Te mau mana‘o no te pureraa pô utuafare
I roto i teie papa‘iraa te vai nei te mau parau papa‘i e te mau ohiparaa o te nehenehe e faaohipahia no te pureraa pô utuafare. Teie e piti hi‘oraa.
« Te mau haamaitairaa o te haapiiraa evanelia », api 20: A hi‘o faahou i te parau papa‘i hou e faaoti ai e nahea i te faaohipa maitai a‘e i te parau poro‘i i to outou utuafare. Mai te mea te vai ra ta outou feia apî i roto i te haapiiraa evanelia, a ui na mua ia ratou no te aha e mea faufaa te haapiiraa evanelia no ratou. I muri iho, a tai‘o i te tuhaa tei piihia « te fariiraa i te mau haamaitairaa i fafauhia ». A faaitoito i te mau tamarii apî ia faaineine ia ratou no te haere i te haapiiraa evanelia ia paari mai ratou. Mai te mea e aita ta outou e tamarii ua ti‘a te matahiti no te haere i te haapiiraa evanelia, e nehenehe ta outou e tai‘o i te parau papa‘i e i muri iho a tauaparau i te faufaa mau o te haapiiraa evanelia no te feia apî i teie mahana.
« Ua ite te mau taata atoa ia Bleck », api 42: A feruri e himene i te himene « A Haapa‘o » (Te Mau Himene, no. 143) ei himene matamua. A tai‘o e aore râ a faati‘a i te aamu no Bleck. A ani i te mau melo o te utuafare ia faaite mai i te hoê iteraa a rave ai ratou i te hoê faaotiraa fifi mau i roto i na e‘a taa ê e ia faaite mai te mau hopearaa no roto mai i te faaotiraa ta ratou i rave. A faaoti na roto i te tai‘oraa i te faahitiraa a te peresideni Thomas S. Monson.
Te ohie, te hau, e te aramoina ore
Ua riro ei hoê pureraa pô utuafare aramoina ore e ta maua na tamahine e piti, o Angélique, 6 matahiti, e o Béthanie, 4 matahiti. Ua topa perehu roa maua ta’u tane i roto i to maua parahiraa marû, e te rohirohi taatoa e te taa ore e nahea ra i te haamata. I reira, ti‘a mai nei ta maua na tamahine e ua faatere i te tarena ohipa no te pureraa pô utuafare, ma te faataa i ta te tahi e ta te tahi ohipa. Te hopoia a ta’u tane o te arata‘iraa ïa, na Béthanie te himene, na’u te mau faaoaoaraa, e na Angélique te haapiiraa.
Ua ma‘iti o Béthanie i te himene « Oh, j’aime voir le temple » (Chants pour les enfants, 99), e ua himene amui matou. Ua horo‘a papa i te pure matamua. I muri iho ua rave Angélique i te Liahona o te ava‘e e ua maiti oia i te hoê parau papa‘i i roto i te tuhaa na te mau tamarii. Te haapii nei oia i te tai‘o i te haapiiraa, no reira ua tai‘o mai oia i te parau papa‘i na matou. Auê te hau i roto i to matou fare. Ua haapapû mai te Varua e e parau mau ta’na e tai‘o ra.
Ua ha‘uti rii matou, e na’u i horo‘a i te pure hopea. A pure ai au, aita ta’u e ore e haamauruuru i te Metua i te Ao ra no To’na Varua e To’na here e oia atoa no te haamaitairaa i to matou utuafare i na varua na‘ina‘i e piti. Ua ite maua ta’u tane e, e hopoia na maua i te aupururaa ia raua e te haapiiraa ia raua i te evanelia. Te faatupuraa i te pureraa pô utuafare o te hoê ïa tuhaa no taua hopoia mo‘a ra.
Sylvie Poussin, no Réunion