O Ai Ua Saunia?

Saunia e Allison Lee Burton

Sa ou manatu na saunia la’u uo e faalogo i le talalelei, ae aisea la na ou maua ai lenei uunaiga?

A o ou i ai i le tausaga faaiu o la’u aoga maualuga, sa ou tatalo mo le Agaga e taitaiina a’u i se tasi ua saunia e faalogo i le talalelei. Sa ou mafaufau i sa’u uo ao o’u tatalo. O la’u uo lenei, o Asalei (ua suia le igoa), na faaalia sona fiafia i la’u lotu, ma sa ia tausisia foi ni tulaga faatonuina e pei lava o se talavou o le Au Paia o Aso e Gata Ai. Sa ou talitonu o le taimi lenei na tatau ai ona faalogo o ia i le talalelei.

Sa ou galue i le au peresitene o la’u vasega o le Lora i le taimi lena, ma i le fonotaga a le komiti talavou a le au epikopo, sa ou maua ai se uunaiga malosi lava e fautua atu i le epikopo e fai sa matou gaoioiga faafaifeautalai i le Mutuale. Na faatulagaina ma le fiafia e lo’u epikopo ma faifeautalai le gaoioiga, ma na ou mautinoa o le tali lea sa ou tatalo i ai. O lea la o le a mafai ona sau Asalei ma aoao atili e uiga i le talalelei i se siosiomaga o le a na le lagonaina ai se popole. Sa ou lagona le to’a e faapea, a uma ona auai mai Asalei i le gaoioiga o fesili ma tali, o le a ootia o ia i le Agaga, ma fai mai e fai ana lesona a faifeautalai, ma pe a ma se masina ona papatisoina ma faamauina ai lea o se tagata o le Ekalesia.

Na liliu atu nei a’u tatalo i le auala e fai atu ai Asalei e sau i le gaoioiga. Sa ou tatalo ina ia fai au ma se tufugaaao o le Alii ina ia faailoa atu Lana fuafuaga ma le talalelei i se tasi ua saunia e talia. I le aoga sa ou valaauliaina ai Asalei i le gaoioiga, ae na fai mai o le a ia fesili atu i ona matua pe malilie i ai.

Mulimuli ane i lena aoauli, sa ou maua ai se valaau mai ia Asalei. Sa fai mai na matua malilie i ai ona matua. O le mea moni, na ia faamatala mai a o lei faaipoipo ona matua, sa nonofo faatasi ai lona tama ma ni alii se toalua o le AAG i se potu e tasi, ma sa matua faagaeetia lava o ia i olaga sa ola ai i laua. Sa matua ou fiafia lava aua, na pau lava le faalavelave na ou vaai faalemafaufau i ai o le, pe o le a malilie pe leai foi matua o Asalei i lona alu atu i se isi lotu.

A o faaauau pea ona ou tatalo e uiga i le gaoioiga faafaifeautalai na loma, sa ou lagonaina se faamautinoaga mafanafana, o a’u lava o se tufugaaao a le Alii ma sa fiafia o Ia i lo’u galue ai i le uunaiga i le fonotaga o le komiti talavou a le au epikopo. Sa ou tulimatai atu i le gaoioiga ma le fiafia tele. Ua tele tausaga o ma uo ma Asalei, ma sa ou fiafia lava e faia se vaega i lona faatoa iloa ai o le talalelei ma, ioe, lona liua mulimuli ane ai.

I le taeao o le gaoioiga, sa ou maua ai se valaau mai ia Asalei. Na suia lona mafaufau ma sa le fuafua foi e sau i le gaoioiga. Sa faateia lava a’u ma sa ou le malamalama. Sa ou tatalo mo Asalei, ma sa ou mautinoa na saunia o ia, ma o ia lava le pogai atoa sa ou fiafia ai i le galuega faafaifeautalai. Sa ou lagonaina foi le maasiasi. A o faagasolo fuafuaga mo le gaoioiga, sa ou ta’u atu ma le manino i tagata uma, ua saunia la’u uo o Asalei e aoao ma talia le talalelei.

A o o’u tagi i lo’u potu ona o lo’u le fiafia, sa amata ona ou lagonaina lo’u le talitonu ia te a’u lava. Afai sa ou sese e uiga ia Asalei, ia atonu foi na ou sese i lo’u talitonu, o le gaoioiga faafaifeautalai o fesili ma tali o se uunaiga moni faaleagaga. O le faatumulia i lagona le mautonu o se talavou, ita, faanoanoa ia te a’u lava, ma le le fiafia, na ou filifili ai o le a ou le alu i le gaoioiga.

