Mga Lider sa Simbahan Namulong sa mga Gradwasyon sa Hawaii, Idaho ug Utah
Mibiyahe ang mga lider sa Simbahan ngadto sa mga eskwelahan sa Simbahan sa Hawaii, Idaho, ug Utah, USA, sa panahon sa Abril sa paghatag og mga pulong sa tambag ngadto sa mga nanggradwar.
Sa Brigham Young University–Idaho niadtong Abril 7, 2012, si Elder M. Russell Ballard sa Korum sa Napulog Duha ka mga Apostoles mitambag sa mga estudyante sa “pag-ilis sa kahadlok ngadto sa hugot nga pagtuo.”
“Ako nagtuo nga kita hapit na magsugod sa bag-ong panahon sa paglambo, pag-uswag ug pagkaabunda,” miingon siya. “Nag-aghat ako kaninyo sa paghimo og pasalig diha sa inyong kaugalingon ug ngadto sa Langitnong Amahan sa paghalad sa inyong kinabuhi ug sa pagpahinungod sa inyong panahon ug mga talento sa pagtukod sa Simbahan ni Jesukristo agi og pagpaabut sa Ikaduhang Pag-anhi sa Manluluwas.”
Si Elder D. Todd Christofferson sa Korum Napulog Duha ka mga Apostoles mibisita sa LDS Business College sa Siyudad sa Salt Lake, Utah, niadtong Abril 13, 2012, sa pagpamulong sa gradwasyon sa mga estudyante gikan sa 50 ka mga estado sa US ug sa 67 ka mga nasud.
Gihatagan niya og gibug-aton ang panginahanglan sa mga estudyante sa paghatag og serbisyo sa tibuok nilang mga kinabuhi. “Ang serbisyo mao ang inyong panagang batok sa kahakog ug sa pagbati nga mainyo ang unsay inyong gusto nga nagkagrabe sa pagsamok sa mga katilingban sa tibuok kalibutan. … Ang inyong pagserbisyo mopanalangin sa uban, apan kini usab mopanalipod kaninyo,” miingon siya.
Sa pagkasunod adlaw, si Elaine S. Dalton, kinatibuk-ang presidente sa Young Women, mihatag niining mga pulong sa tambag ngadto sa mga estudyante sa BYU–Hawaii: “Hinumdumi kon kinsa kamo.” “Trabaho og maayo.” “Pangandam sa kalisdanan.” “Pagdamgo og dako.” “Ang mga mananaog dili sa kanunay mao ang unang mahuman.”
“Dagana ang inyong lumba sa hugot nga pagtuo ug kinabuhi,” siya miingon. “Ayaw pagpakawala og kadasig sa mga kalisud, apan tan-awa ang oportunidad diha sa kalisdanan. Lakaw uban ang mga lakang nga may pagsalig ug sa usa ka siguro nga kahibalo nga kamo wala gayud mag-inusara. … Hugot akong nagtuo nga ang usa ka mahiyason nga batan-ong lalaki o batan-ong babaye giniyahan sa Espiritu makausab sa kalibutan.”
Niadtong Abril 19, 2012, ang migradwar nga mga estudyante sa BYU sa Provo, Utah, naminaw ni Elder Dallin H. Oaks sa Korum sa Napulog Duha ka mga Apostoles, kinsa namulong mahitungod sa mga hagit sa kalibutan apan misulti sa mga migradwar sa paglantaw ngadto sa umaabut uban sa hugot nga pagtuo.
“Bisan og ang mga tawo nangalisang, kamo kinahanglan nga dili mahadlok. Adunay mahagitong mga panahon kanunay,” miingon si Elder Oaks. “Kami, ang mga henerasyon sa inyong mga katigulangan, milahutay sa malisud nga mga hagit, ug mao usab kamo. … Kita adunay Manluluwas, ug Siya mitudlo kanato kon unsay atong kinahanglan nga buhaton.”
Ang mogradwar nga mga estudyante sa BYU sa Provo, Utah, naminaw ni Elder Dallin H. Oaks sa Korum sa Napulog Duha ka mga Apostoles, niadtong Abril 19, 2012.
Litrato sa Maayong Kabubut-on sa BYU–Provo