Feia apî
E ite faahou vau ia’na
Ua imi o papa i te rave‘a ia oaoa matou te mau tamarii. Ua here oia ia matou e e faaore ohie noa oia i te hapa. Ua imi oia i te mau rave‘a atoa ia oaoa ihoa matou, e ua faaite papû maitai mai oia e, te imi ra oia i te mea maitai roa a‘e no matou. Ua here roa vau ia’na.
Tei roto vau i te piha ono, a pohe ai to’u metua tane i roto i te hoê ati purumu. Ua ati roa to’u utuafare e o vau nei ho‘i. Ua vai te hoê apoo rahi i roto i to matou utuafare. O papa te taata ta’u e turu‘i atu, oia te taata ta’u e haere e farerei mai te mea e, e fifi to’u. Aita vau i imi i te tauturu, ua vaiiho râ vau i te riri e te inoino i te haere rahi noa. I te pae hopea ua faaoti au e, na te Atua te hape. Ua faaea vau i te tai‘o i ta’u mau papa‘iraa mo‘a e i te pure atoa ho‘i. Ua haere au i te pureraa na roto noa i te hinaaro o mama. Ua tamata vau i te faaea i te atea ê roa i to’u Metua i te Ao ra.
I muri iho ua haere au i te hoê puhaparaa na te feia apî tamahine no te taime matamua roa. Ua oaoa vau i te farereiraa i te mau hoa apî, tera râ, aita hoa vau e tai‘o i ta’u mau papa‘iraa mo‘a. I te pô hopea, ua faatupuhia te hoê pureraa iritiraa mana‘o. Ua ite a‘era vau i te hoê mea aita vau i ite faahou a‘enei e mea maoro i teie nei : te Varua. Ua faahiahia vau i te mau tamahine tei ti‘a mai i ni‘a e tei faaite mai i to ratou iteraa papû, tera râ, ua parahi noa vau i raro i te mea e, ua feruri au e, aita to’u e iteraa papû. Ia tae a‘era i te hoê taime, ua tupu te hinaaro rahi i roto ia’u ia ti‘a i ni‘a. Ua hamama a‘era vau i to’u vaha, ma te feruri e, eaha râ te mea e parau. No reira, ua parau atura vau e, ua mauruuru vau no te puhaparaa a te feia apî tamahine. E i muri iho, ua parau atura vau e, ua ite au e, ua pohe o Iesu Mesia no’u e ua here to’u Metua i te Ao ra ia’u e e Ekalesia mau teie.
Ua faaîhia vau i te hoê hau faahiahia. Ua mauruuru vau no teie ohipa i tupu, e nehenehe ta’u e parau e, ua ite au e, e ite faahou vau i to’u papa maoti te Taraehara e te Ti‘a-faahou-raa o te Faaora.