Te afa‘iraa mai i te Paraimere i te fare nei
Te haapii mai nei Iesu Mesia ia’u ia ma‘iti i te maitai
E nehenehe ta outou e faaohipa i teie haapiiraa ei faaoaoaraa no te haapii atu â no ni‘a i te parau tumu a te Paraimere no teie ava‘e.
No Tanner, e mea taa ê ïa te Pasa i teie matahiti. Ua pohe to’na papa ruau, e ua oto roa o Tanner i te mea e, eita oia e apiti faahou ia’na i roto i taua taime taa ê ra.
Tera râ, i roto i te Paraimere, ua faahaamana‘ohia ia Tanner e, te tumu tatou e faahanahana ai i te Pata no te mea ïa e, te ora nei Iesu ! A tiafaahou ai Oia, ua tahoêhia To’na varua i To’na tino e a muri noa’tu, e ore hoi e pohe faahou. Ua apo mai o Tanner e, no te mea ua ti‘a faahou o Iesu, e hope paatoa ïa te mau taata atoa i te ti‘a faahou i te hoê mahana, tae noa’tu i to’na papa ruau !
E ua faaî a‘era te hoê himene no te Pata ia Tanner i te oaoa a himene ai oia e : « Ua ti‘a faahou o Iesu, o Iesu to tatou hoa. Ua î to matou aau i te oaoa ; Te ora faahou nei Oia ».1 Ua hinaaro o Tanner ia faaite i teie parau apî maitai i te mau taata atoa. Ua faaoti oia e, na mua a‘e i te Pata, e tuu oia i te pae uputa o te mau taata i te tahi a‘e pae i ô ratou i te mau puohu na‘ina‘i faaîhia i te mau tiare no te pu‘e tau faatupuraa raau, e te mau irava no ni‘a i te Ti‘a-faahou-raa o Iesu. Ua feruri oia i te ataata i ni‘a i to ratou mata a ite ai ratou i ta ratou tao‘a horo‘a i te poipoi Pata.