Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Pagpalambo og Pagtuo diha kang Kristo,” sa pahina 12: Sa katapusan sa artikulo, namulong si Elder Christofferson mahitungod sa hugot nga pagtuo isip usa ka baruganan sa lihok ug gahum. Isip usa ka pamilya, hunahunaa ang paghisgot og pipila ka mga hagit nga inyong giatubang ug mga tumong nga inyong buhaton sa pagbuntog niini. Pagpili og usa ka tumong nga buhaton niining semanaha, maghinumdom nga uban sa tabang ni Jesukristo, kita adunay gahum sa pagbuhat sa tanan nga mga butang, sumala sa Iyang kabubut-on ug panahon. Sa sunod nga family home evening, gusto tingali ninyong hisgutan ang pag-uswag sa inyong pamilya kabahin sa tumong nga inyong gihimo.

“Pagpakigbahin sa Ebanghelyo pinaagi sa Inyong Maayong Ehemplo,” sa pahina 16: Samtang inyong ipakigbahin ang mga istorya gikan sa artikulo, hangyoa ang inyong pamilya sa paghunahuna mahitungod sa mga higala ug mga sakop sa pamilya kinsa mahimo ninyong ipakigbahin ang ebanghelyo. Hisguti kon sa unsa nga paagi nga mahimong usa ka higala ug sa pagpaminaw uban ang gugma aron kon ang mga oportunidad sa pagpamatuod moabut, kamo maandam.

“Ang Pag-ampo nga naa sa Personal nga Kauswagan,” sa pahina 58: Basaha ang kasinatian ni Amalia mahitungod sa pagkat-on og pag-ampo sa buntag ug sa gabii. Hunahunaa ang pagbasa kon unsay gitudlo ni Amulek diha sa Alma 34:17–27 kon unsaon nato sa pag-ampo. Mahimong kamong mangutana og mga sakop sa pamilya kon unsa nga mga pagtulun-an ang gihatag niini nga mga bersikulo mahitungod sa unsaon ug kanus-a kita kinahanglan nga mag-ampo. Tapusa pinaagi sa imong pagpamatuod sa gahum sa pag-ampo.

“Misyonaryo nga Higala,” sa pahina 60: Human sa pagbasa sa artikulo, hunahunaa ang paghimo og lista sa umaabut nga mga kalihokan ug mga miting sa Simbahan nga mahimong mainteresado ang mga higala sa tagsatagsa ka sakop sa pamilya. Mahimong inyong i-role play ang mga paagi sa pagdapit og mga higala diha sa usa niini nga mga kalihokan. Paghisgut kon unsay gipasabut nga mahimong tinuod nga higala, ilabi na niadtong kinsa dili miyembro sa Simbahan. Tapusa pinaagi sa paghimo og plano sa pagkontak sa higala ug sa paghatag og imbitasyon.

Kami Malipayon nga Pamilya

Ang family home evening nga kanunay namong mahinumduman mao kadtong gihimo sa malisud nga panahon. Tungod sa pag-ilis sa pagdumala, ang akong bana miagi og pipila ka mga hagit diha sa trabaho ug gibati nga nawad-an sa kadasig.

Mihukom kami nga ang family home evening niana nga semana himoon sa pagpapasidungog kaniya. Kada sakop sa pamilya misulat kaniya og sulat pasalamat, nagsulti nganong gihigugma namo siya ug unsay among gilaum alang kaniya. Dayon mihimo kami og album sa mga litrato sa pamilya sa importanting mga panahon, sama sa mga anibersaryo, kaminyoon, sealing, pagkatawo, ug ubang mga hitabo. Misulat kami og mga komentaryo sa kada usa, nagtapos sa “Ug busa kami malipayong pamilya.” Sa pagtapos sa gabii, ang akong anak nga babaye ug ako mikanta og awit sa Primary nga naglangkob og samang hugpong sa mga pulong (tan-awa sa “A Happy Family,” Children’s Songbook, 198).

Sa panahon sa family home evening atong mabati ang gugma sa Manluluwas alang kanato ug ang gugma nato alang sa usag usa.

Mapasalamaton ako alang sa dinasig nga sugo sa paghimo og family home evening. Ang pagsunod niini naglig-on kanato, nag-andam kanato nga mahimong mahangturon nga pamilya.

Kenia Duarte dos Santos, Brazil