Ngaahi Talanoa mei he Konifelenisí
Ko ha Tohi Liliu Moʻui
“ʻE lava ke ne [ko e Tohi ʻa Molomoná] ʻave kitautolu ke tau ofi ange ki he ʻOtuá ʻo laka ange ia ʻi ha toe tohi. ʻE lava ke ne liliu ha moʻui ke lelei ange. ʻOku ou poupou atu ke mou fai e meʻa ne fai ʻe haʻaku hoa ngāue fakafaifekau. Naʻá ne hola mei honau ʻapí ʻi hono taʻu hongofulu tupú, pea naʻe faʻo ʻe ha taha ha Tohi Molomona ʻi he puha naʻá ne ʻalu holo mo ia ʻi heʻene fekumi ko ia ki ha moʻui fiefia angé.
“Ne ʻosi mei ai ha ngaahi taʻu. Naʻá ne hiki holo he funga māmaní. Naʻá ne tuenoa pea loto mamahi ʻi ha ʻaho ʻe taha peá ne vakai atu ki he puhá. Ne fonu e puhá ʻi he ngaahi meʻa naʻá ne ʻalu holo mo iá. Naʻá ne ʻilo e Tohi ʻa Molomoná ʻi he takele ʻo e puhá. Naʻá ne lau ʻa e talaʻofá peá ne ʻahiʻahiʻi ia. Naʻá ne ʻiloʻi ʻoku moʻoni ia. Ne liliu ʻe he fakamoʻoni ko iá ʻa ʻene moʻuí. Naʻá ne maʻu ha fiefia lahi ange ʻi he meʻa naʻá ne fakaʻamuá.
“Mahalo kuo moʻutukua atu hoʻo Tohi ʻa Molomoná ha feituʻu koeʻuhí ko e lahi e ngaahi fatongia mo e ngāue ʻokú ke tokanga ki aí. ʻOku ou kole atu ke ke ako lahi mei hono ngaahi pēsí. ʻOku kakato ai e ongoongolelei ʻo Sīsū Kalaisí, ʻa ia ko e hala pē ʻe taha ki ʻapi ki he ʻOtuá.”
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ko ha Fakamoʻoni,” Liahona, Nōvema 2011, 71.
Ngaahi Fehuʻi ke fakalaulauloto ki ai:
-
Ko e hā ha meʻa ʻi hoʻo moʻuí ʻokú ne ala fūfuuʻi e Tohi ʻa Molomoná mei hoʻo vakaí?
-
Ko e hā te ke lava ʻo fai ke toe lelei ange ai hoʻo ako e Tohi ʻa Molomoná?
-
Ko e hā ha ngaahi lēsoni mei he Tohi ʻa Molomoná kuo nau tokoni ke liliu hoʻo moʻuí ke toe lelei angé?
Fakakaukau ke hiki hoʻo ngaahi fakakaukaú ʻi ha tohinoa pe aleaʻi ia mo ha niʻihi kehe.