Pagpakigbahin sa Ebanghelyo pinaagi sa Inyong Maayong Ehemplo

Ni Stephanie J. Burns ug Darcie Jensen

Ang labing maayo nga paagi sa pagpakigbahin sa ebanghelyo mao ang pagsunod niini.

Alang sa pipila kanato, natural lang ang pagpakigbahin sa ebanghelyo. Apan alang sa kadaghanan, dili kini ingon ana ka sayon. Sa pagkatinuod, kita gani mahadlok sa paghisgut sa ebanghelyo ngadto sa atong mga higala, pamilya, o mga silingan, bisan kita nasayud kon unsa kini kaimportante buhaton.

Dugang pa, usahay kon kita maghunahuna kabahin sa misyonaryo nga buhat, kita naka-focus pag-ayo sa pamaagi, kalihokan, o resulta, kaysa mag-focus sa pagtabang sa indibidwal. Ang problema mao, ang bisan unsang paningkamot nga wala maka-focus sa indibidwal makapahimo niadtong mga paningkamot nga napugos ug dili kinasingkasing.

Adunay mas maayo nga paagi.

Ang paagi mao nga mahimong mas makabig ngadto sa ebanghelyo—isip mga indibidwal—ug himoon ang atong ehemplo sa atong kinabuhi ug atong mahigalaong pakig-istorya nga mao ang sinugdanan. Kon mas nakabig kita, mas komportable kita sa atong tinuohan, ug kita magsugod sa pagbati og dugang tinguha alang sa uban nga makatagamtan sa mga panalangin sa ebanghelyo. Kon kana mahitabo, ang pagpakigbahin mahimong mas natural.

Sa tinuoray, dili na gani nato mamatikdan nga kita nagpakigbahin na sa ebanghelyo. Samtang nagtubo ang atong matinuorong pagkadisipulo, ang epekto niini diha sa atong mga lihok, inistoryahan, ug gani sa atong panagway lisud nga ilimud. “Ang inyong maayong binuhatan makita sa uban,” mipasabut si Elder Russell M. Nelson sa Korum sa Napulog Duha ka mga Apostoles. “Ang kahayag sa Ginoo mahimong modan-ag gikan sa inyong mga mata. Uban niana nga kahayag, kinahanglang mangandam kamo sa pagtubag sa mga pangutana.”¹

Buhi nga mga Pagpamatuod

Ang Isangyaw ang Akong Ebanghelyo: Usa ka Giya sa Misyonaryo nga Pangalagad nagpasabut: “Ang Manluluwas mipakita sa agianan. Mipahigayon siya sa perpektong ehemplo, ug mimando Siya kanato nga mahimong sama Kaniya (tan-awa sa 3 Nephi 27:27).”² Samtang ang mga miyembro magkat-on kabahin ni Kristo ug magtinguha nga sundon ang Iyang mga hiyas sa ilang kinabuhi pinaagi sa gahum sa Iyang Pag-ula, sila mas mahisama ni Kristo ug mas sarang sa paggiya sa uban padulong Kaniya.³

Usa ka bag-ong kinabig gikan sa Washington, USA, miingon nga ang paggahin og panahon uban sa mga miyembro mao lang ang paagi nga siya nainteresado sa ebanghelyo. “Ang kalipay nga anaa kanila ug ang akong pagbati kon kauban ko sila dili gayud malimud,” siya mipakigbahin. “Wala sila magsangyaw kanako kabahin sa Dios. Yanong kabahin kini sa ilang pagkatawo: ilang istilo sa kinabuhi, ilang mga pagpili, ilang mga lihok ug reaksyon. Kon magtan-aw ko nila, maghunahuna ko, ‘Kana mao ang kinabuhi nga akong gusto. Gusto kong mahisama niana ang akong kinabuhi.’”

Samtang kita mobati nga mas komportable sa impluwensya sa ebanghelyo sa atong kinabuhi, ang paghisgut kabahin nianang impluwensya mas sayon kay kita aduna nay hilisgutan ug kita makapakigbahin unsa ang nahimo niana nga mensahe alang kanato.

Si Miriam Criscuolo gikan sa Italy nakasinati nga, bisan nakahimo na siya og makahuluganong pakighigala ngadto sa ilang silingan, dili gihapon siya kahibalo unsaon paghisgut sa ebanghelyo. “Kami kanunay mag-uban, apan mawala kanako ang kaisug sa paghisgut sa akong bag-ong higala kabahin sa ebanghelyo, bisan tuod nasayud ko nga kini akong katungdanan,” mipakigbahin siya.

