Fesili & Tali

“E mafai faapefea ona ou maua ni mafaufauga mama pe a fai ou te vaai i le tele o le le tauagafau ua siomia ai au?”

E foliga mai e le mafai ona e alu i se mea i aso nei e aunoa ma lou vaai atu i tagata e le tauagafau laei, i le vaai atu ia i latou po o luga foi o faasalalauga. Atonu e le mafai ona e pulea lou siosiomaga, ae e mafai ona e pulea ou mafaufauga.

Afai e te vaai atu i se tagata e le tauagafau ona laei, e mafai ona e vaai ese vave pe alu ese mai lea nofoaga. A oo mai se lagona eleelea i lou mafaufau, filifili e aua nei nofonofo ai, ae tulei ese i le mafaufau i mafaufauga mamā. “Ia teuteuina ou manatu i le mama e le aunoa; ona … avea [lea o] le Agaga Paia mau aumea tumau” (MFF 121:45–46). O le i ai o mafaufauga mama o le a fesoasoani ia te oe e te fiafia ai ma e maua ai le taitaiga a le Agaga.

Ia fai ma masani le i ai pea o lagona mama e le aunoa. Taumafai ia e i ai faatasi ma tagata e laei tauagafau, ma aloese mai nofoaga e te ono vaaia ai laei le talafeagai. Tatalo mo le Tama Faalelagi e fesoasoani ia te oe. Tauloto pese ma mau ina ia i ai ni mea lelei e te mafaufau i ai pe a faaosoosoina oe. Faitau e le aunoa i tusitusiga paia, ma alu atu i le malumalu pe a mafai. Ma a e vaai atu i se tagata e laei le tauagafau, e mafai ona e mafaufau i se mea lelei.

E Le Ni Ō le Lalolagi i Tatou

E tatau ona tatou manatua o loo tatou i ai i le lalolagi ae le ni ō o le lalolagi i tatou. O i tatou o atalii ma afafine faapitoa o lo tatou Tama Faalelagi pele. O le mafuaaga lea, e tofotofoina atili ai i tatou e le fili, ae ao ona tatou malolosi atu nai lo le faaosoosoga. E ono laei tagata o le lalolagi i laei le tauagafau, i lo latou lē iloaina o le tino o se malumalu paia. A ua i ai i le Au Paia o Aso e Gata Ai lenei malamalama. O le mea lea, e tatau ai ona tatou tumau pea i le mamā ma le lē pona. A osofaia o tatou mafaufau e mafaufauga leaga, e tatau loa ona vave saili atu i le fesoasoani mai lo tatou Tama Faalelagi e ala i le tatalo, aua e leai lava se tasi e sili atu ona fesoasoani ia i tatou nai lo Ia.

Dayana H., age 19, São Paulo, Pasila

Fesili i Au Uo e Fesoasoani Atu

Ona na o a’u le Au Paia o Aso e Gata Ai i le vasega ono i la’u aoga, ou te feagai ai lava ma gagana mataga, le tauagafau, ma le uunaiga ou te mulimuli i isi tamaiti aoga. Ae i le amataga o le tausaga, na ou faamalamalama ai i a’u uo o’u tulaga faatonuina ma ou te tumau ai e tusa lava po o le a. Sa latou iloa i le tele o masina e uiga i tulaga faatauaina o la’u Ekalesia. O le a fesoasoani atu au uo ia te oe pe a e faamatala atu ou tulaga faatauaina ma ou tulaga faatonuina ia i latou. Na suia mo le lelei ia amioga, laei, ma gagana a a’u uo. Sa ou aoaoina afai o i latou moni o ni au uō, o le a latou fesoasoani ia te oe e te mafaufau i mafaufauga mamā ma fesoasoani ia te oe e te tumau i le ala sa’o ma le vaapiapi.

Celia N., age 12, Virginia, ISA

E Fesoasoani le Tatalo

Na ou iloa ao o’u tauivi e faatumau ou mafaufauga mamā, o le tatalo o la’u tali sa’o lea i le faatumauina o se mafaufau mamā ma faataga uunaiga a le Agaga ia tumau ia te a’u i mea uma ou te alu i ai. O le tatalo i taeao uma mo le Tama Faalelagi e fesoasoani mai ia te a’u ia ou maua ni mafaufauga mama ma aumai ia te au le taitaiga i le aso atoa ma faafetai atu ia te Ia i le afiafi, na aumaia ia te a’u se fesootaiga sili atu ma Ia ma fesoasoani ia te a’u ou te alu ese mai i mea e le tauagafau ma tausia o’u tulaga faatonuina. O se tatalo i taeao ma po taitasi e fesoasoani ia te oe e valaaulia ai le Agaga ia mafuta ma oe ao feagai oe ma fili faalelalolagi. “Ia outou tutumau ma le lē mafaagaeetia, ia fua mai pea i galuega lelei” (Mosaea 5:15).

