Ang mga Panalangin sa Pag-focus diha sa Templo

Ni Joshua J. Perkey

Mga Magasin sa Simbahan

Walay laing mas mahinungdanong buhat kaysa pagtukod og mahangturong pamilya—ug kana nga buhat matuman diha sa balay sa Ginoo.

Pipila lang ka mga butang sa kinabuhi ang makaapekto kanato nga labawng mahinuklugon kaysa pagkamatay sa usa ka minahal. Nakasinati niini sila si Bishop Richard Rodriguez ug iyang asawa, si Ruth. Apan uban sa mga mata sa pagtan-aw ug mga dalunggan sa pagpatalinghug ug pinaagi sa sagradong mga ordinansa sa templo, ilang giatubang kini nga hagit nga may hugot nga pagtuo, nga mas nakapaduol kanila sa Manluluwas, sa kalipay, ug sa kalinaw.

Pagdumala kon may Mamatay

Sila si Richard ug Ruth nagkaila-ila samtang nagtrabaho sa usa ka kompaniya nga naghimo og semento sa Azogues, usa ka gamayng lungsod sa Andes Mountains duol sa Cuenca, Ecuador. Si Richard usa ka kinabig sa Simbahan, kauban sa iyang inahan ug igsoong lalaki mga pipila lang ka tuig ang milabay. Niadtong higayona, si Ruth dili pa miyembro.

“Sa dihang akong nakaila si Ruth, dili nako makabiya kaniya,” miingon si Richard, nga nagpahiyum.

Naminyo sila niadtong 1996. Mga pipila lang ka bulan ang milabay, namatay ang amahan ni Ruth.

“Ang iyang kamatayon mao ang rason sa tumang depresyon sa akong kinabuhi,” mipasabut si Ruth. “Dili gyud nimo makalimtan ang pagkamatay sa usa ka minahal. Mabati gyud nimo kanunay ang ilang pagkawala.”

Niadtong 2001, ang inahan ni Richard namatay. Usab, ang pagkamatay nagdala og tumang kasubo. Apan sulod sa mga katuigan, mas milambo ang kahibalo ug pagpamatuod ni Richard sa ebanghelyo, ug kana nakahatag og makahupay nga panglantaw.

“Tungod sa ebanghelyo,” siya miingon, “Nasabtan nako og gamay ang kahimtang sa akong inahan. Gipakigbahin nako ang Alma 40:11 ngadto kang Ruth ug gipasabut kon unsa ang mahitabo sa espiritu kon kini mobiya sa lawas. Kini nakahatag og dakog kahupayan namong duha.”

Paghatag og Bili sa Kabubut-on

Bisan pa man, si Ruth dili gihapon interesado sa Simbahan, bisan tuod siya mahigalaon sa mga miyembro sa Simbahan ug sa mga misyonaryo. “Wala lang nako batia ang panginahanglan nga usabon ang akong tinuohan,” siya miingon.

Si Richard mihukom nga dili siya pugson. “Kada higayon nga maghisgut kami og Simbahan, bati ang paingnan sa among panag-istoryahanay,” siya miingon. “Ug kon ako siyang pugson, bati ang kapaingnan. Busa gihunong nako. Dili ko gusto nga buhaton kini ngadto kaniya.”

Sa tinglarag sa 2011, ang mga misyonaryo midapit ni Ruth sa usa ka bunyag. Ang iyang desisyon sa pagdawat sa imbitasyon nakapausab sa tanan.

Sa bunyag, ang sister nga gibunyagan nagpamatuod. “Siya naghisgot kabahin sa mga milagro nga nanghitabo sa iyang kinabuhi sukad nga iyang nahibaloan ang Simbahan—mga milagro sa panglawas, pagkamaayo, ug kalig-on,” mihinumdom si Ruth. “Kini nga sister nag-inusarang nagpuyo apan nakabaton niini nga pagpamatuod.”

Si Ruth natingala sa unsang paagi kini nga bayhana nga nag-atubang og lisud nga mga pagsulay nakabaton og ingon ana nga matang sa pagtuo. Kadto nga pangutana ug pagsunod sa imbitasyon sa pagtambong sa bunyag nakatandog sa kasingkasing ni Ruth ug nakaandam kaniya sa pagdawat og saksi gikan sa Espiritu.

“Mao kadto ang higayon nga nakadesisyon ko nga magpabunyag. Sa wala madugay, sa dihang kami lang duha ni Richard, miingon ko, ‘Richard, unsay imong hunahuna kon magpabunyag ko inigka-Disyembre?’ Ug mao na kadto. Pamilyar nako sa Simbahan ug sa ebanghelyo. Apan gikinahanglan gihapon nako nga maminaw sa mga diskusyon sa mga misyonaryo.”

“Ang Dios moandam sa kasingkasing sa katawhan,” dugang ni Richard. “Kita mismo makahimo og pipila ka mga butang. Naghimo og daghang mga butang, apan kini natuman sa dihang andam na si Ruth.”

Si Ruth miuyon: “Daghan kong mga hagit nga gibuntug sa dihang nagminyo mi. Ug sa dihang nabuntog na nako kadtong mga hagit, diha lang ko nakaamgo nga dili nako kinahanglang magpaabut og laing milagro sa akong kinabuhi. Andam nako nga magpabunyag.”

Pag-atubang sa mga Hagit uban sa Hugot nga Pagtuo

Ang bunyag ni Ruth niadtong Disyembre 2001 nagtimaan sa kausaban sa focus sa ilang pamilya. Kana nga kausaban naghatag og espiritwal nga kalig-on ug mga panalangin nga naggiya kanila hangtud karon.