Apan sa dihang ang ebanghelyo natural na kanako, nakasugod nako sa pagpakigbahin kaniya. Si Miriam mihinumdom, “Ang akong anak nga babaye, sa dihang nagpakita og usa ka proyekto sa Primary, mao ang nakapakuryuso sa akong higala. ‘Unsay Primary?’ nangutana siya. Gikan niana nga pangutana nanggawas ang daghan pang mga pangutana. Nahibaloan nako nga ang akong higala nangita og usa ka butang sulod sa katuigan. Giingnan nako siya nga ang kalinaw sa hunahuna nga iyang gipangita makaplagan sa Simbahan.

“Sa wala madugay nagpamiyembro siya sa Simbahan. Siya ang tubag sa akong mga pag-ampo kon unsaon sa pag-apil sa misyonaryo nga buhat ug sa pagpakita sa akong mga anak unsaon kini paghimo.”

Pagpakighigala Una

Sama ni Miriam, usahay kita mobati nga obligado sa pagpakigbahin sa ebanghelyo ug atong mabati nga kini nga buluhaton makamugna og pinugos, dili komportableng mga panaghisgut. Dugang niini, ang responsibilidad makapabug-at sa atong pagbati ug makapugong sa atong abilidad nga epektibong makapasabut sa mga baruganan sa ebanghelyo.

Ang malampusong mga oportunidad sa misyonaryo mas daling makit-an kon ang mga miyembro mga buotan, matinuorong mga higala ngadto sa uban. Sama sa giingon ni Elder M. Russell Ballard sa Korum sa Napulog Duha ka mga Apostoles, “Kon kita bukas kalabut sa atong pagkamiyembro sa Simbahan gikan sa sinugdanan, … mga higala ug mga kaila modawat nga kini kabahin kon kinsa kita.”⁴

Ang paglakip sa ebanghelyo sa daan na nga panaghigalaay kaysa ibasi ang panaghigalaay sa pagpakigbahin sa ebanghelyo makapadako sa misyonaryo nga mga kalampusan. Si Eliana Verges de Lerda, usa ka miyembro sa Simbahan sa Argentina, nagkaila sa iyang higala nga si Anabel sa dihang sayis anyos pa sila. Ang ilang panaghigalaay milambo samtang dungan sila nga nag-eskwela. Niana nga higayon, wala gayud gitago ni Eliana nga siya miyembro sa Simbahan.

“Komportable kaayo ko nga maghisgut sa ebanghelyo ngadto ni Anabel, bisan tuod dili kami parehas og mga pagtuo,” miingon siya.

Sa dihang sila 14 anyos na, si Anabel miuyon nga maminaw sa mga misyonaryo, apan wala magpabunyag.

Si Eliana nawad-an sa kadasig, apan kini wala makapahunong kaniya sa pagpadayon sa ilang panaghigalaay; ni nakapahunong sa mga panaghisgutan sa ebanghelyo. Mga pipila ka tuig ang milabay, giimbitar ni Eliana si Anabel nga motambong sa seminary. Atol sa leksyon, nabati pag-ayo ni Anabel ang Espiritu. Mga pipila ka adlaw ang milabay, samtang si Eliana nangandam sa pag-adto sa templo, si Anabel miingon kaniya, “Mosaad ko nga mokuyog ko nimo sa sunod.” Sa wala madugay nabunyagan si Anabel.

Ang pagkakabig ni Anabel wala mahitabo sa pipila ka adlaw; miabut kini og daghang katuigan. Ang proseso nahimong posible tungod kay si Eliana iyang higala sa sinugdanan—dili igsapayan kon si Anabel ba interesado o dili sa pagdawat sa ebanghelyo.

Pagpaminaw uban sa Gugma

Ang panaghigalaay sama nila ni Eliana ug Anabel sa kanunay magsugod kon ang mga tawo makadiskobre nga sila susama og mga interes, baruganan, o uban pang pagkaparehas. Ang ilang panaghigalaay mas magkasuod kon ang indibidwal mopakigbahin sa ilang mga kasinatian, emosyon, ug gugma. Ug ang gugma, siyempre, mahinungdanong bahin sa gipahiuli nga ebanghelyo.

Kita, isip mga miyembro sa Simbahan, makapahayag sa Kristohanong gugma pinaagi sa paggahin og panahon sa atong mga higala—pinaagi sa mga kalihokan, serbisyo, ug panagsultihanay. Sa pagkatinuod, daghang mga tawo ang nangita og ingon ana nga matang sa higala.

