Talafaasolopito o le Ekalesia i le Lalolagi

Eleni

O Rigas Pofantis ma Nicholas Malavetis sa la sailia upumoni faalelotu mo tausaga e tolu ae o la vaaia loa se tusiga i luga o se niusipepa i le 1898 lea na talanoaina ai le faaMamona. Sa faafiafiaina i laua ma tusi atu loa i le laumua o le Ekalesia e fia aoao atili i ai. Sa auina atu e taitai o le Ekalesia le peresitene o le Misiona a Take e asiasi ma aoao atu le toalua lea i Eleni. I le 1903 na maliu ai Nicholas Malavetis, ae e lua tausaga mulimuli ane, na toe tusi atu ai Rigas Pofantis i le Ekalesia ma talosaga i ai e fia papatiso. Na toe auina atu foi e taitai o le Ekalesia le peresitene o le Misiona a Take, o lē na papatisoina Uso Pofantis ma le isi toalima, e aofia ai ma le faletua a Nicholas Malavetis.

O uluai faifeautalai na taunuu i Eleni i le ono masina talu mai na uluai papatisoga, ae na amata i le 1909, ona taofia e le Ekalesia le galuega faafaifeautalai iina mo le lata i le 70 tausaga, ona o le vevesi i faiga faaupufai i le eria. O le taimi lea, na amata ai ona faasoa atu e taitai fitafita o le militeli na faamautu i lena eria le talalelei i tagata Eleni. Ae, na tuai lava le alualu i luma; ina ua suia e le Paranesi a Athens le iunite a fitafita militeli o le Ekalesia i le 1967, na aofia i tauvalaauga a le Ekalesia le 80 o tagata i le paranesi ae na o le toavalu o tagata Eleni.

I le1972 na faapaiaina ai e Elder Gordon B. Hinckley (1910–2008), o lē na avea i lena taimi ma se tasi o le Korama a Aposetolo e Toasefululua ia Eleni mo le talaiina ai o le talalelei. Mai lena lava taimi e tele atiina ae na uunaia ai le faatupulaia o le fuaitau aofai o tagata o le Ekalesia, e aofia ai ma le lolomiga o le faaliliuga faaEleni o le Tusi a Mamona i le 1987, o le faatuina o le Misiona a Greece Athens i le 1990, ma le faapaiaga o le uluai falelotu i Eleni i le 1999.

Faitau aofai o Tagata Auai (2009)	661
Itu	1
Paranesi	5

I nai tausaga talu ai nei i Mars Hill, o le nofoaga lea na lauga ai le Aposetolo o Paulo i le Galuega 17, ua avea ma nofoaga mo sauniga molimau, galuega fesoasoani, ma faafiafiaga a tagatanuu maoae o Eleni.