Auaunaga i le Ekalesia

O Le Taua o se Faiaoga

Saunia e Peresitene Thomas S. Monson

Mai le “Ua Na o Se Faiaoga,” Liahona, Oke. 1990, 3–8.

President Thomas S. Monson

I se vaitaimi ua mavae sa talanoaina ai e ni alii talavou se toatolu o latou tamā. Sa faapea mai le tasi, “E lapoa atu lo’u tama i lou tama,” lea sa tali atu i ai le isi, “Ia, e poto atu lo’u tama i lou tama.” Sa faapea atu le tamaitiiti lona tolu, “O lo’u tama o se fomai.” Ona faliu atu lea i le isi tamaitiiti, i se uiga faatauemu ma fai atu, “A o lou tama ua na o se faiaoga.”

E na o le tasi lava le faiaoga o lona soifuaga e maualuga atu i isi tagata uma. E lei soifua o Ia ina ia auauna atu tagata ia te ia a ia auauna atu o ia i tagata, ia le maua e Ia se mea a ia foai atu, ia le faasaoina Lona ola a ia taulagaina mo isi. Sa ia faamatalaina se alofa e sili atu le matagofie nai lo le tuinanau, e sili atu se mativa nai lo oa. Sa Ia aoao atu ma le pule ae sa le faapei ona faia e le au tusiupu. O loo ou tautala e uiga i le Faiaoga o Faiaoga, o Iesu Keriso, o le Alo o le Atua, o le Faaola ma le Togiola o tagata uma.

A tali atu faiaoga tuuto i Lana valaaulia mālū, “Ia outou o mai ma faaaoao mai ia te au,” e avea i latou ma e tofo i Lona mana paia.

A o ou laitiiti, sa ou maua se aafiaga ou te aoao mai ai i faatosinaga a se faiaoga faapena. I la matou vasega o le Aoga Sa, sa ia aoaoina i matou e uiga i le Foafoaga o le lalolagi, le Pau o Atamu, ma le taulaga togiola a Iesu. Sa ia aumaia i lona potuaoga e avea ma ni malo faaaloalogia ia Mose, Iosua, Peteru, Toma, Paulo, faapea foi ma Keriso. E ui lava matou te lei vaai ia te i latou nei, a e sa matou aoao e alolofa, faamamalu, ma faataitai ia i latou.

“Ina ua faalogo le tamaitiiti i tauemuga: “O lo’u tama e lapoa atu i lou tama,” “O lo’u tama e poto atu i lou tama,” O lo’u tama o se fomai,” ia atonu na mafai lava ona tali atu o ia faapea, “Atonu e lapoa atu lou tama i lo’u tama; atonu e poto atu lou tama i lo’u tama; atonu o se pailate lou tama, o se enisinia, po o se fomai; a o lo’u tama o se faiaoga.”

Talosia ia maua e i tatou uma taitoatasi se faaviiviiga moni ma le agavaa faapena!

Faia o Fesili e Aoga

E le o i ai i le Ekalesia le valaauga o se faiaoga polofesa. O se faiaoga polofesa e na o lona tuuina atu o lona silafia. Ae o se faiaoga e valaauliaina tagata o le vasega e aoao, o se vaega e ala i le aoao o le tasi e le isi. O se tasi o auala mautinoa e faaliliu ai se tautalaga lē manaia i se lesona mataalia, e tumu i le Agaga o le tuuina atu lea o fesili aoga.

1. I le sauniuniga o lau lesona, ia fuafua ni fesili e fai atu a o faagasolo le lesona. Mafaufau i fesili o loo fautuaina mai i le tusi lesona. Mafaufau i nisi [fesili] e ono aoga i lau vasega. Saili le Agaga e fesoasoani ia te oe e filifili ai ni fesili mo manatu autu taitasi e te manao e aoao atu.

2. Ina ia fesoasoani i tagata o le vasega e talanoaina auala e faatatau ai se autu o le talalelei i o latou olaga, e mafai ona e tuuina atu ni ituaiga fesili eseese se tolu i se faasologa:

   • O se fesili moni: “O ai e finagalo le Alii tatou te faamagaloina?”

   • O se fesili e faatatau [ia i tatou]: “E faapefea ona aafia i tatou i le faamagaloina atu o se tagata?”

   • O se fesili i se aafiaga: “O le a se aafiaga lelei na e maua i le faamagalo atu o se tagata?”

O Le Lauga i le Mauga, na saunia e Carl Heinrich Bloch, faaaogaina i le faatagaga a le National Historic Museum i Frederiksborg i Hillerød, Tenimaka, e le mafai ona kopiina