Pagdala sa Primary ngadto sa Panimalay

Ang Napulo ka Sugo Nagtudlo Kanako sa Paghigugma sa Dios ug sa Iyang mga Anak

Imong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Daghan ka og buluhaton karong adlawa! Mihangyo ang imong kaklase kon mahimo ba niyang kopyahon ang imong homework. Gusto kang magmatinuoron, mao nga mibalibad ka apan mitanyag nga imo siyang tabangan.

Sa imong pagpauli, nakita nimo ang imong silingan nga naglisud sa pagbitbit sa dakong basket nga may mga utanon gikan sa iyang hardin. Gusto na kang makauli, apan midagan ka ug gitabangan siya sa pagpasulod sa basket.

Human sa panihapon giingnan ka sa imong papa sa paghimo sa imong homework sa math. Ang math lisud ug dili ka ganahang mohimo niini, apan mihukom kang sundon ang imong papa.

Kapoy na ka pagkagabii, apan miluhod ka ug mipasalamat sa Langitnong Amahan sa imong mga panalangin.

Nahibalo ka ba nga sa paghimo niining tanan nga maayong mga desisyon, gisunod nimo ang Napulo ka Sugo? Human nakaeskapo ang mga Israelite gikan sa Ehipto, nagkinahanglan sila og giya gikan sa Ginoo. Pinaagi sa propeta nga si Moises, gihatagan sa Ginoo ang mga tawo og 10 ka importanting sugo nga pagasundon alang sa matarung nga pagpakabuhi. Ang Napulo ka Sugo nagtudlo mahitungod sa pagtahud sa Dios, pagkamatinuoron, pagtahud sa atong mga ginikanan, pagbalaan sa Adlawng Igpapahulay, ug pagkamaayong mga silingan. Kini nga mga balaod importante gihapon karon sama kaniadtong liboan na ka tuig ang milabay. Kon sundon nato ang mga sugo sa Ginoo, makakat-on kita sa paghigugma ug pagtahod sa Dios ug sa pagkamabination ug kamahigugmaon sa tanan.

Kanta ug Kasulatan

• “Sunda ang Kasugoan,” Songbook sa mga Bata, 68–69.

• Doktrina ug mga Pakigsaad 42:29

Ikaw Lang

Makita nimo ang Napulo ka Sugo diha sa Exodo 20. Maihap ba nimo ang tanang 10? Markahi kini gamit ang lapis nga pangmarka kon ganahan ka.

Kalihokan sa CTR: Pagsunod sa mga Sugo

Ang Napulo ka Sugo mabahin ngadto sa tulo ka importanting mga kategoriya: (1) pagtahud sa Dios, (2) pagtahud sa mga ginikanan ug pamilya, ug (3) pagtahud sa uban.

Guntinga ang tulo ka label nga naa sa ubos. Mahimo nimong ipapilit kini sa mga garapon o bag o ibutang kini sa lamesa. Sa managlahing piraso sa papel, pasulata ang mga sakop sa pamilya og pipila ka maayong butang nga ilang gihimo o nakita nga gihimo sa uban sa miaging semana sa pagsunod og usa ka sugo. Tingali mipakita ka og pagtahud atol sa pag-ampo, o tingali ang imong igsoon mitabang sa inyong ginikanan sa pag-andam og panihapon.

Basaha ang usa sa mga papel ug dayon hukmi ninyo kon asa nga kategoriya kana nga kasinatian nasakop. Ibutang ang papel sa garapon o sa bag o ibutang kini tapad sa label diha sa lamesa. Basaha usab ang tanang papel ug ibutang kini diha sa husto nga mga kategoriya. Ang ubang mga kasinatian mahimong mohaum sobra sa usa ka kategoriya.

Pagtahud sa Dios

Pagtahud sa mga Ginikanan ug Pamilya

Pagtahud sa Uban

Paghulagway pinaagi ni Scott Greer