Mga Istorya kabahin ni Jesus
Si Jesus Mibisita sa mga Nephite
Gikan sa 3 Nephi 8–12.
Sulod sa tulo ka adlaw mitabon ang grabing kangitngit didto sa yuta sa mga Nephites. Walay bisan gamayng tipik sa kahayag sa adlaw o kidlap sa bitoon. Hilabihan kangitngit nga walay bisan usa ka kandila ang mosiga.
Ang nahadlok nga mga Nephite nakabati sa dalugdog ug sa grabe nga unos ug mibati sa mga linog nga mitay-og sa yuta. Karon diha sa kangitngit daghang tawo ang nanghilak ug nagdanguyngoy. Naghandom sila nga unta ilang gisunod ang mga gitudlo ni propeta Nephi ug naghinulsol!
Sa kalit usa ka tingog ang nadungog sa tibuok yuta: “Tan-awa, Ako mao si Jesukristo ang anak sa Dios. Ako ang naglalang sa mga langit ug sa yuta, ug sa tanan nga mga butang nga anaa diha kanila. Ako uban sa Amahan sukad sa sinugdanan.”
Miingon si Jesus nga mianhi Siya sa yuta aron pagluwas sa kalibutan gikan sa sala. Gihatag Niya ang Iyang kinabuhi ug karon nabanhaw. Gidapit Niya ang tanan sa paghinulsol ug maluwas.
Natingala kaayo ang mga Nephite nga makadungog ni Jesus nga nanglingkod sila nga hilom sulod sa daghang oras, namalandong sa ilang nadungog.
Pagkabuntag, hayag na usab, ug nagsugod sa pagmaya ang mga tawo. Daghang tawo ang nagpundok libut sa templo sa yuta sa Bountiful sa paghisgot mahitungod sa katingalahang mga butang nga nahitabo. Dayon gikan sa langit nadungog nila ang hinay nga tingog. Mipainit sa ilang dughan ang tingog, apan dili sila makasabut.
Nadungog na usab ang tingog, apan wala gihapon nila masabti ang mga pulong.
Sa ikatulong higayon nadungog ang tingog, nag-ingon, “Tan-awa ang akong Hinigugmang Anak, kinsa Ako nahimuot kaayo, kang kinsa Ako mihimaya sa akong ngalan—paminaw kamo kaniya.”
Mihangad ang mga tawo ug nakita si Jesus nga mikunsad gikan sa langit hangtud nga nagbarug diha gayud uban kanila. Ang mga Nephites mihapa sa yuta. Nahinumduman nila ang mga pulong sa mga propeta—nga si Jesukristo mobisita kanila human sa Iyang paglansang ug pagkabanhaw.
Gipahikap ni Jesus ang tanang tawo sa Iyang kamot ug tiil aron mabatyagan ang mga gilansangan Kaniya sa krus didto sa Jerusalem. Dihang nakita sa mga tawo ug nabatyagan sa ilang kaugalingon, nahibalo sila nga Siya ang nabanhaw nga Manluluwas. Naninggit sila, “Hosana!” ug misimba Kaniya.
Gitawag ni Jesus si propeta Nephi sa pagduol Kaniya. Gihatagan Niya og awtoridad si Nephi ug ang 11 ka ubang matarung nga mga tawo sa pagtudlo ug pagbunyag human Siya mibalik sa Langit. Kining 12 nahimo nga mga disipulo sa Simbahan ni Jesukristo sa Bag-ong Kalibutan.
Aron Masayud Kamo, ni Gary Kapp © 2004, dili pakopyahan; paghulagway sa litrato pinaagi ni Jed A. Clark