O Saunoaga e Fa, O Olaga e Fa Na Suia
O masina uma o Aperila ma Oketopa, e faitau miliona le Au Paia o Aso e Gata Ai e faalogologo atu i auauna a le Alii. E toafa ni tagata o le Ekalesia ua faasoa mai i auala na faia ai e konafesi aoao ni aafiaga i o latou olaga i le aluga o tausaga.
E Oo Mai Mea Lelei
E lei umi se taimi talu ona maua le faailoga o le matuaofaiva o lo’u toalua, ae mafaufau foi e toe foi i le aoga mo sona faailoga PhD [Fomai]. Sa lofituina i maua i lenei faaiuga aua sa matua faigata foi le mauaina o lona faailoga o le matuaofaiva. E toalua le ma fanau laiti ma na leva ona ma mananao ia maua se galuega lelei ma atonu foi ma se fale.
O lena konafesi ia Oketopa, na faasoa mai ai e Elder Jeffery R. Holland o le Korama o Aposetolo e Toasefululua nisi o ona aafiaga e uiga i le siitia atu o lona aiga talavou i Connecticut mo aoaoga i le iunivesite. Sa matou siitia atu foi i Connecticut mo aoaoga i le iunivesite. Ona ia faamatalaina lea o le auala na faaofi ai e lo latou aiga a latou meatotino uma i totonu o le latou taavale laitiiti—o le mea tonu foi lena na matou faia. Na ia faamatala ina ua amata le [latou] malaga, sa vevela tele le afi o lana taavale ma pe ai, e le’i tasi ae na faalua! Na faalua foi ona leaga le matou taavale.
Mulimuli ane, na ia faamatalaina ai se aafiaga lata mai i le tietie atu i se taavale lelei i le magaala tonu lea na pe ai lana taavale i le 30 tausaga talu ai. I lana vaai faalemafaufau i ai, na ia vaai ai ia te ia lava o se tamā talavou ma faapea ana upu: “Aua le fiu, alii. Aua lava nei e foi. … O loo i luma atu se fesoasoani ma le fiafia—e matua tele lava. … Ia e vaai agai i luma. O le a lelei mea uma i le taimi mulimuli. Ia faalagolago i le Atua ma ia talitonu i mea lelei e oo mai.”1 O le aafiaga a Elder Holland na fesoasoani ou te lagona ai le malamalama ma le alofaina. O lana faataitaiga na ou maua ai le lototele e saili le faamautinoaga faaleagaga, o le finagalo o le Alii mo lo maua aiga o aoaoga faaopoopo mo lo’u toalua. I le lima o tausaga ma le lua o pepe na maua mulimuli ane, na faamaeaina ai aoaoga a lo’u toalua. Na mautinoa lava le luitauina o le alu i le aoga, ae na maua lava le fiafia. Sa ma mulimuli i le finagalo o le Alii, ma na Ia faamanuiaina i maua i le faaletino, faaleagaga, ma tulaga tau tupe.
Talu mai lena konafesi, e masani ai lava ona ou manatunatu i le saunoaga a Elder Holland. Ua ou aoaoina ai afai ou te taumafai e faatuatua i le Atua e ala i le usitaia o fautuaga a Ana perofeta ma aposetolo, e mautinoa lava le oo mai o mea lelei.
Melinda McLaughlin, Maryland, ISA
Na Iu Ina Ou Talisapaia Tinamatua
A o ou laitiiti, sa ou fiafia lava e tusitusi atu i lo’u tinamatua. Sa nofo o ia i le isi itu o le atunuu, o lea sa le sili atu ai i le tasi i le tausaga ona ou vaai ia te ia. Peitai a o ou talavou laitiiti, sa faasolo ina le lava so’u taimi e tusi atu ai ia te ia, ma na amata mou malie atu la maua mafutaga. Pe a asiasi mai Tinamatua mo ni nai aso, ou te fesili atu pe fai atu foi se faamatalaga ia te ia mai lea taimi i lea taimi, ae o a ma talanoaga sa leai ma se lagona moni pe mai i le loto. Ina ua 16 ou tausaga, sa ou tau le iloaina o ia, ma sa ou le iloa foi pe faapefea ona talanoa atu ia te ia.
