Paraparau amui

Teie te tahi mau mana‘o tauturu no te faatupu i te hoê « taime paraparauraa » na te utuafare :

A ani i to outou na metua ia faataa i te tahi nau minuti i te mau mahana atoa no to outou utuafare no te paraparau amui. E nehenehe e rave i te reira i te taime tamaaraa e aore râ, i te tahi taime o te mahana.
A ara maitai ia paraparau e ia faaroo te taata tata‘itahi. A faaô i te mau taata atoa !
A faatura i te mana‘o o te mau melo o to outou utuafare. A haapapû e, te ite ra te taata tata‘itahi e, e mea faufaa te parau ta’na e parau ra.

Te mau ha‘uti no te aparauraa

Te hinaaro ra outou i te tahi mau mana‘o no te taime paraparauraa ? A tamata i teie mau ha‘uti :

Taoraraa puohu pĭpĭ : Mai te mea e e mea rahi outou i roto i te utuafare, e aore râ, e mea fifi ia faaha‘uti i te mau taata atoa, a faaohipa i te puohu pĭpĭ no te faaite e, o vai te paraparau i teie nei. Ia oti te taata tei ia’na te puohu pĭpĭ i te paraparau, a taora i te puohu pĭpĭ i te tahi melo ê o te utuafare no te horo‘a i te taime no te paraparau.

Taata uiui : A tapŭpŭ e piti taata i te pŭpŭ hoê, e na te tahi e uiui i te tahi. A feruri i te tahi mau uiraa no to outou hoa e a ui ia’na i te reira mau uiraa. E nehenehe ta outou e faaohipa i te hoê « micro » mau e aore râ, i te hoê matini haruharu reo no ta outou mau uiuiraa.

Eaha ta outou e rave ? A ui i to outou utuafare i te mau uiraa rau ma te haamata na ni‘a i teie uiraa, « Eaha ta outou e rave … ? » Teie te tahi mau hi‘oraa « Eaha ta outou e rave ia mo‘e ana‘e outou ? » e « Eaha ta outou e rave mai te mea e, e nehenehe ta outou e haere i te mau huru vahi atoa i te ao nei ? »

Tauturu na te mau metua : Taime hoê-hoê

E mea arearea roa ia paraparau te utuafare taatoa, e mea faufaa atoa na te mau metua e te mau tamarii ia parahi amui hoê-hoê. A rave i te taime i te mahana ia haere e farerei i ta outou mau tamarii tata‘itahi. A ani i te hoê tamarii i te hoê taime ia tauturu ia outou ia faaoti i te hoê ohipa, ia haere mai na muri iho ia outou i te fare toa, e aore râ, ia paraparau ia outou i roto i to outou piha no te tahi taime iti. E nehenehe i taua huru taime poto ra e arata‘i ia outou i te tahi mau aparaparauraa maitai roa.