Gunnar R., 16 tausaga, Wisconsin, ISA

O i Tatou o Malumalu

A fai laei le tauagafau o tagata o loo siomiaina oe, aua e te faitio ia i latou, aua e manaomia le i ai o ou mafaufauga lelei. Fai se faataitaiga ia i latou e ala i lou faaali atu e te mulimuli i tulaga faatonuina a le Ekalesia. Ma fesoasoani i tagata e ala i lou alofa ia i latou ma ta’u atu ia i latou e alofa lo tatou Tama Faalelagi ia i latou ma finagalo ia latou mama a’ia’i i uiga ma mafaufauga. E taua le mama i lo tatou faaolataga, aua o i tatou o malumalu o lo tatou Atua.

Maricris B., 19 tausaga, Quezon, Filipaina

Ola i Aoaoga o le Talalelei

Ou te iloa e mafai ona tatou maua mafaufauga mama e ala i le suesue i tusitusiga paia ma faatino a latou aoaoga. Pe a tatou faatinoina tulaga faatauaina uma o loo aoaoina i le ekalesia, pe a tatou faitau i le Mo le Malosi o le Autalavou, ma a tatou o atu i le malumalu, e mafai ona tatou maua ni mafaufauga mama.

Jossi O., 16 tausaga, Antioquia, Kolomupia

O Le Mafaufau E Pei o se Tulaga

O loo i ai i le Tala’i La’u Talalelei se vaega e talanoaina ai le mamā. O loo faapea mai o o tatou mafaufau e pei lava o se tulaga i se falefaafiafia. I luga o lenei tulaga, e na o le toatasi le tagata e mafai ona faatino i le taimi e tasi. A tatou mafaufau i mafaufauga mamā, ma lē pona, o le a tumau pea le taula’i o o tatou mafaufau i nei mafaufauga, ma o le a lē mafai lava ona aveesea le tulaga o o tatou mafaufau e lagona lē lelei. O le mamā o se uiga o Iesu Keriso lea ua faatonuina i tatou e atiina ae. I le ekalesia ua aoaoina i tatou e ao ona tatou mafaufau pea i mea mamā, ae a tofotofoina loa i tatou e se mea lē mamā, e mafai ona usu se pese tatou te fiafia i ai pe mafaufau foi i se mau e fiafia i ai. O le ituaiga fesoasoani sili lava e mafai ona maua i le 2 Nifae 32:9: “Tatalo e le aunoa, aua le faavaivai.”

Elder McEachron, 21 tausaga, Misiona a Pasila João Pessoa

Mafaufau i Isi o ni Fanau a le Atua

Ia e pulea le auala e te tali atu ai i mea e te vaai i ai. Ona o loo i ai se mea iina, e leai se mea o le a e tuuina ai fua lena mea i le tulaga o lou mafaufau. E te filifilia ou mafaufauga; filifili ina ia tausi pea i le mamā. Ia aloese mai le vaai atu pea i mea e le tauagafau, ma ia fai pea ou laei tauagafau. Ona e mafaufau lea ia i latou tou te fetaui o ni fanau a le Atua, e i ai ni agavaa faalelagi, ma e alofagia taitoatasi e lo tatou Tama o i le Lagi. A ou vaai atu i isi o ni fanau a le Atua, e faigata lava ona ou faia se mea i ai, ae ou te faanoanoa lava i tulaga le tauagafau ou te vaai i ai.

Amy S., 19 tausaga, Iuta, ISA

O tali ua faamoemoe e mo se fesoasoani ma ni manatu, ae e le o se faalauiloaga o aoaoga faavae o le Ekalesia.

Mafaufau i se Mea Lelei

Elder Richard G. Scott

O nisi mafaufauga leaga e o mai lava latou. O isi e oo mai aua ua tatou valaauliaina i latou e ala i mea tatou te vaai i ai. … O nei mea o loo siomia ai outou, ae ia aua lava nei o outou faia. Galulue i le tausia mama o outou mafaufauga e ala i le mafaufau i se mea lelei. O le mafaufau e na o le tasi le mea e mafai ona mafaufau i ai i le taimi. Faaaoga lena mea moni e tulei ese ai mafaufauga mataga.”

Elder Richard G. Scott o le Korama a Aposetolo e Toasefululua, “O le Faia o Filifiliga Sa’o,” Liahona, Ian. 1995, 44.

O Le Isi Fesili

“Aisea e i ai pea faafitauli i lo’u aiga e ui lava ina matou o i le lotu, faia afiafi faaleaiga, ma taumafai e ola i le talalelei. O le a se isi mea e mafai ona matou faia?”

Auina mai lau tali a o lei oo i le aso 15 o Me, 2010, i le:

Liahona, Questions & Answers 5/10

50 E. North Temple St., Rm. 2420

Salt Lake City, UT 84150-0024, USA

Po o le i-meli: [e-mail]

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau imeli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le imeli) e lomiaina ai lau tali ma lou ata.