ʻAlu ki he ʻApi Fakamisioná!
Felisieni Tokipou Mopio, Kana
ʻI he pongipongi hili ʻeku foki mai ki Kana mei heʻeku ngāue fakafaifekau ʻi ʻAivouli Kousí, naʻá ku ʻā hake ʻi he 6 pongipongí. ʻE toki fakahoko ʻeku talanoa mo e palesiteni fakasiteikí ke tukuange aú ʻi he hoʻataá, peá u pehē leva ke u toe kiʻi mohe. Lolotonga ʻo e fakaʻau ke u mohé, kuo ake mai ki heʻeku fakakaukaú ha ongo: “ʻAlu ki he ʻapi fakamisiona ʻi Keipi Kousí.” Naʻá ku ʻilo ʻe au ʻa e ʻapi ʻo e Misiona Kana Keipi Kousí, ka naʻe ʻikai haʻaku teitei misi ki he ʻuhinga ʻoku fie maʻu ai ke ʻalu ki ai he pongipongi ko iá.
Hili ʻeku maʻu e ngaahi fakakaukau ko ʻení, naʻe kamata ke u hohaʻa fekauʻaki mo e ongó ni, ko ia naʻá ku ʻalu leva ki he ʻapi fakamisioná. Naʻá ku hohaʻa ʻi heʻeku ʻalú pe ko e hā te u talaange ki he palesiteni fakamisioná. Naʻá ku ʻilo te ne ʻeke mai pe ko e hā e ʻuhinga ʻo ʻeku ʻalu angé, ko ia, naʻá ku kamata teuteu leva ha tali ʻe feʻungá.
ʻI heʻeku aʻu atú, naʻe teʻeki pē ke u ʻilo ha tali. Naʻe fakaafeʻi atu leva au ʻe he palesiteni fakamisioná, Melevini B. Seipi, ki hono ʻōfisí, ʻi he fakakaukau ko ʻeku ʻalu angé ke ne tukuange au. Hili haʻane fai mai ha ngaahi fehuʻi siʻi, ne talamai leva ʻe Palesiteni Seipi ke u ʻalu ki heʻeku palesiteni fakasiteikí ke tukuange au.
Naʻá ku talaange leva, “ʻOku ou ʻiloʻi pē ia, Palesiteni.”
Naʻe kiʻi longo ʻi ha ngaahi momeniti peá ne fai mai leva ʻa e fehuʻi ko ia naʻá ku fāifeinga ke talí: “Ko e hā ʻokú ke ʻi heni ai he pongipongi ní, ʻEletā Mopio?”
Peá u pehē ange, “Palesiteni Seipi, ʻoku ʻikai haʻaku tali lelei ki he fehuʻi ko iá. Naʻá ku maʻu pē he pongipongí ni ha ongo mālohi ke u haʻu ki heni.”
Naʻe toe kiʻi longo ʻi ha momeniti pea lea leʻo siʻi mai, “ʻEletā Mopio, ko hoʻo ʻi hení, ko e tokoni ia naʻá ku lotua ʻaneafi.” Naʻá ne fakamatala mai naʻe toki tau mai hono ongo tokoní mo ha kau faifekau foʻou. Ko ha taha ʻo kinautolu ko ha faifekau mei ʻAivouli, ko e fuofua faifekau lea faka-Falanisē ia kuo faifaiangé peá ne maʻu, pea naʻe ʻikai ke ne ʻilo pe ʻe anga fēfē haʻane fetuʻutaki mo ia. Peá ne toki fakahā mai leva, “ʻOku ou fakapapauʻi naʻe ongona ʻe he Tamai Hēvaní ʻeku loto hohaʻa ʻi he pō ʻaneafí.”
Kuo fāifai peá u ʻilo ʻa e ʻuhinga ʻo e ongo naʻá ku maʻu ʻi he pongipongí. Naʻá ma ō leva ʻo feʻiloaki mo e kau faifekau foʻoú, peá u fakatonulea ki he ʻeletā mei ʻAivoulí ʻi he kamata ʻo ʻene ngāue fakafaifekaú.
Naʻá ku fononga atu ki ʻAivouli Kousi ʻi ha ʻosi ha māhina ʻe fitu mei ai, ke fakafoʻou ʻeku paasipōtí pea mo vahevahe ʻa e aʻusia fakaʻofoʻofa ko iá mo ʻeku palesiteni fakamisioná. Naʻá ne talamai, “Ko e ngaahi meʻangāue kitautolu ʻi he toʻukupu ʻo e ʻEikí. ʻOkú Ne ʻafioʻi ʻa e founga pea mo e taimi ke fakaʻaongaʻi ai kitautolu ʻi Heʻene ngāué.”
ʻOku ou ʻilo kapau te tau kau moʻoni ʻi he ngāue nāunauʻia ʻa e Tamai Hēvaní, he ʻikai fie maʻu ke tau hohaʻa. Ko e meʻa pē ʻoku fie maʻú ke tau talangofua ki he ngaahi ueʻi ʻa e kihiʻi leʻo siʻi mo vanavanaikí pea mo tuku ke tataki kitautolu ʻe he ʻEikí.