Te mau Uiraa & te mau Pahonoraa
« No te aha e mea titau ia’u ia haere i te haapiiraa evanelia, inaha ho‘i, e nehenehe noa ta’u iho e tai‘o i te mau papa‘iraa mo‘a ? »
Te vai ra te taatoaraa o to outou oraraa no te tai‘o outou ana‘e i te mau papa‘iraa mo‘a, no reira, mai te mea e, te vai ra te haapiiraa evanelia, a fana‘o i te maitai o te haapiiraa evanelia no te tuatapapa i te mau papa‘iraa mo‘a i piha‘i iho i te mau orometua e te mau hoa maitai roa i teie nei.
E riro te haapiiraa e te tuatapaparaa i raro a‘e i te arata‘iraa a te hoê orometua maitai ei tautururaa ia outou ia farii i te hoê iteraa apî no ni‘a i te mau papa‘iraa mo‘a o ta outou paha e ore e haroaroa maitai roa. E nehenehe atoa i te orometua e faaite mai i te mau haapiiraa a te mau peropheta e a te tahi atu feia faatere, e na te reira e horo‘a mai ia outou i te maramarama maitai atu no ni‘a i te mau papa‘iraa mo‘a.
Oia atoa, e mea arearea roa ia haapii mai e ta outou piha haapiiraa. E nehenehe ta outou e paraparau i te mau mea tei itehia e outou na a tai‘o ai outou. Te vai ra paha te iteraa o te mau tamarii o te piha haapiiraa tei faariro i te tahi mau irava ei mau irava auhia e ratou. Na roto i to outou faarooraa i to ratou mau iteraa, e nehenehe i te reira e faariro i te mau papa‘iraa mo‘a ei mea ora no outou. E no to outou tuatapaparaa i te evanelia e o vetahi ê, e nehenehe ta outou e fana‘o i teie haamaitairaa i fafauhia mai : « Ia haaputuputuhia toopiti e aore râ, tootoru mai to’u nei i‘oa, … ei reira ïa vau i rotopu ia ratou » (PH&PF 6:32).
E haamau atoa te haapiiraa evanelia i te hoê faanahoraa no ta outou haapiiraa. E tupu te hinaaro i roto ia outou ia tai‘o mai te au i te hoê faito, na te reira ho‘i e tauturu ia outou ia faaoti i te buka papa‘iraa mo‘a tata‘itahi. E roaa atoa ia outou i te tauaparau e i te tamau aau i te mau irava tumu o te papa‘iraa mo‘a. E nehenehe ia outou ia ite papû e, e hau atu â te mau mea e roaa mai ia outou i roto i te mau papa‘iraa mo‘a na roto i te haereraa i te haapiiraa evanelia i te tahi atu huru rave‘a i teie taime i roto i to outou oraraa.
E mau hoa apî, e mau mana‘o apî
I roto i te haapiiraa evanelia e farerei outou i te mau hoa apî, e e haafatata outou i te tahi e te tahi, mai te hoê utuafare. E haapii outou e rave rahi mau mea apî o te ore e itehia e outou ana‘e. E mea arearea e e mea puai te varua. Na te reira e haapapû i te haamataraa mahana tano no outou. Mai te mea e, aita outou e haere nei i teie nei, a haamata e na te reira e taui i to outou oraraa.
Katarina B., 16 matahiti, California, USA
E oaoa
E haamata te haapiiraa evanelia i to’u mahana. E faariro oia ia’u ei taata oaoa a‘e, e te hinaaro puai atu ia aparau i te evanelia i te tahi atu mau taata. E imi hohonu atu matou i te mau papa‘iraa mo‘a, no reira, e rahi atu to’u iteraa.
Madi S.,15 matahiti, Colorado, USAE faaauraa
tano maitai
E iteraa maitai roa te haapiiraa evanelia. I te tahi taime, aita e nava‘i ia haapii noa outou ana‘e. Ua riro te haapiiraa a te taata iho e te haapiiraa evanelia ei faaauraa tano maitai. E mea faahiahia te mau orometua, e mai te mea e, e uiraa ta outou, e nehenehe i to outou mau orometua e te mau tamarii o te piha haapiiraa e tauturu ia outou ia pahono i te reira mau uiraa.
Dawson D., 15 matahiti, Idaho, USA
E maramarama hau atu
E mea anaanatae a‘e na’u ia tuatapapa i te mau papa‘iraa mo‘a e vetahi ê, i te tuatapaparaa o vau ana‘e. Hau atu i te reira, ia tai‘o ana‘e tatou i te mau papa‘iraa mo‘a e o vetahi ê, e nehenehe ta tatou e apo mai i te mau mana‘o maitai na roto mai ia vetahi ê. Na roto i te haapiiraa evanelia ua apo mai au e rave rahi aamu maitai roa, e ua rahi atu to’u ite i te mau tatararaa o te mau papa‘iraa mo‘a, e na te reira i faariro i te tai‘oraa papa‘iraa mo‘a ei ohipa anaanatae roa ! Te oaoa nei au i te mea e, te haere nei au i te haapiiraa evanelia.
