Ko Hono ʻOmi ʻo e Palaimelí ki ʻApi
ʻOku ou Fili ki he Totonú ʻi Heʻeku Moʻui ʻaki ʻa e Ngaahi Tefitoʻi Moʻoni ʻo e Ongoongoleleí
ʻE lava ke ke fakaʻaongaʻi e lēsoni mo e ʻekitivitī ko ʻení ke ako lahi ange ki he kaveinga ʻa e Palaimelí ki he māhina ní.
Naʻe hanga ʻe Leimoní ʻo fakangatata ʻa e silini maka ʻi hono kató naʻe maʻu ʻi he fakatau e fuaʻimoa ʻi he māketi fakakoló. Naʻá ne fakakaukau hake ki he kiʻi sioki ʻi api ʻoku tānaki ai ʻene vahehongofulú. ʻI he ʻaho Sāpaté te ne ʻoange ʻa ʻene sēnití ki he pīsopé. Naʻe ongoʻi fiefia ʻa Leimoni. Naʻá ne fiefia ke totongi ʻene vahehongofulú.
Naʻe fonu ʻa e fanga kiʻi tēpile fakaʻaliʻali he maketí he ngaahi meʻa ke fakatau atú. Naʻe fakatokangaʻi atu ʻe Leimoni ha sote lanu kehekehe ʻoku ʻasi ai e fakaʻilonga ʻo e timi soka ʻokú ne saiʻia aí. Naʻá ne sio loto atu ki haʻane tui e soté, lele hifo he malaʻe vaʻingá, pea tataʻo ʻo nau mālohi ai. Naʻe sio atu ʻa Leimoni ki he laʻi pepa ʻoku tohi ai e mahuʻingá. Te ne lava ke fakatau ʻa e soté kapau te ne fakaʻaongaʻi kotoa ki ai e paʻanga naʻe maʻu meí he fakatau fuaʻimoá pea mo e silini vahehongofulú.
Naʻe fakatokangaʻi hifo ʻe Leimoni kuo mole atu e ongoʻi māfaná. Naʻá ne fuʻu fie maʻu e soté, ka naʻá ne ʻilo ʻoku ʻikai fie maʻu ʻe he Tamai Hēvaní ke ne fakaʻaongaʻi ʻene silini vahehongofulú. Naʻe kamata lue leva ʻa Lamoni ki ʻapi. Naʻá ne fili ke ʻuluaki totongi ʻene vahehongofulú. Te ne toki ngāueʻi mo ha silini lahi ange mei he fakatau atu ko ia ʻo e fuaʻimoá kae ʻoua kuó ne lava ʻo fakatau ʻa e soté mo totongi ʻene vahehongofulú ʻo hangē ko ia ʻoku fie maʻu ʻe he ʻEikí.