Fautuaga i Tamaitai Talavou e uiga i Tafaoga Faamasani

Saunia e le Au Peresitene Aoao o Tamaitai Talavou

Ata

Young Women General Presidency

O tafaoga faamasani e malie! O le tafao faamasani o se avanoa mo oe e atiina ae ai ma faalautele au faauooga ma alii talavou. Na tuuina mai e Elder Robert D. Hales o le Korama a Aposetolo e Toasefululua se tali faigofie ma le anoa i le faauigaga o se uo: “O uo o tagata ia latou te faafaigofieina le ola ai i le talalelei a Iesu Keriso.”¹ Tafao faamasani i alii talavou e faia oe ia e manao e avea ma se tagata e lelei atu. “Ia faaali lou tagata silisili” ina ia mafai ai ona avea oe ma uunaiga lelei ia i latou e te tafao masani i ai.²

Ia Avea Oe ma Ituaiga Tagata E te Manao e te Tafao Faamasani i Ai

E mafai ona e amata nei ona galue i le atiina ae o na agavaa ia e moomia ma fiafia ai alii e tafafao faamasani ia te oe.

Ataata! Ioe, ataata ma ia fiafia. Ma o lau ataata o le a sosolo atu ma fesoasoani ai i isi e fiafia e mafuta ma oe.
Ia e malosi faaleagaga.Ia faia mea e te latalata atili ai i le Agaga Paia ina ia avea o Ia ma au soa tumau.
Ia e malosi faaletino.Ia tausi lelei lou tino, ia mataalia, ma faamasani i meaai maloloina. Ia teuteu mama ou foliga ma laei.
Atiina ae au taleni ma mea e te fiafia i ai.Ia saili i aoaoga uma e te gafatia. E mafai ona e faitau i tusi mananaia, faalogologo i musika lelei, iloa mea o loo tutupu, pe aoao foi i se isi gagana.
Amio e faapei o se afafine o le Atua. Aua le faitala o’o, leotele, sauā [faafiamalosi], pe fia fai manatu. Atonu ua e vaai i nei ituaiga o amioga i tifaga, ae e le talafeagai ma se tamaitai talavou ua malamalama i lona faasinomaga o se afafine o le Atua.
Faaleleia atili ou tomai faaagafesootai. Ia agalelei, faaaofia mai isi, ma mafaufau i manaoga o isi tagata. Faataitai ona talanoa faafesagai. Aoao i amioga pulea ma uiga faaaloalo. O nei mea uma o le a fesoasoani ia te oe e te avea ai ma ituaiga tagata e fiafia isi tagata e mafuta i ai.
Ia e fiafia i tagata. Faaali le fiafia i isi ma mea latou te fiafia e fai. Fai ni fesili e fesoasoani ai ia latou maua le lagolelei ma fesoasoani e te iloa lelei ai i latou.
Faataatitia ni tapulaa. Aua le faatagaina isi e faaaoga oe. Ia faatumau lou mama a’ia’i.
Ola i tulaga faatonuina o loo taua i le tusi Mo Le Malosi o le Autalavou. Aua le faatali ae faasoa atu nei tulaga faatonuina ia i latou o loo outou tafafao faamasani. Aua nei tuua i lalo ou tulaga faatonuina mo se isi tagata. Afai o faamoemoe mai se tagata e te faia lena mea, e le agavaa lena tagata mo lau faauoga po o lau fegalegaleaiga.
Fesoasoani i isi ia faaalia foi o latou tagata silisili. Ia faaleleia i latou i le tafafao faamasani ai ma oe. Tusa lava pe leai ni avanoa se tele e te tafao faamasani ai, e mafai ona e ataata ma faia ni uo fou. Filifili ia ia te oe le manatu o le a lelei mea uma. E oo lava i faanoanoaga i tafaoga faamasani e mafai ona fesoasoani i lou tuputupu a’e. E mafai e tagata tou te feiloai ona faatamaoaigaina lou olaga, ma e mafai ona e faamanuiaina i latou ao e faasoa atu ia i latou lou tagata sili ona lelei.

Filifili Ma Le Poto i Latou E Te Tafao Faamasani I Ai

O tafaoga faamasani o se avanoa lea e te faamasani ai i alii talavou e sauniuni ai mo se faaipoipoga. Ia e faaeteete ia i latou e te filifilia e te tafao faamasani i ai. A e manatu loa o le a oulua tafafao ma se alii talavou, ia e mautinoa e maualuluga ona tulaga faatonuina ma o le a fesoasoani e le aunoa ia te oe e te ola i le talalelei a Iesu Keriso. O nisi nei o fesili e te ono fesili ai ia te oe lava:

Pe malosi ma lelei lana amio?
Pe faatuatuaina, ma faamoemoeina o ia?
Pe faamaoni o ia?
Pe faaaloalo ma agalelei i isi ma a’u foi?
Pe le manatu faapito o ia?
Pe faaaloalo i o’u matua ma ava i ona foi matua?
Pe na te faamamaluina lona perisitua?
Pe na te uunaia au ia ou avea ma tagata sili ona lelei?
Pe agavaa o ia e alu i le malumalu?

Ia e fiafia ma avea foi oe o se mea fiafia i tafaoga faamasani pe a oo ina e masani i isi. Fuafua faatasi ni gaoioiga fai faatasi. O nisi o tafaoga faamasani e sili ona malie e mafai ona faafaigofie e pei o le kukaina faatasi o se meaai. Pe mafaufau foi i se avanoa e auauna atu ai. E mafai ona e matauina ma iloa lelei le isi tagata e ala i le faia o gaoioiga nai lo le na o le nonofo ma matamata i se ata tifaga.

Na saunoa mai lo tatou perofeta, “I tafaoga faamasani, ia faia ma le faaaloalo lē lua te tafafao, ma e tatau foi ona faaali atu e ia lena lava faaaloalo mo oe.”³ Matou te iloa o le a avea outou ma uunaiga lelei i olaga o alii talavou uma tou te tafafao faamasani—ma a outou uo uma o ē vaai i a outou faataitaiga amiotonu.

A outou tumau i le atiina ae o a outou meaalofa ma taleni, faia o filifiliga poto i a outou faigauo ma isi, ma avea o se uunaiga amiotonu, o le a lelei o outou tausaga o tafaoga faamasani, e tauia lelei, ma mālie. O le taimi lenei e faatu maualuga ai la outou vaai, faamoemoe mo le mea sili, ma ia avea ma ituaiga tagata uma o loo faamoemoe le Tama Faalelagi e avea ai outou. O oe o se afafine o lo tatou Tama Faalelagi; e alofa o Ia ia te oe, ma e tatou te alolofa foi i ai.