Ang mga Relief Society sa tibuok Kalibutan Nagsaulog sa ika-170 nga Anibersaryo
Sa pagpasidungog sa ika-170 nga anibersaryo sa organisasyon sa Relief Society, ang mga sister sa tibuok kalibutan aktibong miapil sa serbisyo ug sa ubang mga kalihokan nga naglambigit kanila diha sa buluhaton sa organisasyon.
Niadtong Pebrero, ang kinatibuk-ang kapangulohan sa Relief Society midapit sa tanang mga sister sa tibuok kalibutan, nagsugyot og walo ka posibleng padayon nga mga kalihokan alang sa pagsaulog sa anibersaryo—nga nahitabo sa Sabado, Marso 17, 2012. Ang mga kalihokan mahimong maplano ubos sa direksyon sa lokal nga mga lider sa priesthood.
Ang mga sister sa tibuok kalibutan misanong. Ang sunod nga nahitabo mao ang mubo nga nindot nga mga talan-awon gikan sa pipila ka mga pagsaulog nga nahitabo sa tibuok Simbahan.
Dominican Republic
Ang mga sister sa Primavera First Branch sa La Vega Dominican Republic District gipahinumduman sa mga babaye nga wala maghunahuna sa kaugalingon nga gikan sa unang kasaysayan sa Santos sa Ulahing mga Adlaw ug sa ilang malahutayong kabilin pinaagi sa pagsaulog sa branch niadtong Marso 17.
Ang kada sister kinsa miapil nagsinina sa estilo sa mga pioneer ug nakigbahin og mensahe mahitungod sa Relief Society. Si María Elena Pichardo de Gómez, unang magtatambag sa kapangulohan sa Relief Society, mipahinumdom sa mga sister sa ilang responsibilidad sa pagpangandam alang sa malisud nga mga panahon, ingon nga gitudlo sa mga propeta karon. Midugang siya, “Ang talagsaong kalig-on sa Primavera First Branch Relief Society anaa sa among kalahi sa usag usa apan nagkahiusa diha sa samang ebanghelyo.”
Fiji
Nagsunod sa tambag sa kinatibuk-ang kapangulohan sa Relief Society “nga ang Relief Society moserbisyo diha sa komunidad,” ang Relief Society sa Samabula Ward sa Suva Fiji North Stake milusad og nagpadayong proyekto nga gitawag og “Paghimo og Kalainan—Ang Gugmang Putli Dili Gayud Mopakyas.” Ang kada sister sa ward mihimo og tumong sa paghimo og buhat sa serbisyo, gugma, o pagkamabination 170 ka beses—ngadto sa nagkalainlaing mga tawo—sa mga katapusan sa Septyembre 2012.
Ang ward naghimo usab og kalihokan sa pagtabang sa mga sister nga mas makasabut ug makadayeg sa mga kinabuhi ug mga kontribusyon sa tanang kinatibuk-ang mga presidente sa Relief Society, gikan ni Emma Smith hangtud karon.
Hong Kong
Sa Hong Kong, ang mga sister gikan sa New Territories Stake misaulog sa anibersaryo sa Relief Society pinaagi sa pagpamalandong sa personal nilang kasaysayan ug sa kasaysayan sa Relief Society.
Naghimo sila og mga exhibit, nga ang tema “Pagpangita sa Grasya,” diin ilang gipasundayag ang karaan nga litrato sa mga misyonaryo, mga rekord sa pamilya, mga painting, ug mga hinimo sa kamot nga butang sa miaging mga kalihokan sa Relief Society, lakip ang mga parol ug mga pabo nga hinimo sa pulang papel nga mga pocket, binurdahan, mga key chain, ug mga pitaka.
Kenya
Sa Bamburi Branch sa Kenya Nairobi Mission, ang mga sister sa Relief Society, mihatag og kwarta nga ila untang gastuhon alang sa usa ka kalihokan apan ilang gipalit hinoon og mga gamit sa kusina ug ubang mga butang nga gikinahanglan sa branch. Human sa paglimpyo og maayo sa lokal nga meetinghouse, ang mga sister sa ward nagpundok alang sa panahon sa pagpamalandong kabahin sa pagtukod sa Relief Society kaniadtong 1842, naggamit ug naghisgot sa mga kapanguhaan gikan sa Anak nga mga Babaye sa Akong Gingaharian: Ang Kasaysayan ug Buhat sa Relief Society.
