Peresitene Spencer W. Kimball (1895–1985)

O le tuputupu ae i nuu maotua o Arisona, na aoao ai Spencer W. Kimball e galue malosi a o laitiiti lava. O le atalii o le atalii o le Aposetolo o Heber C. Kimball (1801–68), ma o le atalii o le peresitene o le siteki, na atiina ae foi e Spencer se molimau malosi ma le tuuto mausali i le talalelei.

Ao tamaitiiti o ia, sa avea ma tiute masani a Spencer le tietie i luga o le taavale toso e la’u ai vaovaomago, e soli i lalo vaovaomago a o faaputu e ona uso matutua. O se galuega vevela, pefua, ma le mageso, ae na ia faia lava—sei vagana la ua ta mai le logo o le falesa e faailo mai ai le amataina o le Peraimeri, lea na faia i na aso i le aso o le vaiaso. E le’i misi lava lona auai i le [Peraimeri] ma o le a na le misia lava. Sa ese foi manatu a ona uso ma amata ai ona lafo faatopetope vaovaomago i luga o le taavale toso. La te iloa ane le maualuga o le faaputuga vaovaomago, ua toeitiiti foi afa le auala e tau atu i le Peraimeri ia Spencer.

Sa oo ina malaga atu Spencer W. Kimball e auauna o se faifeautalai, o se epikopo, ma se peresitene o le siteki a o lei valaauina o ia i le tulaga faaaposetolo i le 1943. O le tulaga faatauaina o lana galuega sa lauiloa, e ui lava i le tele o gasegase ogaoga lea na aofia ai ma le mai fatu ma le kanesa o le faai. Sa ia uunaia tagata o le Ekalesia e faalautetele a latou laa, ma o lana lava mautauave o le “Ia faia loa.” Ona o le tulaga o lona soifua maloloina, sa manatu ai nisi e ono puupuu le tulai mai a Spencer W. Kimball o se Peresitene o le Ekalesia. Peitai na pulefaamalumalu o ia i le Ekalesia mo le 12 tausaga, o le vaitaimi lea na faaluaina ai le aofai o malumalu na faaaogaina, na siitia le aofai o faifeautalai i le 50 pasene, ma faasafua atu le perisitua i alii agavaa uma o le ekalesia.

O lona tuuto le maluelue i le talalelei ma lona faatauaina o le galue malosi na faaeaina ai Spencer W. Kimball mai se amataga faatauvaa i nuu maotua o Arisona i le avea ma au taitai o le Ekalesia. O lana taitaiga o se Peresitene o le Ekalesia na faailogaina lea i le faateleina o le faatupulaia o le fausiaina o malumalu ma le galuega faafaifeautalai. Agavale: Faatasi ai ma lona faletua o Camilla (1894–1987).