I le aso mulimuli o se tasi o ana asiasiga, sa na o a’u lava i totonu o le umukuka sa tapena le meaai o le afiafi, ae sau loa o ia ma saofai i lalo. Sa ou faafeiloaia o ia, ae mulimuli ane na ou le iloa se upu e fai atu. Sa ou iloa na fia talanoa mai o ia ia te a’u ma atonu ua leva ona ia fia maua se avanoa, ae e faapefea ona ou amataina se talanoaga ma se olomatua ua 75 tausaga o lē sa ou manatu na leai se mea na ma tutusa ai?
Sa ou ta’u atu mea na o’u kukaina, peitai sa le’i umi lena talanoaga. Sa iu ina ou fesili atu ia Tinamatua pe na faapeī lona olaga a o faapei o lo’u matua. Sa ia faamatala mai tala e uiga i feau ma gaoioiga faafiafia, ona faamatala mai lea i le la feiloaiga ma lo’u tamamatua ma alofa ai le tasi i le isi. Sa ou iloaina na leai se eseesega o lona olaga ma ana faanaunauga a o talavou mai i lo’u lava olaga.
I ni nai masina mulimuli ane, na saunoa mai ai Peresitene Boyd K. Packer, o le Peresitene o le Korama o Aposetolo e Toasefululua, i le konafesi aoao e uiga i matua o matua. I lana saunoaga, “O Tausaga o le Matua,” na ia saunoa ai i le atamai ma le taitaiga e mafai ona maua mai i tagata matutua o le Ekalesia. O lana autu na toe faatepa ai au i le ma mafutaga ma lo’u tinamatua, ma ou iloaina ai ua ou misia se faauoga e sili ona taua.
Sa tonu ia te au ia ou toe tusi atu ia Tinamatua. Sa fai si ou le mautinoa i se upu e fai atu, o lea sa na ona ou tusi ai e uiga i le galuega, uo, aiga ma mea na ou faia. Na tali mai o ia i a’u tusi uma lava ma faamatala mai e uiga i isi tagata o le matou aiga, o lana togalaau, ma ana mea na fai i lea aso ma lea aso. O le isi taimi na ma toe faatasi ai, sa faigofie lava ona ou talanoa atu ia te ia.
Ou te faafetai lava mo le saunoaga o le konafesi na oo mai i se taimi na ou saunia ai ma naunau e toe fia iloa lou tinamatua. O le saunoaga a Peresitene Packer, na ou iloa ai sa ou le amanaiaina le “punaoa tau tele o aafiaga, poto, ma musumusuga”2 o loo avea moni ai lo’u tinamatua. O lea la ua ou matua talisapaia lenei tamaitai lelei ma ua faamanuiaina a’u i ana faataitaiga ma le faauoga.
Laura A. Austin, Iuta, ISA
Na Ou Aoaoina mo Au Lava
Ou te faailoa atu o le taimi na ou alu ai i la’u misiona, na gata mai la’u molimau i le malamalama o le ata o le faaolataga ma le Tusi a Mamona. Na ou iloaina sa lei oo la’u molimau i le loloto sa ou manao ia ou mauaina, ma o le taunuuga, na ou lagonaina ai lo’u le agavaa e avea ma se faifeautalai.
E faapei o le toatele o tagata o le Ekalesia i Farani i lena taimi, ou te lei auai lava i se faasalalauga o le konafesi aoao. Sa masani ona matou auai atu i le toe faasalalauina o konafesi, lea matou te faalogologo ai i le faaFarani e ala i se faamatala upu. O lea, i le avea ai ma se faifeautalai na auauna atu i Uelese ma tautala faaPeretania, o le a ou faalogologo nei i le siufofoga o le perofeta, o Peresitene Ezra Taft Benson (1899–1994).
Ina ua amata le sauniga, sa pepese faatasi le faapotopotoga i le lotoifale ma le au paia o loo i ai i le Tapeneko i le Aai o Sate Leki. Sa ou pese foi ma sa ou maofa i se lagona lofituina o le fiafia i le avea ai ma se tasi [o le Ekalesia]. Na molimau mai e nei lagona o a’u lava o se tagata o le Ekalesia a Iesu Keriso.
A o o’u nofo ai iina, na oo mai se manatu i lo’u mafaufau: “E a pe a ou fesili atu i le Alii e faamautinoa mai ia te au o Peresitene Benson o Lana perofeta lea?”
