Alang sa Kalig-on sa mga Kabatan-onan
Kabubut-on ug Pagkamay-tulubagon
Dunay sugilanon kabahin sa tigulang nga Cherokee nga nagtudlo sa iyang apo mahitungod sa kinabuhi. “Adunay panagbugno sa sulod kanako,” miingon siya sa batang lalaki.
“Grabe kini nga bugno, ug tali kini sa duha ka matang sa lobo. Ang usa dautan: kini mao ang kasuko, kasina, kasubo, pagmahay, kahakog, kaarogante, pagkalooy sa kaugalingon, pagbati nga sad-an, kapungot, kaubos, pagpamakak, sayop nga garbo, pagka-superyor, ug kahambog.”
Mipadayon siya, “Ang usa maayo: kini mao ang kamaya, kalinaw, gugma, paglaum, kahapsay, kamapainubsanon, kamabination, kamaayo, kamasinabuton, kamanggihatagon, kamatuoran, kamanggiloy-on, ug hugot nga pagtuo. Ang sama nga panagbugno naa usab sulod kanimo—ug naa usab sa matag tawo.”
Paghulagway pinaagi ni Allen Garns
Naghunahuna sa makadiyot ang apo mahitungod niini ug dayon nangutana sa iyang lolo, “Asa nga lobo ang magmadaugon?”
Ang tigulang nga Cherokee yanong mitubag, “Kadtong imong gipakaon.”
Kabubut-on ug Pagkamay-tulubagon
Dugay na kaayo nga panahon kaniadto, sa didto pa kita sa presensya sa Langitnong Amahan, dunay Dakong Konseho nga gihimo. Niana nga konseho ang atong Amahan, nagtinguha nga makabaton kita sa samang kamaya ug kalipay nga Iyang gitagamtam, mipresentar sa Iyang plano diin kita makaanhi sa yuta, makabaton og pisikal nga lawas, ug makasinati sa kasakit ug kanindot niini nga kinabuhi. Makapili kita sa pagsunod sa Iyang mga sugo ug mahisama Kaniya o mopili sa dili pagsunod sa mga sugo ug ihikaw sa atong kaugalingon ang kalipay ug mga panalangin nga Iyang gisaad.
Ang pinakasentro nga bahin sa plano sa atong Amahan mao nga kita gawasnon sa pagpili. Kini nga gasa gitawag og kabubut-on, ang gahum sa pagpili. Ang kauban sa kabubut-on mao kanunay ang pagkamay-tulubagon. Tagsa-tagsa kitang responsable sa mga pagpili nga atong gibuhat.
Dihang nangutana ang Langitnong Amahan kon kinsa ang mopahigayon sa plano, mitanyag si Lucifer nga maoy motubos sa tanang tawo ubos sa iyang mga kondisyon, diin dili magamit ang kabubut-on ug iyaha ang tanang himaya. Makaguba kini sa plano sa Dios alang sa mahangturon nga kalipay.
Gitanyag ni Jesukristo ang Iyang Kaugalingon nga mahimong Manluluwas diha sa plano sa Amahan. Gipili Niya ang pagsunod sa plano sa Amahan. Atong gisalig ang atong hugot nga pagtuo ngadto sa atong magulang nga si Jesukristo, nahibalo nga ang Iyang misyon mahinungdanon aron makabalik kita sa gingharian sa Amahan.
Unsay nahitabo ni Lucifer? Ang Amahan miingon:
“Busa, tungod kay si Satanas misukol batok kanako, ug nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya, ug usab, nga Ako kinahanglan nga mohatag ngadto kaniya sa akong kaugalingon nga gahum; pinaagi sa gahum sa akong Bugtong Anak, Ako nagsugo nga siya isalikway;
“Ug siya nahimo nga Satanas, oo gani ang yawa, ang amahan sa tanan nga mga bakak, sa pag-ilad ug pagbuta sa mga tawo, ug pagdala kanila nga ulipon sa iyang pagbuot, gani kutob sa dili maminaw ngadto sa akong tingog” (Moises 4:3–4).
Tungod kay ang kabubut-on usa man ka mahangturon nga baruganan ug ang Langitnong Amahan dili mosupak niini, nawala Kaniya ang ikatulo nga bahin sa Iyang mga anak, kinsa mipili nga mosunod kang Satanas.
Kabubut-on ug Pagka-mortal
Unsa diay ang tuyo sa kinabuhi dinhi sa yuta? Usa ka importanting tuyo mao ang pagmatuod sa atong kamatinud-anon (tan-awa sa Abraham 3:24–25). May katakus kita sa pag-ila sa husto gikan sa sayop. Gihatagan kita og gahum gikan sa Dios “sa pagbuhat … ug nga dili pagaaghaton” (2 Nephi 2:26). Sa katapusan, makadawat kita sa gingharian nga atong gitinguha sumala sa mga sugo nga atong gituman, sa mga ordinansa nga atong nadawat, ug mga pakigsaad nga atong gituman.
Sama sa gipasabut sa tigulang nga Cherokee, anaa ra kaniya kon asa nga lobo ang iyang pakaunon. Siya dunay kabubut-on, ug bugtong siya lang ang manubag sa iyang pagpili. Iya gayud ang mga sangputanan sa iyang pagpili.
Kamo ang mga batan-on sa dungganon nga katungod sa pagkatawo. Gipadala kamo dinhi sa yuta samtang ang kahingpitan sa ebanghelyo ania dinhi. Gibunyagan kamo ug gikumpirmahan aron kamo makadawat, kon inyong tinguha, ang Espiritu Santo isip kanunay ninyong kauban. Mihimo kamo og mga pakigsaad sa bunyag. Ug mga batan-ong lalaki, may dugang pa kamo nga mga pakigsaad sa priesthood.
Duna kamoy kabubut-on sa pagpili sa kinabuhing dayon pinaagi sa pagpuyo nga limpyo og takus nga mosulod sa balaang templo sa Dios ug makadawat sa mga ordinansa nga magtugot kaninyo nga makabalik sa presensya sa Amahan. Makapili kamo sa panalangin nga kinabuhing dayon, sa pagpakabuhi sama sa pagpakabuhi sa Dios alang sa tanang kahangturan uban sa inyong pamilya. Duna kamoy potensyal nga makadawat sa tanan nga anaa sa Amahan. Kamo ang magpili.
Gamita sa maalamon ang hinatag sa Dios nga kabubut-on.