“Ang hunahuna nga kabahin niining tibuok kalibutan nga organisasyon sa Relief Society nindot kaayo,” miingon si Irene Kioi, ikaduhang magtatambag sa kapangulohan sa Relief Society. “Kini naghatag kanako og kasigurohan nga ang [Relief Society] gi-orden sa Dios ug dili sa mga tawo.”
Sa Mombasa Branch, ang mga sister nagtuon mahitungod sa babaye nga mga disipulo ni Jesukristo gikan sa Anak nga mga Babaye sa Akong Gingharian ug sa Bag-ong Tugon. Ang presidente sa Relief Society sa branch, si Jael Mwambere, miingon, “Kini mao ang among unang anibersaryo sa Relief Society sa Mombasa Branch. Akong panghinaut nga unta kitang tanan magsugod pagbag-o sa atong pag-unong ngadto sa atong mga katungdanan sa Relief Society. Hinaut nga kita moamuma sa usag usa, motambong sa atong mga miting sa Simbahan, ug motabang niadtong nanginahanglan, sugod karon.”
Republika sa Marshall Islands
Niadtong Sabado, Marso 17, gatusan ka mga sister gikan sa Ajeltake Branch, Laura Ward, ug Long Island Majuro Ward sa Majuro Marshall Islands Stake nag-abut sa Rairok, usa ka lungsod duol sa Majuro Atoll, sa alas 4:30 sa buntag. Ang rason: ilang gilakaw sulod sa usa ka oras ug tunga ang meetinghouse sa Delap sa pagpakita sa hiyas sa paglahutay. Sa wala madugay nag-abut sila sa mga sister sa Delap ug Rita Wards, kinsa milakaw usab ngadto sa meetinghouse, alang sa debosyonal ug pamahaw. Sa wala madugay ang mga sister mipasundayag og mga skits ug mga sayaw ug naminaw sa pakigpulong gikan sa presidente sa stake.
Spain
Ang Dos Hermanas Ward sa Seville Spain Stake nagpakita og exhibit sa kasaysayan sa Relief Society sa ward ug gilakipan og usa ka talagsaong libro sa mga litrato sa serbisyo ug mga kalihokan nga magkaubang gibuhat sa mga sister sa panahong nanglabay.
Si María Pérez Sánchez, ang unang magtatambag sa kapangulohan sa Relief Society, miingon, “Ang [maka] himo sa pag-apil sa anibersaryo niini nga organisasyon nagpabati kanako nga mas duol ngadto sa pioneer nga mga babaye kinsa misakripisyo og maayo alang kanato. Ug karon, ning adlawa, kita makapadayon sa pagbuhat niining buluhaton nga ilang gihimo.”
Ang Estados Unidos
Didto sa Gardner Ward sa Springfield Massachusetts Stake, gisaulog sa mga sister ang ika-170 nga anibersaryo sa Relief Society sa usa ka panihapon nga gihimo niadtong Marso 15. Ang gabii naglakip og mga pasundayag gikan sa upat ka mga sister, ang kada usa namulong mahitungod sa usa ka babaye kinsa miimpluwensya sa iyang kinabuhi sa maayong paagi. Ang kada mamumulong nagdala usab og gamay nga butang sa pagpakita og gibug-aton sa iyang pasundayag.
“Kini usa ka kalihokan nga mipalambo sa kalig-on ug katakus sa mga kababayen-an,” miingon si Jennifer Whitcomb, presidente sa Relief Society, “ug usab nag-awhag kanato sa pagtan-aw sa mga kalig-on, kasusama, ug katakus sa usag usa.”
Bisan tuod nga ang anibersaryo mismo milabay na, ang pagdapit alang sa mga sister sa paghimo og serbisyo ug ubang mga kalihokan sa pagsaulog magpadayon sa tibuok 2012.
Ang Relief Society sa Samabula Ward sa Suva Fiji North Stake naghimo og kalihokan sa pagtabang sa mga sister nga mas makasabut ug makadayeg sa mga kinabuhi ug mga kontribusyon sa tanang kinatibuk-ang mga presidente sa Relief Society, gikan ni Emma Smith hangtud karon.
Gilitratohan ni Evonne Inia-Taufaga