Rebecca M., 16 matahiti, Schleswig-Holstein, Heremani
E iteraa puai a‘e
Na mua roa, ua parau mai te Fatu e, ia putuputu e toopiti e aore râ, e tootoru i To’na ra i‘oa, ei rotopu Oia ia ratou (a hi‘o Mataio 18:20 ; PH&PF 6:32). Ia farii ana‘e tatou i To’na Varua, e nehenehe i te reira e tauturu ia tatou ia feruri hohonu i te mea Ta’na i rave no tatou. A piti, ia tai‘o ana‘e tatou i te mau papa‘iraa mo‘a e o vetahi ê, e maramarama a‘e tatou i te mau mea i papa‘ihia. A faaroo ai tatou i te tahi e te tahi, e nehenehe ta tatou e faaroo i te tahi mea aita tatou iho i ite, e e nehenehe atoa i te reira e tupu i ni‘a ia vetahi ê ia faaite ana‘e tatou i to tatou ite. A toru, ia haere ana‘e au i te haapiiraa evanelia, e puai to’u iteraa papû. Ua riro te haapiiraa evanelia ei rave‘a no te faaite i to tatou iteraa papû e no te faaroo i to te tahi atu mau taata iteraa papû. E tauturu te reira ia tatou ia vai noa i ni‘a i te e‘a ti‘a.
Dmitri G., 16 matahiti, Dnipropetrovs’k, Ukraine
Haapii na roto mai ia vetahi ê
Ua riro te haereraa i te haapiiraa evanelia ei ohipa faufaa roa no’u. E ere no te mea noa e, e haapii e e faataa mai to’u orometua maitai i te mau parau mau no roto i te mau papa‘iraa mo‘a, e mea rahi atoa râ te mau mea ta’u e apo mai na roto i ta matou aparauraa i roto i te piha haapiiraa. Te faaite nei te tahi atu mau piahi i to ratou mau iteraa no ni‘a i te mau mea ta ratou i apo mai, e ua tauturu ratou ia’u ia roaa te ite hau atu no ni‘a i te evanelia e no ni‘a i te Faaora e i To’na Taraehara. Eita e navai ia haapii au o vau ana‘e, no te mea, ua itehia ia’u te tahi mau pahonoraa i to’u mau fifi i roto i ta matou mau tau‘araa parau i roto i te piha haapiiraa. E nehenehe ta’u e faaite papû e, e tuhaa faufaa roa te haapiiraa evanelia no te aupururaa i to’u iteraa papû no ni‘a i te Ekalesia mau a Iesu Mesia.
Denzel J., 15 matahiti, Western Samoa
Te maramarama e te parau mau
Ia haere au i te haapiiraa evanelia, e imi au i te maramarama e te parau mau e e ahu ho‘i au i te haana tama‘i a te Atua (a hi‘o PH&PF 27:15–18). Na taua haana tama‘i ra e tauturu ia’u ia ite i To’na reo i te mau taime atoa e i te mau vahi atoa. E haapuai te tai‘oraa papa‘iraa mo‘a i to’u faaroo e i to’u iteraa papû i te mau mahana atoa, e e tauturu hoi ia’u ia vai puai i roto i to’u mau tamataraa. Te haereraa i te haapiiraa evanelia o te hoê ïa o te mau rave‘a maitai a‘e no te ite i te maramarama e te parau mau e no te tai‘o i te mau papa‘iraa mo‘a e no te feruri hohonu.
Nohemi M., 17 matahiti, Puebla, Mexico
E toru tumu
A tahi, no te mea te hinaaro nei au e tavini i te hoê misioni, e haere au i te haapiiraa evanelia. E titauhia i te mau misionare ia ti‘a oioi i ni‘a e ia haapii i te evanelia i te poipoi. Ia haere au i te haapiiraa evanelia, e tauturu te reira ia’u ia faahotu i te peu maitai no te ti‘a-oioi-raa i te poipoi. A piti, i te poipoi, e mea maramarama to tatou feruriraa, no reira, e nehenehe ta tatou e haapapû i ni‘a i ta tatou aporaa e te tuatapaparaa. E feruriraa paari te faaohiparaa i te mau hora maitai a‘e o te mahana no te haapii no ni‘a i te Atua. A toru, mai te mea e, e haapii au o vau ana‘e, e riro vau i te ore e farii i te ite hohonu mai ta to’u orometua e rave nei. Na roto i ta’na arata‘iraa e ta’na haapiiraa, e nehenehe ta’u e haapii hau atu i te haapiiraa e o vau ana‘e.
H. Chen Yuan, 16 matahiti, T’ai-chung, Taiwan