Na Iu Lava Ina Ou Talia le Lu’i
Jennifer Garrett, Kalefonia, ISA
O a mai outou i le faitauina o le Tusi a Mamona?” sa fesili mai ai le epikopo i lo matou aiga i le taimi o le faatalanoaga o le sefuluai i le 2005.
Na faatoa uma lava ona matou talanoaina le tele o o’u tiute i le ekalesia ma le aiga faatasi ai ma se fanau tama laiti e toalua. Sa ou tau memumemu atu e uiga i le faigata tele ona faitau se mataupu atoa i aso uma, ae o totonu o lo’u loto na ou iloa lava sa ou faia ni sisio. O le mea moni e ui lava ina sa ou faia ni mea lelei se tele i nai masina ua mavae, ae ou te lei taumafai lava e faitau le Tusi a Mamona mai le amataga e oo i le faaiuga e pei ona luiina mai e Peresitene Gordon B. Hinckley.1
Ina ua amata le tausaga fou, sa tuia lou loto e le Agaga. Sa ou lagonaina lo’u pei o le lepela o Naamanu, o lē sa musu e fai se galuega faigofie lava o le faamamaina o ia lava i vai o Ioritana, e pei ona faatonuina ai e le perofeta o Elisaia (tagai 2 Tupu 5:1–14). O le faitauina o le Tusi a Mamona o se gaoioiga faigofie lava.
O le aso sa anapogi na sosoo ai, na i ai ni nai tuagane ma uso na tuuina mai a latou molimau e uiga i le faataunuuina o folafolaga a le perofeta i o latou olaga. Na ou iloaina na ou misia na faamanuiaga ona ou te lei faalogo i lona siufofoga. Sa tonu ia te au ou te faitauina le Tusi a Mamona mai le amataga e oo i le faaiuga i le 2006—ma le isi tausaga na sosoo ai ma le isi—ina ia ou maua le fiafia i ai e pei o Peresitene Hinckley.
A o faasolo ina uma le tausaga, sa ou toe iloiloina lau sini, ma le iloaina e uma ona ou faitauina le tusi i le faaiuga o le tausaga. Na ou iloaina na ou mauaina ni vaaiga manino ia e le mafai ona ou mauaina mai se isi lava tusi. Sa ou ola latalata atu i lo’u Tama Faalelagi ma lo’u Faaola. Sa ou mauaina le tele o avanoa e fetufaai atu ai le talalelei i le aluga o le tausaga aua na ou faitauina le Tusi a Mamona ma mafai ona molimau atu i lona moni.
Maimau pe ana ou taliaina le lui a Peresitene Hinckley i le 2005. E pei lava o Naamanu, o le na iu lava ina faamamaina o ia lava i vai o Ioritana, semanu ou te vave mauaina muamua le olioli i faamanuiaga o le Tusi a Mamona.
Ou te faafetai ua ou aoaoina le taua o le talia e oo lava i nai luitau faatauvaa mai le perofeta. Ou te tulimatai lava i se tausaga fou e tumu i faamanuiaga mai le toe—faitauina o le Tusi a Mamona.