Hi! Ako si Timofei gikan sa Kyiv, Ukraine
Ang sayis anyos nga si Timofei nagpuyo sa Kyiv, Ukraine, kapital nga siyudad sa Ukraine ug nahimutangan sa unang templo sa iyang nasud. Mahinamon si Timofei sa bag-ong templo ug sa daghan pang butang. Nalipay kaayo siya dihang nahingo na ang duha niya ka ngipon. Iyang papa ang nag-ibut sa usa didto sa balay sa iyang lola, ug ang usa natagak lamang kini.
Sa eskwelahan nangutana ko sa tulo nako ka higala kon mituo ba sila og Dios. Mitando sila. Miingon ko nga ako usab. Gidapit nako sila sa open house sa templo. Miingon sila, “OK, mangadto mi.”
Niining tuiga nagsugod ko og kat-on sa karate kay ang akong papa ug igsoong mga lalaki nagtuon usab og karate. Nakakat-on ko sa pagsumbag og kusog, pagpanalipod sa kaugalingon, ug pag-alsa og mga bug-at.
Ako ug ang akong igsoong lalaki ganahan nga magporma og balay-balay, awto-awto, ug mga tawo nga gagmay gamit ang among mga building blocks.
Miserbisyo ang akong igsoong mga lalaki sa open house sa templo. Gusto sab unta kong moserbisyo, apan bata pa kaayo ko. Miadto ko kaduha sa open house sa pag-tour sa templo. Ganahan kaayo ko niini.
Sa pagka-summer gitudloan ko sa duha nako ka igsoong lalaki sa pagdula og football. Gitudloan ko nila sa pagdagan diha sa dulaanan ug pagbantay sa goal. Bisan og mas magulang sila, nakigdula ko nila ug sa ilang mga higala.
Ganahan ko sa gagmay nakong dulaang sakyanan. Tungod kay puthaw kini, dili kini mabuak ug maguba. Dugay na kini kanako, ug ingon og wala pa kini mga garas.
Akong idulog sa pagkatulog ang akong mga dulaan. Kon tulog na ang akong mga igsoon, magdula gihapon ko kadiyot sa akong mga dulaan.
Mga litrato pinaagi ni Chad E. Phares