Taimi o Fetufaaiga

Ua Aoao Mai A’u e Perofeta i Ala e Faamalosia Ai Lo’u Aiga

Saunia e Cheryl Esplin

“O le mea ua fai atu ai a’u le Alii, ua ou fai atu ai lava … ; pe fai atu i lo’u lava leo po o le leo o a’u auauna, ua tusa lava ia” (MFF 1:38).

O aiga ua faauuina e le Atua. Ae tatou te le’i fananau mai, sa tatou ola o ni atalii ma ni afafine agaga o le Tama Faalelagi. Ina ua oo i le taimi tatou te o mai ai i le lalolagi, sa fuafuaina e le Tama Faalelagi ina ia tatou o mai i se aiga. Na Ia silafia o aiga o le auala sili lea e fesoasoani ia i tatou e saunia ai e toe foi atu e nonofo faatasi ma Ia.

E valaauina e le Tama Faalelagi ni perofeta e molimau ia Iesu Keriso ma aoao atu Lana talalelei. E fesoasoani perofeta i aiga ia iloa mea e manaomia ona latou faia e maua ai le fiafia ma toe foi atu ai e nonofo faatasi ma Ia

E mafai ona tatou faitau i aoaoga a perofeta i tusitusiga paia. E mafai ona tatou faalogo i le perofeta i konafesi aoao. Afai tatou te faalogo ma le totoa, e mafai ona tatou iloa le mea e finagalo le Tama Faalelagi tatou te faia. A tatou usitai i le fautuaga a le perofeta, o le a tuputupu ae o tatou faatuatua. O le a mafai ona tatou fesoasoani e faamalosia lo tatou aiga.

Gaoioiga

Aveese le itulau U8 mai le mekasini, ma faapipii i se pepa malo. A o e faalogo atu i le perofeta i le konafesi aoao i le masina fou, faalogo mo mea na te aoao mai e mafai ona fesoasoani e faamalosia ai lou aiga. I faavaa o ata, tusi ai ata o oe ma lou aiga o loo fai mea na aoao mai e le perofeta. Tuu tou ata i se nofoaga e mafai ona faamanatu atu ai ia te oe ma lou aiga mea na aoao mai e le perofeta.

Manatu mo Taimi o Fetufaaiga

Ua aoao mai a’u e perofeta o le Tusi a Mamona i ala e faamalosia ai lo’u aiga. Ia faamalamalama atu i tamaiti, na vaai perofeta o le Tusi a Mamona i o tatou aso ma puapuaga e feagai ma o tatou aiga. Ua aoao mai i tatou e perofeta o le Tusi a Mamona i mea tatou te faia e puipuia ai ma faamalosia ai o tatou aiga. I le faaaogaina o pine o igoa po o toniga faigofie, tuu atu i tamaiti e faatino tala e uiga i perofeta o le Tusi a Mamona o loo aoao mai ai aoaoga faavae o le a faamalosia ai o tatou aiga (tagai “Tala Faatino,” O Le Aoao Atu e Leai Se Isi Valaauga e Sili Ai [1999], 174–75). Mo se faataitaiga: O le tala ia Liae ua tuua ma lona aiga Ierusalema, ia faamamafa atu le usiusitai o Liae i poloaiga a le Alii (tagai 1 Nifae 2:1–7). Tuu atu i le tamaitiiti na fai ma Liae e faitau le 2 Nifae 1:4, ona talanoa lea ma tamaiti i le taunuuga o le usiusitai o Liae. Ia fesili atu: Afai na puipuia ma faamanuiaina e le Alii le aiga o Liae ona o le usiusitai, o le a se mea o le a faia e le Alii pe a usiusitai lou aiga? (O le a Ia puipuia ma faamanuia lou aiga.) Faatino le tala ia Alema o loo tatalo mo lona atalii o Alema le Itiiti (tagai Mosaea 27:8–37). Talanoa pe faapefea ona fesoasoani le tatalo mo tagata o le aiga e faamalosia ai o tatou aiga. Ia uunaia tamaiti e matau faataitaiga a isi perofeta o le Tusi a Mamona e mafai ona latou mulimuli ai.
Ua aoao mai a’u e le perofeta o aso nei i auala e faamalosia ai lo’u aiga. Fesoasoani i tamaiti e tauloto le “O le mea ua fai atu ai au le Alii, ua ou fai atu ai lava … ; pe fai atu i lo’u lava leo po o le leo o a’u auauna ua tusa lava ia” (MFF 1:38; tagai “Taulotoina,” O Le Aoao Atu e Leai se isi Valaauga e Sili Atu, 181). Tau atu i tamaiti o le a e faamatalaina atu se tasi o auauna a le Alii. Fai atu ia i latou e sii o latou lima pe a latou iloa o ai lea: sa faigaluega o ia i se pisinisi lomitusi; o lona igoa ogatotonu e amata i le S, lea e amata ai Spencer; o ia o le Peresitene lona 16 o le Ekalesia; o ia o le perofeta soifua o loo i ai i le lalolagi i aso nei. Faaali atu se ata o Peresitene Thomas S. Monson. Ia faamamafa atu, pe a saunoa mai o ia, e tusa lava o loo saunoa mai le Alii. Tusi i luga o le laupapa ma tuu atu i tamaiti e faataitai atu le faitauga “E aoao mai au e Peresitene Monson i le auala e faamalosia ai lo’u aiga.” Tuu atu i vasega taitasi ni upusii eseese a Peresitene Monson o loo aoao mai ai i tatou i auala e faamalosia ai o tatou aiga (tagai i lomiga o le konafesi o le Liahona). Tuu atu i tamaiti e talanoa ma lo latou faiaoga i mea e mafai ona latou faia ia ola ai i lena aoaoga faapitoa. Ia valaaulia se tamaitiiti o vasega taitasi e fetufaai atu le aoaoga. Usu le “Ia Viia Oe le Atua, mo le Perofeta” (Viiga, nu. 10). Molimau atu afai tatou te mulimuli i le perofeta soifua, ua tatou mulimuli i le Alii.