Na ou iloaina e mafai ona ou “ole atu i le Atua” (Moronae 10:4), peitai sa fai si o’u fefe ina nei ou faatoasaina o Ia i a’u fesili. Ina ua mavae se minute o manatunatuga, sa ou filifili loa e faataitai pea. Sa punou lou ulu ma ole atu i le Alii e molimau mai ia te au, o le tamalii o le a saunoa mai, o Lana perofeta lea, tagatavaai ma le talifaaaliga. Sa lei umi ae oo mai i lo’u loto se lagona malosi o le toafilemu ma le fiafia. Na ea a’e lou ulu, pupula ou mata, ma faalogologo atu i le molimau a Peresitene Benson e uiga i le Tusi a Mamona.
Na amata mai i lena lava taimi, na ou iloa ai mo a’u lava o loo taitaia e le Alii le Ekalesia e ala i se perofeta filifilia. O se taunuuga o lena molimau, na ou tuua ai le konafesi ma ni sini fou, ma na ou iloaina o a’u lava sa faalagolago i ai le ausia o ia sini. Na ou suia le taulaiga o la’u misiona ma ou naunau e auai atu i sauniga konafesi aoao i le lumanai. Ou te faatalitali foi ma le naunautai i le taunuu mai o mekasini a le Ekalesia ina ia mafai ona ou faitau i tuleiga paia a auauna a le Alii.
Thierry Hotz, Farani
Tau Atu E Te Alofa Ia i Latou
I le konafesi aoao o Okeopa 2007, na saunoa mai ai Elder Claudio R. M. Costa o le Au Peresitene o Fitugafulu ia aua le faatali mo taeao e fai ai mea o loo mafai ona tatou faia i le aso lenei, ae maise lava pe a faatatau i o tatou aiga.3 I le faaiuga o lana saunoaga, na ia faasoa mai ai nisi o laina na faatatau i se solo na tusia e Norma Cornett Marek. O le savali a Elder Costa ma upu o lena solo na matua ou ootia ai ma na faamalosiauina ai au ina ia amata ona ou faailoa atu e le aunoa lo’u alofa i o’u matua, o’u tuafafine, ma a’u uo.
E moni sa ou alofa i lo’u aiga ma au uo ae ou te le’i faalogo i lena saunoaga o le konafesi, ae sa le masani ona ou tauina atu ia i latou ou te alofa ia i latou, pe le o aso uma foi. Atonu na manaomia lava ona latou faalogo soo i na upu faapitoa mai ia te a’u. O le taimi muamua, sa ou le mautinoa pe o le a faapefea ona latou talia, peitai ina ua maua mai se tali lelei, sa ou filifili loa e faaauau ai lea faiga. I ni nai masina na sosoo mai ai, na ou iloa ai na i ai ni vaega na faamalosia o a matou mafutaga ona sa ou usitaia le saunoaga a Elder Costa.
O lenei ua ou auauna atu o se faifeautalai faamisiona i se mamao e fia afe maila mai lo’u aiga i Costa Rica. Ou te misia lo’u aiga, peitai e le afaina lea. Ou te iloa latou te alolofa ia te a’u, ma ou te iloa foi o loo latou iloa ou te alofa ia i latou. Ou te lagona le toafilemu ona sa ou faaaogaina (ma o loo ou faaaogaina pea) avanoa e faailoa atu ai lo’u alofa.
Ou te faafetai lava ona ua tatou maua le avanoa e faalogologo ai e le aunoa i taitai ua valaauina e le Atua. Ou te iloa a tatou mulimuli ia i latou, o le a faamanuiaina o tatou olaga ma olaga o i latou tatou te alolofa i ai.
Elder Hugo Lino Rivera Mena, Misiona a Idaho Boise
E tutusa lava le aafiaga o le matou aiga ma le aafiaga o Elder Holland. O lana faamalosiauga ia “talitonu i mea lelei e oo mai” na fesoasoani ou te lagona ai le malamalama ma le alofaina.
Ata na tusia e Mike Malm
Sa ou ole atu i le Alii ina ia molimau mai ia te au o le tamalii o le a saunoa mai o Lana perofeta lea.
Faamatalaga mai le Keriso ma le Taulealea Mauoa, na saunia e Heinrich Hofmann, faaaloaloga a le C. Harrison Conroy Co.