Naʻe ʻOmi ʻe he Ongoongoleleí ʻa e Melinó Kiate Au
Sina Lousa, Nuʻu Sila
Naʻe kau hoku fāmilí ki he Siasí ʻi hoku taʻu onó, pea naʻa mau sila he temipalé ʻi hoku taʻu valú. Ne akoʻi faivelenga kiate au ʻe heʻeku ongomātuʻá ʻa e ngaahi tokāteline ʻo e tui fakalotu foʻou ko ʻeni ne mau toki kau ki aí, ko ia ne u tupu hake pē ʻo ʻiloʻi ʻe lava ke ʻomi ʻe he lotú, ako folofola fakatāutahá, mo e ngaahi tafaʻaki kehe ʻo e ongoongoleleí, ha melino ʻoku lahi angé.
Neongo ia, ne toki hounga moʻoni pē kiate au ʻa e palani ʻo e fakamoʻuí ʻi heʻeku ngāue fakafaifekaú. Ne mālōlō ʻeku tangataʻeikí lolotonga ʻeku ngāue ʻi ʻAositelēliá. ʻI he haʻu ʻeku palesiteni fakamisioná ke fakahā mai kiate au e meʻa naʻe hokó, naʻá ne foaki mai haku tāpuaki lakanga fakataulaʻeiki ʻa ia ne lahi nofo pē ʻi he palani ʻo e fakamoʻuí. Ne tokoniʻi au ʻe he tāpuaki ko iá, fakataha mo ʻeku ako fakatāutaha ʻi he ngaahi ʻaho, uike, mo e ngaahi māhina hoko aí ke u ako pea fakahoungaʻi lahi ange ʻa e tokāteline maʻongoʻongá ni ʻi ha toe taimi kimuʻa. Ne u lava ʻo vakai ki he ngaahi tūkunga ne u ʻi aí ʻi he maama ʻo e palani ʻo e fakamoʻuí, pea naʻe lava ke mahino moʻoni kiate au hono fakaʻofoʻofá. Talu mei ai mo e mahuʻinga lahi ange kiate au e palani ʻo e fakamoʻuí.
ʻI he hokohoko atu ʻeku ako e folofolá talu mei heʻeku ngāue fakafaifekaú, ne u ʻiloʻi ai hono fakamoʻoniʻi ʻe he ngaahi folofola lahi ʻa e ʻOtuá ʻa ʻEne “palani lahi ʻo e fiefiá” (ʻAlamā 42:8). ʻOku ou ʻiloʻi ʻoku ʻi ai e moʻui hili ʻa e maté pea ʻe lava ke tau toe fakataha mo hotau ngaahi ʻofaʻangá hili ʻa e moʻuí ni. ʻOku ʻomi ha fakafiemālie lahi kiate au ʻe heʻeku ʻiloʻi ko ia kuó u sila mo ʻeku faʻeé, tamaí, mo ʻemau fānaú.
ʻOku hoko ha ngaahi meʻa fakamamahi ʻi he moʻui ko ʻení, ka ʻoku ʻikai fie maʻu ia ke faingataʻa e moʻuí. ʻOku toe faingofua ange ʻa e ngaahi meʻa ʻoku hokó koeʻuhi ko e ongoongolelei ʻo Sīsū Kalaisí. ʻOku ou ʻilo ʻe lava ke u ongoʻi ʻa e melino mo e fiemālie ʻi he taimi kotoa pē koeʻuhi ko ia, ʻo tatau ai pē pe ko e hā ʻoku hoko ʻi heʻeku moʻuí.