Savali Pupuu
Ou Te Iloa E Moni
Mai lava i lo’u laitiiti na ou faalogo ai i tagata o le Ekalesia o molimau mai e uiga i le Tusi a Mamona. Sa ou manatu o upu “Ou te iloa e moni” sa na o ni upu masani lava e taulotoina e tagata uma o le ekalesia. Ana ou le alu lava i le misiona i Nigeria ou te le aoaoina le upu moni o loo i tua atu o na upu.
O se tasi po na ma foi mai ai ma la’u soa i le ma fale. Sa ma tietie atu i uila i se auala pogisa, sa le’i faatāina lea na matua leaga lava ona o timuga. Ona o le vai ma le tulaga na i ai le auala, na lavea ai le uila a la’u soa ma pau ese ai mai lana uila. Na matua palapala ma susū pala—ona lavalava, ma lana ato o tusitusiga paia—ma mea uma lava sa ia te ia.
Ina ua ma taunuu atu i le ma fale mautotogi, sa ma faamamaina ma faamagoina ma le faaeteete mea uma na faaleagaina i le faalavelave—vagana ai kopi e lua o le Tusi a Mamona na tuu ai pea lava i totonu o lana ato ina ua uma le ma aso o le talaiga. Sa ou faapea e le tatau ona ma popole i na kopi aua na tele lava isi a ma kopi na i ai i le ma fale.
O ni nai masina mulimuli ane talu ona tupu lena mea, sa ou sueina ai se mea e toe fai ai le faavaa o la’u tusipese na masae. Na ou tau ai i kopi pisipisia o le Tusi a Mamona sa ma lafoaiina i luga o se fata ma ou faapea ai atonu o le a lelei ia faavaa mo le toe faiga o la’u tusipese. Peitai ao o’u sauni e oti ese faavaa o ia tusi, na tuia lava lo’u loto: “Pe le o le tusi ea lenei o loo e talaiina atu? O se faiga lenei e tatau ona faia ai [le Tusi a Mamona]? O le a se manatu o au tagata sailiili?” Sa ou nofo i lalo ma ou mafaufau loloto mo se taimi umi. Ma, nai lo le otiina o faavaa, sa ou faamamaina ia tusi i le vai ma le fasimoli, faamamago, ma toe tuu ma le faaeteete i luga o le ma fatatusi.
Mai lenei aafiaga, na ou iloa ai ua leva se taimi o o’u ola i se molimau nonō e uiga i le Tusi a Mamona, e ui lava ina sa ou auai i le seminare ma le inisititiuti. Talu mai lena mea na tupu, ua ou latalata atu ai i le tusi, ma ua sili atu ona ou faatauaina. Na ou iloa o lo tatou tautinoga i le paia o le Tusi a Mamona, e oo mai a o tatou iloa e ala i aafiaga o le loto. E ala i le faitauina, mafaufau loloto, ma le faaaogaina o aoaoga o le Tusi a Mamona, ua ou iloa ai e moni.
Ata na tusia e Gregg Thorkelson