“Fafaga Au Mamoe”
“Mulimulli mai ia te au, ma fafaga au mamoe” (MFF 112:14).
“Na fetalai atu Iesu ia Peteru e fafaga Ana mamoe. O le auala lena e mafai ona faaali atu ai e Peteru ia Iesu e alofa o ia ia te Ia.”
“Tina, na i ai se lafu mamoe a Iesu?”
“E leai, lau pele. O nisi taimi e faaigoaina ai Iesu o le Leoleo Mamoe Lelei, ae o i tatou e pei o Ana mamoe. Sa aoao e Iesu ia Peteru afai tatou te mananao e faaali atu ia Iesu tatou te alolofa ia te Ia, e tatau ona tatou fesoasoani i isi.”
“O le mafuaaga lena o le a tatou o ai e ave le pai ia Uso Iakopo pe a uma le afiafi faaleaiga?”
“Ioe, o lena. Ae o le a manaia pe a e mafaufau i se mea e mafai ona e faia e faaali atu ai ia Uso Iakopo e te alofa ia te ia.”
Sa mafaufau Olevia i se mea e mafai ona ia faia. Na ia manatua e matua fiafia lava Tina ma Tinamatua i ata na te tusia.
“Ua ou iloa! E mafai ona ou faia se kata mo Uso Iakopo ma tusi ai se ata!”
Sa tusi e Olevia se nuanua matagofie lava. I totonu o le kata na ia tusia ai, “Ia vave ona e malosi! Alofaaga, Olevia.”
Ina ua taunuu atu Olevia ma lona aiga i le fale o Uso Iakopo, sa fesili atu Tina ia Uso Iakopo po o a mai o ia. Sa amata ona tagi Uso Iakopo.
“Faatoa ou iloaina e tatau ona ou alu i le falemai e fai lo’u taotoga taeao. Ua fai lava si ou fefe.”
Sa tuu atu e Tina ia Uso Iakopo le pai. Ona tuuina atu lea e Olevia ia te ia le kata na ia faia.
“Faafetai lava, Olevia. O lenei kata matagofie ma ou foliga ataata ua ou lagona ai le malosi.”
Sa lagona e Olevia e pei na fusi atu lona fatu e se tagata. Sa fiafia o ia ua mafai ona fesoasoani atu ia Iesu e fafaga Ana mamoe. ■