“Kami na-sealed sa templo niadtong Hunyo 28, 2003,” miingon si Richard. “Tungod niana, daghang mga panalangin ang miabut sa among kinabuhi. Ang among una ug ikaduha nga mga anak na-sealed kanamo, ug ang among ikatulo ug ikaupat natawo ubos sa pakigsaad. Ang among mga anak panalangin.”

Si Richard mipasabut nga ang matinud-anong pagserbisyo sa Simbahan nagdala og panag-uyon sa among panimalay: “Ang akong asawa ug ako patas nga nagtinabangay. Among giatubang ang mga hagit ug mga pagsulay, ug nagkahiusa kami sa pagsulbad niini. Kami nagtuo sa samang mga butang. Tungod kay na-sealed na sa templo, kami nasayud nga kon kami matinud-anong molahutay, ang Ginoo motabang kanamo.”

Pag-focus sa Templo Makausab sa Ward

Sa dihang nabunyagan si Ruth, 25 lang ka miyembro ang anaa sa Azogues Branch. Karon usa na ka ward, kanunay may 75 o sobra pa ka mga miyembro sa miting sa sakrament.

“Inyong mapalig-on ang indibidwal kon inyong mapalig-on ang mga pamilya,” miingon si Ruth. “Samtang ang mga miyembro mosunod sa mga sugo ug maminaw sa tanang gipangtudlo sa mga lider kanato, atong mapalig-on ang atong mga pamilya ug ang ward. Ingon og ang matag pamilya kabahin sa semento nga naghiusa sa ward aron kini molambo.”

Isip bishop, si Richard nagdasig sa mga paningkamot sa paglig-on sa mga pamilya pinaagi sa paghimo ug pagtuman sa mga pakigsaad sa templo ug sa kanunayng pagsimba diha sa templo. Usa sa pagpakita niining emphasis mao ang mga ward temple trip ngadto sa Templo sa Guayaquil Ecuador, mga lima ka oras ka layo.

“Kami moadto isip ward kutob sa among mahimo,” miingon si Ruth. “Ang among tumong mao nga ang tanang pamilya ma-sealed sa templo.”

“Ang pag-adto sa templo aron ma-sealed nakatabang sa mga pamilya nga molambo sa espiritwal nga paagi,” midugang si Richard. “Bag-ohay lang, pipila ka mga pamilya ang na-sealed. Ug karon sila nag-andam sa mga ngalan sa ila mismong pamilya ug nagpahigayon og mga ordinansa alang sa ilang katigulangan. Kadtong nagbuhat niini nakapalambo og mas dakong pasalig sa ebanghelyo ni Jesukristo ug nakakaplag og mas dakong kalipay. Ang templo nakapausab sa panan-awon sa mga miyembro.”

Pag-focus sa Templo Makausab sa mga Indibidwal

Pinaagi sa sagrado, personal nga mga kasinatian, ang pamilyang Rodriquez nakaangkon og gamhanan, personal nga pagpamatuod sa mga pakigsaad sa templo ug sa pagpahigayon og gitugyan [vicarious] nga buhat alang sa katigulangan.

“Among napahigayon ang buhat alang sa akong mga uyoan ug iyaan, mga igsoon sa akong amahan,” miingon si Ruth. “Among nabati nga kinahanglan mangunay sa pagbuhat niini alang sa among pamilya. Nasayud ko nga ang vicarious work nga atong gihimo tinuod. Mibati ko og dakong kalinaw sa buhat nga atong gipangbuhat alang sa atong katigulangan. Kini nahimong labing mahinungdanon nga buhat.”

Si Richard mipamatuod, “Ganahan kaayo ko sa paghimo sa buhat diha sa templo alang niadtong nagpaabut. Kini ang buhat sa atong tibuok kinabuhi. Kini mao ang gusto namong buhaton.”

Ang pagtambong sa templo nakapausab sa ilang pamilya. “Sa dihang kami na-sealed sa templo, daghan kaayong mga butang ang nausab,” miingon si Ruth. “Ang among espiritwal nga kalig-on milambo.”

Si Richard miuyon: “Alang sa among pamilya, kini nagpasabut nga mas magkahiusa ang pamilya, nasayud nga ang kasuod sa pamilya, nga mao gayud ang sinugdanan ug katapusan sa tanang butang, naghatag kanato og kalig-on sa pagpadayon. Sa kinabuhi, kanunay may mga hagit. Apan inubanan sa pag-focus nga gihatag sa templo kanato, atong maatubang ang umaabot sa talagsaong paagi. Ang pagpakigbahin niining mga panalangin—ug ilabi na sa pagtabang sa ubang pamilya sa pagbuhat usab niini—makahatag og hingpit nga kalipay sa atong kinabuhi. Mibati ko og dakong pasalig sa akong pamilya.”

Si Richard mibati nga ang desisyon sa pamilya nga moadto sa templo, modawat sa mga ordinansa, ma-sealed, ug dayon mobalik aron sa pagpahigayon sa mga vicarious work alang sa ilang katigulangan mao ang usa sa ilang labing dako nga panalangin. “Kon kita mogamit og hugot nga pagtuo ug modawat sa gipahiuli nga ebanghelyo ni Jesukristo ug ilabi na kon kita moadto sa templo aron sa pagdawat sa sealing ug sa makaluwas nga mga ordinansa pinaagi sa priesthood, ang mga kinabuhi mausab,” miingon siya. “Kon ang usa ka tawo modawat sa mga pakigsaad sa templo, mausab na gyud siya.”

Sa ibabaw: Sila si Richard ug Ruth Rodriguez uban sa ilang mga anak (gikan sa wala): Maria Judith, Jorge, Richard Jr., ug Freddy. Sila na-sealed sa Templo sa Guayaquil Ecuador (sa tuo).

Litrato sa pamilya pinaagi ni Joshua J. Perkey