Ua puta te mana‘o e, e ti‘a ia’u ia haere mai
Aldo Fabio Moracca, Nevada, USA
E piti matahiti e te afa i muri a‘e i to’u bapetizoraa i « Buenos Aire », « Argentine », te vai noa ra â i roto i to’u taria te parau a te hoê o te mau misionare i haapii mai ia’u : « Ua ite au e, e misionare oe ». Ua haamana‘o atoa vau i te pahonoraa puai ta’u i farii a pure ai au no te ite e, e parau mau anei te mana‘o tei haaputapu i to’u aau. I te 20raa o to’u matahiti, ua ite au e mea ti‘a ia’u ia faaineine no te hoê misioni.
Nahea râ vau ia riro ei misionare ? E ere roa’tu vau mai taua na taure‘are‘a nehenehe ra tei haapii mai ia’u i te evanelia. E nahea e ti‘a ai ia’u ia faaru‘e i ta’u ohipa ? I hea vau e noho ai i muri a‘e, ia ho‘i mai au ? Aita ho‘i i ohie no te imi i teie vahi to’u, noa’tu e, e piha iti na‘ina‘i roa i muri i te fare o te hoê taata.
I te hoê ahiahi, a ho‘i ai au i te fare, ua puta faahou mai teie mau mana‘o e teie mau feaaraa i roto i to’u feruriraa. Ia tae au i te fare, ua tamata vau i te rave i te hoê faaotiraa. Ua faaoti a‘era vau e tuturi i raro e e pûpû i te hoê pure no te ani i te tauturu. A na reira ai au, ua puta maira te hoê mana‘o puai i roto ia’u ia haere e hi‘o ia Leandro, hoê hoa teie tei riro e puai rahi no’u i roto i te mau taime pe‘ape‘a.
Tera râ, no te faaara ia’na i te maororaa pô, ua otiatia rii au i taua mana‘o ra. Ua ite au e, e ti‘a oioi oia i te poipoi no te haere i te ohipa, e no reira, aita vau i opua e patoto i ni‘a i to’na opani i taua hora ra. Ua hutihuti noa to’u mana‘o, tera râ, ua tamau noa vau i te feruri e haere e hi‘o ia’na. Tera râ, ua faaoti au ia haamo‘e i te reira.
E ua faaoti au e hahaere e faaati i te aroa no te hutihuti i te matai apî. Haamana‘o a‘era vau e, aita vau i tamau i to’u opani, no reira, ua haamata a‘era vau e ho‘i mai i te fare. I to’u tomoraa i roto i te fare, te ite nei au ia Leandro te parahi noa ra i roto i to’u piha. Ua tae maira te Varua i ni‘a ia’u, e e au e, ua mau roa to’u hutiraa aho. I roto i te hoê reo pe‘ape‘a, ua ani atura vau ia’na e, « Eaha to oe tere i ô nei ? »
« Aita vau i ite », ta’na ïa parau. « Ua puta noa mai te mana‘o e, e mea ti‘a ia’u ia haere mai e hi‘o ia oe ».
Ua parau atura vau ia’na i te mau mana‘o feaa i roto ia’u no ni‘a i te hoê misioni. Ua faaite maira oia i to’na iteraa papû e ua faaitoito maira ia’u. E ua tauturu maira oia ia’u ia faaî i ta’u mau parau no te misioni, ta’u ïa i hopoi atu i te episekopo ra i te poipoi a‘e. E piti ava‘e i muri mai, ua faarii a‘era vau i to’u piiraa i roto i te Misoni no Salta i « Argentine ».
Ua ite au e, ua riro to’u hoa ei mauhaa i roto i te rima o te Fatu i taua pô ra, e ma to’u aau atoa ua ite au e, te faaroo mai nei te Metua i te Ao ra e te pahono nei ho‘i Oia i te mau pure te pûpûhia nei ma te aau tae e ma te hinaaro mau.