Taeao Poo le Aso Sa
O nei alii talavou i Fiti e ala popo lava ma savavali i se auala mamao, ae faia o latou tiute ma le naunautai.
O se afiafi o le Aso Toonai i le Uarota a Waila o le Siteki a Nausori i Fiti. Ua faataunuuina tiutetauave o le aso, ma o e o umiaina le Perisitua Arona ua saunia mo le Sapati ma ua faapotopoto nei i le fale o Uso ma Tuafafine Maiwiriwiri. O se avanoa mo i latou e faia ai sina meaai laitiiti ao lei amataina la latou anapogi—ona sosoo ai lea ma se po e momoe i luga o fala i le fale o le aiga o Maiwiriwiri.
O le taeao mo nei alii talavou o le Perisitua Arona e vave oo mai lava. Ao lei taitai tafa mai ata, e vave feala i latou, fai o latou ofutino papae ma fusiua ma o latou ofuvae uli, ma e ta ane le 6:00 i le taeao ua latou o ese mai le fale o Uso ma Tuafafine Maiwiriwiri e taitoalua—e pei lava o ni faifeautalai. O nei soa taitasi e tofu ma le auala faapitoa e uia ina ia taunuu tonu atu i le falelotu i le 10:00 i le taeao, e amata ai le sauniga perisitua. O la latou tiutetauave o le afe lea i aiga taitasi o le au paia e tau atu i ai ma valaaulia i latou e saofaga mai i le taulaga anapogi.
O nei alii talavou e savavali mo le tolu maila (5 km) mai le fale o Maiwiriwiri e i le isi tausiusiuga o le uarota e oo atu i le falelotu e i le isi tausiusiuga o le uarota. O se avanoa lenei e faataunuu ai o latou tiute ma valaaulia ai tagata o le Ekalesia e auai i le galuega taua o le tausiaina o tina ua maliliu a latou tane faapea foi ma o latou uso ma tuafafine e ala i le saofaga ai i le taulaga anapogi. O Peresitene Alipate Tagidugu o le Siteki a Nausori i Fiti na saunoa mai o se taunuuga o lenei taumafaiga a le Perisitua Arona, ua siitia ai saofaga o le taulaga anapogi i le 20 pasene.
E tutusa lava le taua, o nei alii talavou ua i ai se avanoa e faataunuu ai o latou tiute ma fesoasoani i tagata o le uarota e tausia a latou feagaiga na osia i le papatisoga:
“O lenei foi, ua outou fia o mai i le lafu mamoe a le Atua, ma ia ta’ua o lona nuu, ma ua loto ina fesui ia outou avega e ave ina ia mama ai;
“Ioe, ma ua loto ina faanoanoa faatasi ma e faanoanoa; ioe, ma faamafanafana i e ua tatau i ai le faamafanafanaga, ma laulaututu e fai ma molimau a le Atua i aso uma, ma mea uma, atoa ma nuu uma tou te i ai e oo lava i le oti, ina ia togiolaina outou e le Atua, ma faitauina faatasi ma i latou i le uluai toe tu, ina ia outou maua le ola faavavau” (Mosaea 18:8–9).
Mo nei alii talavou lelei, o le aoina o taulaga anapogi e le o se avega a o se faamanuiaga. Latou te laeiina o latou ofutino papae ma fusiua, ala popo ma le naunautai, ma tuitui atu i faitotoa o le au paia ma le loto fuatiaifo i le taeao po lava e valaaulia i latou e auai i faamanuiaga na e oo mai i le tuuina atu o se taulaga anapogi limafoai.
Ao ou matauina nei alii talavou o sauni ma faataunuuina o latou tiute i le avea ai ma e umia le perisitua, sa ou mafaufau o se faamanuiaga matagofie tele mo i latou i o latou olaga atoa le malamalama i le taua o a latou taumafaiga i le valaauliaina o tagata o le Ekalesia e faalatalata atili i le Faaola e ala i le tuuina mai o taulaga anapogi. O le a avea i latou ma faifeautalai sili atu, ma o le a avea ma tane ma tamā sili atu, o se taunuuga o a latou taumafaiga faaleperisitua.
O le a sili atu lo latou malamalama i lenei mau e uiga i le nuu o le Alii: “Ma sa taua e le Alii lona nuu o Siona, aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa” (Mose 7:18).
O se faamanuiaga mo nei alii e umia le perisitua le iloa ua latou valaauliaina tagata e faalatalata atili atu i le Faaola.
E amata vave le aso, ae peitai e savavali ma laumata fiafia nei alii talavou mai le tasi tulimanu o le uarota i le isi, i le aoina o taulaga anapogi.
Fiti
Niu Sila
Ausetalia
Si’o: ata pue © Dynamic Graphics, Inc.; ata na pueina Talat Mehmood; na faatulagaina le faafanua mai le Map Resources