I ni nai vaiaso mulimuli ane, ao o’u ui atu i le faletusi a le aoga, na fesili mai la’u uo o Brian, pe ou te fia alu atu i lona papatisoga. E lei avea faatasi ni a ma vasega ma Brian i lena tausaga, ma ua fai la si leva ma te lei toe fevaai’ai pe talanoa foi. O le tausaga na te’a sa ma nonofo faatasi ai i le vasega o talafaasolopito, ma sa ma paga foi i se galuega faatino a le vasega. O le autu o le ma galuega faatino, sa tofia faafuasei mai e lo matou faiaoga, o “Iosefa Samita ma Mamona” Na ou manatuaina le fiafia o Brian i le autu a o faia la ma sailiiliga. Ae ui i lea, sa fiafia foi o ia e ula solo ai, ma fai tala e pei o le, “Faamanatu mai po o le ava lona fia lou tina” ma le “O le a faia se pati manaia i le faaiuga o le vaiaso lenei, ae oi faatali—o oe o se Mamona, e le mālie la oe pe a ta o.” O lea, sa ou teena ai i le amataga lana valaaulia mo lona papatisoga, e faapea o se isi foi ulaga i la’u lotu. E le’i foliga mai o ia o se tasi ua saunia e auai i se ekalesia e i ai ni ona “tulaga faatapulaaina.”

Ae o upu na sosoo ai na ia fai mai ai na ou ofo ai, a o ia faamatalaina suiga o lona olaga i ni nai vaiaso ua te’a. Na ia faamatalaina le faalogo atu o valaaulia e se tasi o le matou vasega ma o se tagata o le matou uarota, se isi tagata i se gaoioiga o fesili ma tali na faia i le lotu Mamona. Ina ua teena e le na valaaulia le valaau, sa fesili loa Brian i le tagata lea o le matou vasega pe mafai ona ia sau ai i le avanoa lea. Ina ua mae’a le gaoioiga, sa amata ai loa lava ona fai ana lesona a faifeautalai. Sa ia faitauina le Tusi a Mamona. Sa ia tatalo e uiga i ai. Na ia iloaina ua moni. O le a papatiso mo’i lava o ia, ma afai ou te manao i ai, e taliaina ma le fiafia lo’u auai atu. Ma le isi, na ia fai mai ai, o au le tagata na faailoaina atu o ia ia Iosefa Samita ma Mamona.

I lo’u ofo le leoa sa ou iloa ai sa faafofogaina e le Alii a’u tatalo. Sa Ia faaaogaina au o se tufugaaao mo Ia e saili se tasi na Ia saunia e faalogo ma talia le talalelei. Sa lei i ai so’u manatu e valaaulia Brian e feiloai atu i faifeautalai, aua i lo’u lava manatu sa le’i foliga mai na saunia o ia. E le’i pei o Asalei.

I lena lava taimi faamaualalo, sa ou iloaina ai le taua tele o le galue i uunaiga uma ou te maua mai le Agaga. E ui lava o loo faaauau pea ona ou tatalo ia saunia Asalei mo le talalelei, ae sa ou aoaoina se lesona taua mai le taunuuga e le’i faamoemoeina o a’u taumafaiga i le faasoaina atu o le talalelei ia te ia. E i ai lava i taimi uma i le Alii se faamoemoega mo uunaiga Na te tuuina mai ia i tatou, ma ou te le manaomia ona iloa pe taumate foi po o le a. Nai lo lena, o la’u matafaioi o le faataunuuina lea o uunaiga ma le mautinoa ma le le faavaivai. Ao o’u tatalo mo avanoa faafaifeautalai, gaoioi e tusa ai ma uunaiga, ma talia le finagalo o le Alii, nai lo lo’u taumafai e faamalosi a’u lava, e mafai ona ou auauna atu ma le atoatoa o se tufugaaao o le Atua ma fesoasoani e fausia Lona malo.

Ata na tusia e Sal Velluto ma Travis Walton.

O le tagata lava e tatau [ona valaaulia] o Asalei! Mai tagata uma lava na ou iloaina, o ia le tagata na foliga mai o le a taliaina le talalelei.