Mensahe sa Unang Kapangulohan
Kinasingkasing nga Pagpakigbahin sa Ebanghelyo
Ang Dios moandam og mga tawo nga modawat sa ebanghelyo ngadto sa Iyang andam nga mga sulugoon nga gustong mosangyaw niini. Kini nahitabo mismo sa inyong kinabuhi. Kon kapila kini mahitabo mag-agad sa pagpangandam sa inyong hunahuna ug kasingkasing.
Ako adunay higala nga nag-ampo kada adlaw nga makahimamat og usa ka tawo nga andam modawat sa ebanghelyo. Siya nagdala og kopya sa Basahon ni Mormon. Pagkagabii sa wala pa siya mobiyahe, siya mihukom nga dili magdala og kopya apan pass-along kard lang. Apan sa dihang molakaw na siya, mibati siya og espiritwal nga impresyon. “Pagdala og Basahon ni Mormon.” Nagbutang siya og usa niini sa iyang bag.
Sa dihang ang usa ka babaye nga iyang kaila mitapad kaniya atol sa biyahe, siya naghunahuna, “Siya na ba kaha?” Nagkasakay na usab sila sa pagbalik. Siya naghunahuna, “Unsaon nako sa paghisgut kaniya sa ebanghelyo?”
Apan, ang iyang kaila miingon kaniya, “Di ba, nagbayad mo og ikapulo sa inyong simbahan?” Siya miingon nga siya nagbayad. Ang iyang kaila miingon nga angay unta siyang mobayad og ikapulo sa iyang simbahan apan wala kini buhata. Dayon ang iyang kaila nangutana, “Unsa ang imong masulti kanako kabahin sa Basahon ni Mormon?”
Iyang gipasabut nga ang basahon usa kasulatan, lain nga saksi ni Jesukristo, gihubad ni Propeta Joseph Smith. Ingon og interesado ang iyang kaila, busa iyang gikuha ang iyang bag ug miingon, “Nadasig ko nga dalhon kining basahon. Para kini sa imoha.”
Nagsugod ang iyang kaila sa pagbasa niini. Sa ilang panagbulag, ang iyang kaila miingon, “Ikaw ug ako maghisgut pa kabahin niini.”
Ang wala masayri sa akong higala—apan nasayud gyud ang Dios—nga ang iyang kaila nangita og simbahan. Ang Dios nasayud nga ang babaye nagtan-aw sa akong higala ug natingala nganong ang simbahan sa akong higala nakapalipay kaniya og maayo. Ang Dios nasayud nga siya mangutana kabahin sa Basahon ni Mormon ug siya andam nga matudloan sa mga misyonaryo. Siya giandam. Mao sab ang akong higala. Kamo ug ako mahimong andam usab.
Ang pagpangandam nga atong gikinahanglan anaa sa atong hunahuna ug kasingkasing. Ang babaye nakadungog ug nakahinumdom sa mga pulong kabahin sa Basahon sa Mormon, ang gipahiuli nga Simbahan sa Ginoo, ug ang kasugoan sa pagbayad og ikapulo ngadto sa Dios. Ug siya nagsugod sa pagbati sa pagsaksi sa kamatuoran diha sa iyang kasingkasing.
Ang Ginoo miingon nga Iyang ipadayag ang kamatuoran diha sa atong hunahuna ug kasingkasing pinaagi sa Espiritu Santo (tan-awa sa D&P 8:2). Kadaghanan sa mga tawo nga inyong mahimamat nakasugod na nianang pagpangandam. Sila nakadungog o nakabasa kabahin sa Dios ug sa Iyang pulong. Kon humok ang ilang kasingkasing, ilang mabati, bisan pa unsa ka hinay, ang kumpirmasyon sa kamatuoran.
Ang babaye andam na. Mao usab ang akong higala, ang Santos sa Ulahing Adlaw kinsa nagtuon sa Basahon ni Mormon. Iyang nabati ang pagsaksi nga kini tinuod, ug iyang naila ang pagdasig sa Espiritu sa pagdala og kopya. Siya andam sa iyang hunahuna ug kasingkasing.
Ang Dios nag-andam og mga tawo nga modawat sa inyong pagpamatuod sa gipahiuling kamatuoran. Siya nagkinahanglan sa inyong hugot nga pagtuo ug dayon sa inyong aksyon nga mopakigbahin sa walay pagkahadlok niadtong nahimo nga bililhon kaayo kaninyo ug sa inyong gimahal.
Pangandam sa pagpakigbahin pinaagi sa pagpuno sa inyong hunahuna kada adlaw sa mga kamatuoran sa ebanghelyo. Samtang kamo nagsunod sa mga sugo ug nagtuman sa inyong mga pakigsaad, inyong mabati ang pagpamatuod sa Espiritu ug gugma sa Manluluwas alang kaninyo ug niadtong inyong mahimamat.
Kon inyong buhaton ang inyong bahin, kamo mas makasinati og matam-is nga mga kasinatian sa pakighimamat sa mga tawo nga andam maminaw sa inyong pagpamatuod sa kamatuoran—kinasingkasing nga itanyag, gikan kanimo ngadto kanila.
Pagtudlo Niini nga Mensahe
Ikonsiderar ang pagbasa sa mensahe uban sa pamilya ug hisguti ang ikaduha gikan sa katapusan nga paragraph, diin si Presidente Eyring naghisgut og mga pamaagi sa paglig-on sa pagpamatuod. Hisguti uban sa pamilya ang importansya sa pagpamatuod kon mopakigbahin sa ebanghelyo. Tingali makatabang sa mga bata nga i-role-play unsaon sa pagpamatuod ngadto sa mga higala.
Paghulagway pinaagi ni Dan Burr
Paghulagway sa litrato pinaagi ni Christina Smith © IRI; mga paghulagway pinaagi ni Adam Koford