Ko ha Tohi ʻEni meiate Koe?
Sinitia ʻAna Lī, Nevata, USA
Ne toki hokó ni hoku taʻu 21 pea naʻá ku ngāue tali tēpile ʻi he falekai he fale nofo totongi he koló maʻá e kakai naʻe omi ʻo sikií. ʻI he ʻosi ʻeku fakamaʻa e loki kaí he hoʻatā ʻe taha, naʻe mono mai kiate au ʻe ha tamasiʻi tali tēpile ha tohi mo ne talamai ʻokú ne loto ke ʻai maʻaku. Ne u fakamālō ange mo tali ia.
Ne u sio hifo ki he takafí: Ko e Tohi ʻa Molomoná. Naʻe ʻalu hake ʻeku fie ʻilo, ko ia ne u fakakaukau ke u ʻalu ki peito ʻo vakaiʻi. Ne u sio he tafaʻaki ki loto ʻo e takafí ki ha kiʻi tohi naʻe fai mai ʻe he tama tali tēpilé kiate au. Naʻá ne pehē ai ko e Tohi ʻa Molomoná ko ha tohi moʻoni ia ʻo e ongoongolelei ʻo Sīsū Kalaisí pea naʻá ne ʻiloʻi te ne ueʻi hoku lotó. Ne u pehē ke u kamata lau leva ia.
Lolotonga ʻeku laú, ne u ongoʻi ʻi hoku sinó kotoa ha ongo kehe mo nonga. Ne teʻeki ai ke u maʻu e ongo ko iá ʻi haʻaku lau ha tohi kehe mei he Tohi Tapú. Ko ʻeku ʻuluaki taumuʻá ke lau pē ha ngaahi peesi siʻi ka ne ʻikai hano taimi kuo ʻosi atu ha ngaahi peesi ia. Naʻe ʻikai ke u lava ʻo tuku ki lalo e tohí. Ne u aʻu ki he 1 Nīfai 15:11: “ʻOku ʻikai te mou manatuʻi koā ʻa e ngaahi meʻa kuo folofola ʻaki ʻe he ʻEikí?—Kapau ʻe ʻikai te mou fakafefeka homou lotó, pea mou kole kiate au ʻi he tui, ʻo ʻamanaki te mou maʻu, ʻi hoʻomou tauhi faivelenga ʻeku ngaahi fekaú, ko e moʻoni ʻe fakahā ʻa e ngaahi meʻá ni kiate kimoutolu.”
Ne u fie maʻu ke ʻiloʻi pe naʻe moʻoni ʻa e tohí ni. Naʻe ʻikai ke u ʻilo pe te u lea fēfē ki he ʻOtuá ʻi haʻaku lotu, ko ia ne u hanga hake pē ki he ʻaofi ʻo peitó ʻo fehuʻi, “Ko e tohi ʻeni meiate Koe?” Ne u ongoʻi ha tali mālohi he taimi pē ko iá: “ʻIo.” ʻOku ou manatuʻi pē ʻeku fakakaukau, “Tamani. Mahalo te u lau e tohí ke ʻosi!”
Hili ha māhina ʻe tolu mei ai, ne ʻosi e Tohi ʻa Molomoná heʻeku lau pea, ne u fakaʻuli mai ke ʻaʻahi ki heʻeku tamaí ʻi Kalefōnia. Ne u fakalaka mai ʻi ha fale naʻá ku ʻiloʻi ʻa ia naʻe taila maka ʻa e tafaʻaki ki muʻá. Naʻá ku afe fakavavevave ki he tauʻanga meʻalelé ʻo sio ki ha tangata ʻi tuʻa.
Ne u fehuʻi ange, “Ko e hā e meʻa ʻa e meʻa-hā-mai ʻa Līhai ki he ʻakau ʻo e moʻuí ʻoku fai ʻi homou falé?” Naʻá ne fakafeʻiloaki leva au ki hono siasí, ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku toʻo mai ʻeku Tohi ʻa Molomoná mei he kaá ʻo kamata fakafehuʻi ia fekauʻaki mo e ngaahi kupuʻi folofola ne u siakaleʻi lolotonga ʻeku lau ia. Naʻá ne kiʻi taʻofi mai au mo fakamatalaʻi mai ʻoku ʻi ai ha kau faifekau ʻa e Siasí ʻoku nau fakamoleki ʻa e taʻu ʻe ua ʻo ʻenau moʻuí ke tali e ngaahi fehuʻi hangē ko ʻeku fehuʻí.
Ne u ʻoange ki ai e tuʻasila ʻeku tamaí, pea naʻe haʻu kimui ai ha ongo faifekau ʻo ʻaʻahi mai kiate au. Naʻe fakamāfana kiate au ʻena fie tali kotoa ʻeku ngaahi fehuʻí. Ne toe fakamāfana ange ʻeku ongoʻi naʻe hangē pē ʻa e ngaahi fakakaukau ne na akoʻi maí ha ngaahi meʻa ne u ʻosi ʻiloʻi ka ko haʻaku toe fakamanatu pē. ʻI he ʻosi mei ai ha uike ʻe nima, naʻe papitaiso au ko ha mēmipa ʻo e Siasí.
Ko e ʻosi ʻeni ha taʻu ʻe tolungofulu mā ua mei ai, pea ʻoku ou kei lau fakaʻaho pē e Tohi ʻa Molomoná. Kuo hoko ia ko ha maʻuʻanga maama mo e fai fakahinohino hokohoko ki hoku fāmilí mo au. ʻOku ou fakamālō ki he kau palōfita ʻo e kuonga muʻá ne nau tongitongi e ngaahi folofola ʻa e ʻOtuá ki ha ʻū lauʻi peleti koula, kia Siosefa Sāmita ʻi heʻene kātekina ʻa e fakatangá mo e ngaahi faingataʻá kae lava ke liliu pea pulusi hono ngaahi moʻoní, pea ki ha tokotaha tali tēpile naʻe loto toʻa ke ne foaki mai ha Tohi ʻa Molomona kiate au ʻi he ʻaho ko iá.