Misyonaryo nga Higala
“Magdapit sa tanan sa pagduol ngadto kang Kristo” (D&P 20:59).
Mihangyo si Alex sa iyang higala nga si Jake nga adto magdula sa iyang balay inig ka Sabado. Nalingaw sila sa pagpalumba-lumba sa mga dulaang sakyanan dihang namatikdan ni Jake ang litrato nga gibitay sa bong-bong.
“Kinsa na?” nangutana siya nga nagtudlo sa litrato ni Thomas S. Monson.
“Si Presidente Monson kana,” miingon si Alex.
Wala motingog si Jake.
“Abi nimo, siya ang propeta sa among Simbahan,” miingon si Alex.
Daw naulaw si Jake. “Wala na kami magsimbahan,” miingon siya.
“Nganong wala na man?” Nangutana si Alex.
Mikihol lamang si Jake. “Ambot.”
“Ganahan ka bang mokuyog nako inig ka Dominggo?” nangutana si Alex. “Mahimo tang magkuyog ngadto sa Primary. Maayo kaayo ang akong magtutudlo.”
Misanag ang mga mata ni Jake. “Pangutan-on nako si mama, basin tugtan ko niya,” miingon si Jake.
Sa tingpaniudto, nangutana si Alex sa iyang mama, “Mahimo bang mokuyog si Jake nako sa Primary ugma?”
“Pangutan-on una nato ang mama ni Jake,” miingon si Mama. “Kon mosugot siya, siyempre makakuyog siya.”
Pagkataud-taod nianang adlawa, miabut ang mama ni Jake sa pagkuha kaniya.
“Mahimo bang mokuyog si Jake nako ugma sa Primary?” Nangutana si Alex.
“Makakuyog ba ko, Ma?” Miingon si Jake. “Miingon si Alex nga nindot kaayo ang Primary. Duna silay mga istorya, mga kanta, ug makakat-on mahitungod sa mga tawo sa kasulatan.”
“Ambut lang,” miingon ang mama ni Jake, nagduha-duha. “Dugay na tang way simba-simba.”
“Palihug, Ma,” miingon si Jake. “Gusto kong moadto.”
“Welcome si Jake sa pagkuyog kanamo,” miingon ang mama ni Alex.
“Sigurado ka ganahan kang moadto?” Nangutana ang mama ni Jake.
“Sigurado ko!” Miingon si Jake.
“Kon mao OK ra,” miingon ang mama ni Jake.
Gigakos og kalit ni Jake ang iyang mama. “Salamat,” miingon siya.
Pagka-Dominggo sa buntag, gihapit sa pamilya ni Alex si Jake. Nakailis na siya og pangsimba. Human sa sakrament nangadto ang batang mga lalaki sa Primary. Sa didto na sila sa klase, miingon ang ilang magtutudlo, “Nalipay kaayo mi nga naa ka dinhi, Jake.”
Human og simba, gihatod sa pamilya ni Alex si Jake sa pagpauli.
“Salamat sa imong pagdala nako sa simbahan,” miingon si Jake.
Mipahiyom ang mama ni Alex ngadto kaniya. “Walay sapayan, Jake. Manghinaut mi nga mokuyog ka namo og usab,” miingon siya.
Nianang gabhiona sa panihapon, nangutana si Alex, “mahimo ba nakong imbitaron si Jake kuyog nato sa sunod Dominggo?”
Mitando si mama. “Sundon nako ang imong ehemplo ug imbitaron nako ang iyang mama sa pagkuyog sab nato,” miingon siya.
“Maayo ka nga misyonaryo, Alex,” miingon si Papa.
Nahibulong si Alex. “Usa ra ko ka higala,” miingon siya.
“Mao kana ang usa ka misyonaryo,” miingon si Mama, “usa ka higala.”
Paghulagway pinaagi ni Lance Fry