Fiefia ʻi he Ongoongoleleí
Mei ha ʻinitaviu mo ʻEletā Carlos A. Godoy ʻo e Kau Fitungofulú; fai ʻe Jacob Fullmer
“Te tau vīkiviki ʻi he ʻEikí; ʻio, te tau fiefia, he ʻoku kakato ʻetau fiefiá” (ʻAlamā 26:16).
ʻI hoku taʻu 14, naʻe tuʻu homau ʻapiakó ʻo hanga atu ki he falelotu ʻo e Siasí. Naʻá ku sio ki he hū atu mo e hū mai ʻa ha kau tangata sote hina mei he fuʻu fale ko iá. Naʻá ku fifili pe ko e hā ʻenau meʻa naʻe fai ʻi lotó.
ʻI he ʻaho ʻe taha naʻa mau fie ʻakapulu ai mo hoku ngaahi kaungāmeʻá, ka naʻe ʻikai ha feituʻu ʻe toe ʻatā ʻi homau ʻapiakó. Naʻe pehē mai ha taha, “Tau vaʻinga ʻi he ʻapi siasí. ʻOku fakaʻofoʻofa ʻa tuʻa ke tau vaʻinga ai.” Ko ʻeku fuofua fetuʻutaki ia mo e Siasí—ʻi tuʻa he ʻapisiasí.
ʻI he ʻosi ha taʻu ʻe ua mei ai, naʻe fakaafeʻi ʻe ha taha ʻo e ngaahi kaungāmeʻa ʻo hoku tokouá ʻa hoku tuofefiné ke na ō ki he ʻapi Siasí peá u ʻalu mo au. Naʻá ku fiefia ke faifai peá u ʻiloʻi ʻenau meʻa naʻe fai ʻi he loto ʻapi siasi ko iá.
ʻI heʻemau aʻu atú, naʻa mau sio ki ha kāingalotu naʻe fai ʻenau vaʻinga. Naʻa nau mata fiefia pea tohoakiʻi ai ʻeku tokangá. Naʻá ku fifili ai, “Ko e hā ʻoku nau fuʻu fiefia aí?” .
Naʻá ku ʻiloʻi ʻeni ʻi he taimi naʻe akoʻi ai kiate au e ngaahi lēsoni ʻa e kau faifekaú peá u papitaisó. ʻOku kamata ʻa e fiefiá mei loto. Naʻe hanga ʻe hoku fakauluí ʻo liliu ʻeku moʻuí, moʻui ʻa ʻeku fānaú, pea mo e ngaahi toʻu tangata ʻi muʻá pea mo e kuohilí.
ʻE ʻikai te ke maʻu ha fiefia ʻi ha faʻahinga meʻa pē te ke fakahoko ʻi tuʻa mei he ngaahi akonaki ʻa e Siasí. Mahalo pē te ke kata ai pe fiefia ʻi ha kiʻi momeniti siʻi, ka ko e fiefia moʻoní ʻoku ʻi loto pē ia ʻi he ongoongoleleí.
Naʻa mo hano fakakata ʻaki koe ho ngaahi kaungāmeʻá ʻi he taimi ʻe niʻihi ka te nau fakaʻofoʻofaʻia ʻi hoʻo taukaveʻi hoʻo ngaahi tefitoʻi moʻoní.
ʻOku ʻofa hoʻo ongomātuʻá ʻiate koe. Ko e hā pē ha meʻa te na kole atu ke ke fai, ʻoku ʻikai ʻuhinga ia ʻokú na pule fefeka; ko hono ʻuhingá he ʻokú na loto ke maluʻi koe.
Houngaʻia maʻu pē ʻi hoʻo ongomātuʻá, ʻi he ongoongoleleí, pea mo e fiefia ʻokú ne ʻomi ki hoʻo moʻuí.
Tā fakatātaaʻi ʻe Matt Smith