Ang Pinakagamhanan nga Kasundaluhan
Paghulagway pinaagi ni Scott Greer
Nagplano ko nga mahimong opisyal sa kasundalohan. Apan sa akong paghunahuna sa akong kaugmaon, nahinumdom ko sa pangutana sa akong mama, “Kanus-a man ka mag-full time misyon?”
Sukad sa gamay pa ko, naganahan ko sa mga istorya sa mga lider sa Simbahan nga nakaserbisyo sa armed forces. Daghan kanila nahimong mga bayani sa gubat ug talagsaong ehemplo sa kaisug ug kamapainubsanon diha sa ilang nasud. Ang ilang mga kasinatian nagdasig kanako sa pag-apil sa militar sa akong nasud.
Sa 13 anyos ko, mieskwela ko sa eskwelahan nga nailhan kaayo sa ka-estrikto sa pang-militar nga disiplina ug pang-infantry nga pagbansay. Lisud kaayo ang akong iskedyul. Sagad kong maluya kaayo pagkahuman sa adlaw nga ang akong pagtuon sa kasulatan ug seminary morag dili na mahimo.
Sa ikaduhang tuig nako sa eskwelahan, akong giplano ang akong kinabuhi: sa pagkahuman nako og eskwela sa edad nga 18, modiretso dayon ko sa officer school ug mogradwar inig ka upat ka tuig isip opisyal sa Guatemalan Army. Ang tanan nakong pangandoy maingon og nagkatinuod.
Usa ka adlaw gisultihan nako si mama sa akong mga plano, ug nangutana siya “Kanus-a man ang plano nimong mag-full time misyon?” Sukad niadto ang iyang pangutana nagpabilin sa akong hunahuna sa matag higayon nga maghunahuna ko sa akong kaugmaon.
Lisud gihapon ang akong iskedyul, apan gisugdan nako ang pagpakita og dugang nga interes sa akong espiritwal nga training. Gisugdan nako ang pagtambong og seminary, pagkuyog sa full-time nga mga misyonaryo, ug pag-apil sa mga kalihokan sa Simbahan. Gisunod ang tambag sa akong magulang nga lalaki nga tua sa misyon, gisugdan sab nako ang pagbasa sa Basahon ni Mormon.
Sa nagbansay ko sa pagka-paratrooper, lisud kaayo ang among training sa matag adlaw. Mamalik mi sa among baraks nga hapit na magkamang, apan kanunay kong makakuha og kalig-on aron magbasa sa Basahon ni Mormon. Ang inadlaw nga pagbasa sa mga kasulatan milig-on sa akong espiritu ug nakatabang nga makapadayon ko sa akong training.
Usa ka gabii pipila sa akong mga higala naglibut sa akong higdaanan sa pagpangutana kanako mahitungod sa Basahon ni Mormon ug sa Pulong sa Kaalam. Kadto akong oportunidad nga mahimong pinakamaayong matang sa sundalo—usa ka tawo nga modepensa sa kamatuoran ug nagdala og kagawasan pinaagi sa lig-on ug makakombinser nga pagpamatuod sa Basahon ni Mormon.
Dihang 19 na ko, mipasakop na usab ako sa kasundalohan—kasundalohan sa Dios, ang pinakagamhanan nga kasundalohan sa tanan. Akong kahigayunan ang pagbarug tapad sa maisug nga mga elder ug sister sa Zion sa batalyon sa Mexico Puebla Mission. Binaksan og taming sa Dios, among gisangyaw ang ebanghelyo ug nakig-away alang sa kagawasan uban sa kaisug ug kusog.
Nakig-away kami batok sa mga panon sa kangitngit, apan ang kadaugan iya sa Dios. Gusto kong magpadayon nga mahimong maisug nga sundalo, nagpasakop alang sa atong Hari. May gamhanan kita nga hinagiban: ang Basahon ni Mormon, ang Espiritu Santo, ug ang kahingpitan sa ebanghelyo. Gipangulohan kita ngadto sa kadaugan pinaagi sa buhing mga propeta. Kon magbansay kita ug mangandam sa kaugalingon alang sa pag-anhi sa atong Manluluwas, si Jesukristo, kita hatagan Niya og korona sa dungog sa celestial nga himaya.