Sa paghulagway sa atong inter-aksyon sa uban, si Elder Jeffrey R. Holland sa Korum sa Napulog Duha ka mga Apostoles mitambag: “Ang pagpaminaw mas importante kaysa pag-istorya. Kini nga mga tawo dili lang walay kinabuhi nga mga butang nga importante kanato para modaghan lang ang atong mga nabunyagan. Sila mga anak sa Dios, atong mga kaigsoonan, ug sila nanginahanglan sa unsay anaa kanato. Ayaw pagpakaaron-ingnon. Magmatinud-anon sa pagtabang. Pangutan-a kining mga higala unsa ang labing mahinungdanon ngadto kanila. … Ug dayon paminaw. … Isaad ko kaninyo nga adunay usa ka butang nga ilang isulti nga sa kanunay maghisgut og kamatuoran sa ebanghelyo diin kamo makapamatuod ug kamo makahatag pa og daghan.”⁵

Dili kinahanglan nga kanunay natong han-ukan ang atong mga higala sa ebanghelyo. Kinahanglan lang nga maayo kitang mga higala ug dili mahadlok sa pagpakigbahin sa mga konsepto sa ebanghelyo kon adunay mga oportunidad. Gigamit ni Satanas ang kahadlok aron sa pagsulay sa pagpugong sa mga miyembro sa pagpakigbahin sa pagpamatuod. Kini kusog kaayo nga emosyon nga makapaluya. Si Presidente Uchtdorf mihatag og gibug-aton: “Mas palabihon pa sa uban nga moguyod og karomata sa prairie kaysa hisgutan ang kabahin sa hugot nga pagtuo ug relihiyon ngadto sa ilang mga higala. … Sila nabalaka kon unsa unya ang pagtan-aw kanila o nga basin kini makaguba sa ilang relasyon.” Siya nagpadayon, “Dili kinahanglan nga maingon ana tungod kay kita adunay masadyaon nga mensahe nga ipakigbahin.”⁶

Si propeta Mormon mitudlo, “Ang hingpit nga gugma mosalikway sa tanan nga kahadlok” (Moroni 8:16). Samtang nagkahingpit ang atong pagsunod sa ebanghelyo, mapawala nato ang kahadlok pinaagi sa pagpuli niini og gugma nga putli—ang tiunay nga gugma ni Kristo—ngadto sa atong mga higala, pamilya, ug silingan. Kini nga gugma mas makapadasig kanato sa pagpakigbahin sa ebanghelyo.⁷

Pagpakigbahin sa Ebanghelyo sa Natural nga Paagi

Ang mga anak sa Langitnong Amahan nanginahanglan sa panglantaw nga ikatanyag sa ebanghelyo. Alang sa mga miyembro nga nagsunod sa sumbanan sa ebanghelyo, ang ilang kinabuhi mao ang saksi sa gugma ni Kristo. Kon ang mga miyembro aktibong nag-focus nga mahimong sama ni Jesukristo, pag-establisar og makahuluganong panaghigalaay, ug pagpalambo sa gugma nga putli, ang pagpakigbahin sa ebanghelyo mahimong natural nga bahin sa ilang pagkatawo. Samtang sila nakigbahin kon si kinsa sila, ang mga miyembro mobati og kahupayan ug paggiya diha sa pulong sa Manluluwas ngadto sa Iyang mga disipulo: “Nangamuyo ako alang kanimo nga unta dili makabsan ang imong pagsalig: ug sa mahibalik na ikaw kanako, lig-una ang imong mga igsoon” (Lucas 22:32).

Ang Gahum sa “Ako usa ka Mormon”

Gipasiugdahan niadtong 2010, ang kampanya nga “Ako usa ka Mormon” nahimong sayon ug epektibong paagi sa mga miyembro sa Simbahan sa pagpakigbahin sa ilang mga pagbati kon unsa ang ilang gituohan. Ang kampanya naglakip sa TV ug mga billboard ad sa daghang siyudad sa US ingon man usab sa internet. Sa Mormon.org, ang mga Santos sa Ulahing mga Adlaw nagpakigbahin og personal nga mga istorya ug nagtubag sa daghang mga pangutana sama sa “Ang mga Mormon ba Kristiyanos?” ug “Unsa ang pagtuo sa mga Mormon kabahin sa Biblia?”

Si Rochelle Tallmadge gikan sa Texas, USA, nagpakigbahin: “Nag-ampo ko nga makasinati sa misyonaryo nga buhat ug gitawagan ko sa usa ka tawo kinsa gustong mahibalo kon interesado ba ko niining bag-ong programa nga Mormon.org.

“Tungod kay ang akong mga anak nga lalaki may kakulangan, kadaghanan sa akong mga nakahinabi sa site mao kadtong may kakulangan o pamilya nga adunay sakop nga may kakulangan. Ang akong makapaikag kaayo nga kasinatian mao ang pakighinabi ni Mia. Siya nagpuyo sa Oslo, Norway, ug siya kanunay mag-wheelchair. Siya nagsiksik sa Mormon.org kabahin sa may mga kakulangan ug nakita ang among video. Kini nakapatandog kaniya. Iyang gikontak ang mga misyonaryo, nagkahinabi mi sa tibuok ting-init, ug siya nabunyagan tunga-tunga sa Agosto. Gilantaw namo kini nga usa ka milagro nga ang Ginoo midugtong kanamo tadlas sa kadagatan.”

Mga paghulagway sa litrato pinaagi ni David Stoker