kinabuhi.”
Ang tawo nga namahayag niana karon wala mobati niana sa sinugdanan. Isip usa ka tin-edyer nahadlok siya. Nakahibalo siya nga kinahanglan siyang maghinulsol. Ako ang iyang bishop nianang higayona, ug nasayud siya kinahanglan kaming mag-istorya. Apan siya napuno sa mga pagduha-duha.
“Unsay mahunahuna sa bishop ngari nako?”
“Himoon ba niya kini nga kompidensyal?”
“Unsaon nako sa pagtan-aw kaniya pag-usab?”
Ang maong mga kabalaka grabe kaayo, nakapaimposible nga makabaton og kaisug nga gikinahanglan sa pagsubay sa dalan sa paghinulsol.
Pagtan-aw sa Dalan
Apan atong tan-awon kana nga dalan. Pipila ka mga bahin sa paghinulsol mas sayon kay sa uban. Usa ka lakang mao ang pag-ila. Kasagaran kita masayud kon kita maghimo og butang nga sayop; ang Espiritu Santo nagtabang nato nga makahibalo niini. Kinahanglan kitang mag-usab, ug ang tinguha sa pag-usab sa kasagaran kusog.
Dayon ang mga lakang magkalisud. Ang Ginoo miingon nga kinahanglan gayud nga kita mokumpisal ug mosalikway. Ingon og sayon ra kaayo ang pagkumpisal ngadto sa Langitnong Amahan sa atong mga pag-ampo. Makorihian nato ang daghang mga sala niini nga paagi, magtinguha og kapasayloan, maghimo og pag-uli ug mas ayuhon ang kinaiya hangtud nga ang Espiritu mopamatuod nga nabuhat nato kutob sa mahimo.
Apan ang uban nga pagkumpisal kinahanglan nga makigsulti sa inyong bishop o branch president. Ug mao kana ang sitwasyon sa batan-ong lalaki. Nagkinahanglan siya og tabang lapas pa sa iyang kaugalingong kapasidad, ug kinahanglan siyang masayud nga posible ang pagbiyahe.
Paglaum diha sa Dalan
Kadtong kinsa nakabiyahe sa dalan sa paghinulsol mosulti ninyo nga dili lamang posible ang biyahe apan kon kamo nakaadto na ug nakahinumdom, mao kini ang inyong makaplagan:
Mahimo kini ninyo! Ug kon inyong buhaton, ang tanan mas mamaayo.
Ang Ginoo nagmando nato sa paghinulsol tungod kay Siya nahigugma nato. Pinaagi sa Iyang Pag-ula, Iyang gibayran ang bili sa atong mga sala, ug busa Siya nahibalo nga ang paghinulsol makahatag nato og kagawasan. Lig-unon Niya si bisan kinsa nga moduol Kaniya. Mitudlo si Alma nga sa pagpahimulos sa Pag-ula, kinahanglan nga kita maghinulsol—matag usa nato (tan-awa sa Alma 5:33–34). Tingali lisud ang dalan, apan ang bishop molakaw sa dalan uban ninyo. Adunay tabang diha sa dalan.
Sa inyo gayud nga pagsugod, inyong mabati ang kahupayan.
Pakigkita sa inyong bishop. Inyong makaplagan ang tawo nga nahigugma ninyo ug motahud ninyo. Ang pagsalig nga inyong mahimo uban sa inyong bishop nindot. Molungtad kini sa kahangturan, ug kini makatabang ninyo nga mobati nga luwas uban sa laing mga bishop sa umaabut. Hatagan kamo og lahi nga panglantaw sa inyong mga kahimtang. Sa iyang kaalam ug kasinatian, ug uban sa inspirasyon sa Ginoo, ang bishop mobalanse sa unsay inyong gituohan nga katapusan na sa kalibutan nga usa lang diay ka libaong sa dalan.
Motabang siya ninyo nga tinud-anay nga makasabut nga ang Manluluwas mao ang Kahayag sa Kalibutan. Sa inyong pagpahimulos sa Pag-ula, ang inyong kinabuhi mohayag, ang inyong umaabut puno sa saad, ug kamo makasabut nga ang pag-angkon og hugot nga pagtuo kang Ginoong Jesukristo mao ang usa sa dakong katuyoan sa pagpuyo dinhi sa kalibutan.
Ang inyong bishop makatabang ninyo sa pagsulbad niini. Higugmaon ninyo siya ug dili makalimot kaniya.
Nagtuo gayud ako nga ang mga tawo nga motabang ninyo sa panahon sa kalisud mahimong suod sa inyong kasingkasing. Unsa pa kaha, ang bishop nga inyong masuod kon siya motabang ninyo sa usa ka espirituhanong krisis? Ang Ginoo mopalambo sa pagkamabination sa bishop ug sa iyang abilidad sa paggiya kaninyo. Ang inyong bishop mahimo ninyong higala sa kahangturan.
Ug kaninyo batan-ong mga lalaki nga mahimong bishop o stake president sa umaabut, ang inyong mga kasinatian uban sa inyong bishop mobansay ninyo niana nga panahon nga kamo anaa na niana nga katungdanan.
Akong tapuson pinaagi sa pagsulti ninyo og dugang sa akong pagpakigsulti niana nga batan-ong lalaki. “Bishop,” siya miingon, “masilag gayud ka nako sa unsay akong isulti nimo. Dili gayud ka makatan-aw nako pag-usab, ug kon imong isulti sa uban unsay akong isulti nimo, magpakamatay ko.”
Ako miingon, “mosaad ako nga dili gayud nako budhian ang imong pagsalig. Himoon ko kini nga kompidensyal hangtud sa kahangturan.”
Misulti siya nako og pipila ka mga sitwasyon ug nag-obserbar sa akong reaksyon. Sa dihang ako miingon, “nasayud ko unsay imong giagian. Makatabang ko nimo,” mipadayon siya sa hinay-hinay hangtud siya miabut sa unsay gusto niyang hisgutan. Gibalik-balik nako siya sa pagsulti nga midayeg ko niya sa pagkumpisal ug tinguha sa pag-usab. Bisan tuod og halos dili siya katiwason, nahuman gyud namo ang unsay kinahanglan niyang ipaambit.
Importante ba gayud kini? Importante ngadto kaniya. Apan samtang kami nag-istorya, iyang nasabtan nga ang kalooy sa Ginoo gitanyag niadtong kinsa tinuoray nga maghinulsol. Human sa unang panag-istorya, kami nagtinabangay, ug sa kadugayan nakompleto ang iyang paghinulsol. Karon motawag gihapon siya nako, ug nindot ang among panag-istoryahanay.
Pribilehiyo nako nga makatabang niya nga makat-on nga kitang tanan nagdepende sa Pag-ula. Ug miduyog ako niya sa pagdayeg ni Jesukristo, ang tinuoray nga miluwas sa iyang kinabuhi.