Te apo-rahi-raa i te mau mea o te amuiraa rahi
Noa’tu e, e parau tatou « amene » i te hopea o te tuhaa amuiraa hopea o te amuiraa rahi, eiaha te amuraa maa pae varua ia hope i reira. E roaa i te reira ia tamau â na roto i te tai‘oraa tatou e te faaohiparaa ho‘i i te mau haapiiraa no roto mai i te amuiraa. I roto i te mau matahiti e rave rahi, ua faaitoito mai te mau peropheta ia tatou ia rave a‘e i te reira. Ei hi‘oraa, i te matahiti 1946 ra, ua faaitoito te Peresideni Harold B. Lee (1899–1973) i te mau melo ia faariro i te mau a‘oraa o te amuiraa « ei arata‘i no to ratou haerea e ta ratou aparauraa i roto i na ava‘e e ono i muri iho ». Te parau ra oia e, « Teie te mau mea faufaa ta te Fatu e hi‘o nei e, ua tano ia heheu mai i to’na mau taata i teie anotau ».1
I te matahiti 1988, ua faahiti faahou te Peresideni Ezra Taft Benson (1899–1994) i te reira a‘oraa a haapii ai oia e, « I roto i na ava‘e e ono i muri nei, e ti‘a i ta outou ve‘a Ensign no te amuiraa ia vai noa i piha‘i iho i ta outou mau buka papa‘iraa mo‘a e ia hi‘o-pinepine-hia te reira ».2
A opani ai oia i te amuiraa rahi no atopa, ua haapapû faahou te Peresideni Thomas S. Monson i te faufaa o te tuatapaparaa i te mau a‘oraa o te amuiraa. Ua parau oia e: « Ia haamana‘o tamau noa tatou i te mau mea o ta tatou i faaroo i roto i teie amuiraa rahi. E nene‘ihia te mau parau poro‘i atoa o tei a‘ohia mai i roto i te mau ve‘a Ensign e te Liahona i te ava‘e i mua. Te ani manihini nei au ia outou ia haapii i te reira e ia feruri i ta ratou mau haapiiraa ».3
A tuatapapa ai e a feruri hohonu ai outou i te mau parau poro‘i o te amuiraa, eaha te ti‘a ia outou ia rave no te faariro i te reira ei mea faufaa atu i roto i to outou oraraa ? Teie te tahi mau mana‘o no te tauturu ia outou ia faaineine, ia farii, e ia faaohipa i te mau parau faauruhia :
A faaineine no te farii i te faaururaa. Ia mataitai, ia faaroo, e aore râ, ia tai‘o atu outou i te mau a‘oraa o te amuiraa, e mea ti‘a ia outou ia iriti i to outou aau e to outou varua i te faaururaa no te ra‘i mai. Ua haapii o Elder David A. Bednar no te Pŭpŭ no te Tino Ahuru Ma Piti Aposetolo e, noa’tu te huru o te maitai o te haapiiraa a te hoê taata, « hoê noa mea e ô ai te parau poro‘i e te faaiteraa a te Varua Maitai i roto i te aau maori râ, ia farii te taata ia tomo mai te reira i roto ». Te faataa ra oia e, no te farii i te faaururaa « e titauhia te haaraa i te pae varua, i te pae feruriraa e i te pae tino, eiaha râ te tia‘i-noa-raa ia tae mai ».4
E nehenehe i teie mau mana‘o i muri nei e tauturu ia outou ia faaineine no te haapii mai na roto i te Varua :
-
A faataa i te taime e a faatupu i te hoê vahi aita te mana‘o e nevaneva, i reira e ti‘a ai ia outou ia farii i te mau muhumuhuraa a te varua.
-
A titau i te arata‘iraa no te ra‘i mai na roto i te pure.
-
A tapura i ta outou iho mau uiraa e aore râ, te mau mana‘o o ta outou e titau ra i te pahonoraa.
A haroaroa i te mau parau poro‘i. E haapii, e faataa, e faaitoito, e faaara e e faaite papû te mau peropheta ora e te mau aposetolo. Na te hi‘o-maite-raa outou i ta ratou mau a‘oraa e tauturu ia outou ia haroaroa hope roa’tu â i ta ratou parau poro‘i. Teie te tahi mau rave‘a maitai no te tuatapapa :
-
A ui i te mau uiraa. Ei hi‘oraa : Eaha ta te Fatu e hinaaro nei ia apo vau i roto i teie parau poro‘i ? Nahea teie a‘oraa e haamaitai i to’u iteraa i te hoê parau tumu o te evanelia e aore râ, i te hoê irava o te papa‘iraa mo‘a ? Eaha te mau aamu i faaohipahia no te faahoho‘a i te mau parau tumu o te evanelia, e eaha ta’u i apo mai i roto i te reira mau aamu ?
-
A papa‘i i te hoê arata‘iraa parau. A fafa i te arata‘iraa parau a te taata a‘o. A tatuhaa i te a‘oraa i roto i te mau tuhaa rau, e a papa‘i i te hoê haapotoraa o te haapapû i te mana‘o tumu i faaitehia i roto i te tuhaa tata‘itahi.
-
A imi i te mau mana‘o rau i roto i te a‘oraa. A tapa‘o i te mau mea mai te parau haapiiraa, te mau papa‘iraa mo‘a, te mau aamu, te mau faaararaa, te mau tapura, te mau iteraa papû, te mau ani-manihini-raa ia faaohipa, e te mau haamaitairaa i fafauhia no te haapa‘oraa outou i te a‘oraa.
-
A tuatapapa i te a‘oraa hau atu i te hoê a‘e taime. E mea titauhia ia tuatapapa i te mau parau mau o te evanelia hau atu i te hoê taime, ei reira outou e apo mai ai i te auraa taatoa. I te mau taime atoa e tuatapapa outou, a tapa‘opa‘o i te mau mana‘o apî i roaa mai ia outou.
A faaohipa i te mau mea ta outou i apo mai. Mai te mea e, e tuatapapa outou i te mau a‘oraa na roto i te pure, e ite outou e, e tano te poro‘i i ni‘a i to outou oraraa. E ite outou e nahea ia rave i te mau tauiraa faufaa na roto i te uiraa i te mau uiraa mai te huru e, Eaha ta te Fatu e hinaaro ra ia’u ia rave no te mau mea ta’u i apo mai ? e Eaha ta’u i apo mai o te riro i te tauturu ia’u i roto i to’u utuafare, ta’u ohipa, e aore râ, to’u piiraa i roto i te Ekalesia ? A papa‘i i te mau mana‘o ia ore te reira ia mo‘ehia ia outou. Mai te mea e, e na reira outou, e faauruhia outou ia ora i te mau haapiiraa e e farii ho‘i outou i te mau haamaitairaa i fafauhia mai.
Te amuiraa rahi, o te taime ïa e heheu mai ai te Fatu ia outou i To’na hinaaro na roto i Ta’na mau tavini. Ua haapii mai te Peresideni Spencer W. Kimball (1895–1985), « Eiaha roa te tahi atu mau papa‘iraa e aore râ, te tahi atu mau buka ia vai i te hoê vairaa maitai roa i ni‘a i ta outou mau pa‘epa‘e vairaa buka maori râ te mau papa‘iraa mo‘a a te Ekalesia—eiaha no te faahiahia te paraparauraa e aore râ, te nehenehe o te faahitiraa parau, no te mau parau tumu râ i roto i te reira o te faatoro ra i te haerea e tae atu ai i te ora mure ore ».5